الموضوع: للمتزوجين حديثا بتروح عند حماتك قد ايه وبتاخد معاك ايه

للناس اللي لسه متجوزه او بقالها سنتين او تلاته يعني لسه معندوش عيال في المدرسة فغصب عنه مش هيقدر يخرج يزور حد الا في الويك اند

لو كانت حماتك ساكنة قريب منك ياتري هتروح عندها كام مرة في الاسبوع وممكن تاخد معاك ايه وانت رايح
هل في كل مرة بتاخد حاجه ولا كل قد ايه وبيكون ايه هل فاكهة او حلويات او مثلا لحوم
بتروح مرة في الاسبوع ولا كذا مرة
هل كل مرة بتروح بيكون فيه غدا ولا زيارة خفيفة بعد الغدا
هل ممكن زوجتك تروح عند والدتها طول النهار وانت في الشغل وترجع تاخدها وتروح من غير ما تتغدا ولا ده بيكون صعب

صديقي المواطن
قبل أن أكمل قراءة كل تعليقات اﻷخوة الزملاء من المناضلين في منتدانا الكريم
فقولا واحدا نصيحتي المختصرة
بكره تنزل إعلان بالوسيط وتبيع شقتك وتنقذ نفسك وعيلتك وتشتري راحتك وصحتك وتشتري نفسك وإلا إنت بتفتح على نفسك فتوحة وإلا إنت حتفضل تقاوح وتفضل تعافر وتفضل تفرفص وتفضل تلزق وبعد كام سنة ترجع وتقول
صدام المواطن نصحني بس أنا مسمعتش نصيحته وحيكون دايما شعارك في المرحلة دي
إحنه إنتهينا خلاص
أما الصح تعمل إيه
زيارة الزوجة ﻷمها تكون مرة أسبوعيا وإنت توديها وتجيبها فقط ومتطلعش وتروح مرة واحدة في الشهر تتغدى عندهم وتقعد 3 ساعات ولازم تحافظ على إنك دايما تخش تملالهم الثلاجة بزيارتك أو تجيب صندوق كيت كات أو تويكس وتحافظ عالتقليد ده سنين وسنين عشان يوم دخولك عندهم يعتبر تجربة سعيدة ومش مرهقة وكمان لو عندهم سكر تكون إنت قصرت وبتجيب من اﻵخر
صديقي المواطن
أنا مش عارف إنت بتفكر إزاي
فيه ح يسكن جنب حماته ويحط البنزين جنب النار ليه أعمل في نفسي كده ليه بمرور الزمن أجرأ مراتي وأقويها عليا

التاس أساسا يا إما يتجوزوا بنات تكون أمهاتهم بره مصر وطبعا ده فاز بالدنيا واﻵخرة وفيه ناس بتتجوز من محافظات تانية وده أمه داعياله وفيه ناس تتجوز من نفس المحافظة فده ربنا يتولاه زي البطيخة يا صابت يا خابت واللي زي حضرتك متجوز في نفس الشارع فده يا إما أمه مش راضية عليه أو هو مؤمن أوي فربنا بيختبر إيمانه وبيحطو في مصائب وإختبارات يومية فإن صبرت فأنت مأجور عليها
ولما حتعزل عاوزك تسكن بعد منطقتين من بيت حماتك وأهم حاجة ميكونش مترو يربط المنطقتين
يعني اللي من الهرم لازم يتجوز من مدينة نصر أو مصر الجديدة
صديقي المواطن إنت كده حياتك بعد فترة صباح المؤمرات ومساء الدسائس وسيبك من كلام الدعايه واﻹعلام بتاع فيه حماوات ذهب وبيحبوا جواز بناتهم كل ده 1% ومظنش حضرتك حتوقع في ال 1 % وعملا بالمثل مستديم الفشل بتاع أنا وأخويه على إبن عمي وأنا وإبن عمي عالغريب وطبعا مش محتاج أقوللك إنك في المعادلة دي حضرتك الغريب

أرجو أن تتقبل مروري وإلحق أنقذ نفسك وأنا بكره حفتح الوسيط أدور على إعلان شقتك وإنت عارضها للبيع
وهذا ما لزم بيانه ودمتم
وبالتوفيق وإلى اﻷمام
ومن نصر إلى نصر
ودمتم للنضال