العمر الافتراضي للسيارات الصينية ... حدث ولا حراج
قبل ما ابتدي كلامي احب اوضح اني اكن كل الاحترام للاخوة في المنتدي من محبي السيارات الصينية
انما اللي هقوله دلوقتى من خلال خبرتي البسيطة في التعامل مع السيارات
من يومين طلعت انا وصحابي رحلة لبرج العرب نعد في فيلا واحد صاحبنا هناك ونغير جو وكدة
العربيات اللي كانت في الرحلة 6 بالظبط وتقريبا كلها موديلاتها قريبة من بعضها
صني 2007
اسبرانزا 2007
لادا 2002
لانوس 2004
فيرنا 2006
واخيرا رومانة الميزان :d صني 2013 (شكل قديم)
طلعنا مع بعضنا وكل واحد معاه مراته وعياله
السكة كانت مش طويلة ووصلنا مع بعض
بس بمجرد ما وصلنا ركنا العربيات كلها جنب بعض وكلنا لاحظنا حاجة غريبة جدا
الاسبرنزا بتاعت صاحبنا حالتها تعتبر شبة مهلوكة
تحس انها عربية من موديلات السبيعينات مش انتاج 2007
ودة كحالة عامة من برة وصوت موتور وكمان حالة عشفة
مع اننا كلنا من هواة المحافظة على العربيات
محدش فينا يعني بيحب يشد او يجري او يغرز والكلام دة، معظمنا تعب لحد ما جاب عربية فبنحاول نحافظ على فلوسنا اللي تعبنا وشقينا فيها
فدار نقاش طويل عريض ما بينا كلنا حولين العربيات الصيني
من مؤيد لمعارض لمتحامل اوي لمجامل جدا لمتوسط في اراءه
لكن كانت اكتر الاراء تحاملا على العربية كان راي صاحبها (صاحب الاسبرانزا)
على حد قوله ان العربية تقريبا كل حاجة فيها باظت
حالة العشفة زبالة، الموتور بيفوت وخفيف، الصاج اكلته الباروما من اماكن كتير + صدا كتير اوي ، العربية بقت بتعوم على سرعات زي ال50 وال60 ،قطع غيار لا تعمر اكتر من 6 اشهر بأقصي تقدير، كوصف عام بيقول انه راكب قنبلة موقوته ونفسه يخلص منها
مع العلم ان العربية مش ماشية ياما حوالي 40 الف كيلو
فكلنا بصينا لبعض وشوفنا منظر عربيتنا من الاقدم للاحدث
فعلا شكل العربية متبهدل جدااااا عن حتى اللادا اللي هي اقدم واحدة فيهم
وقعد صاحبنا يقولنا اراهنكم لو مشيت في البلد ولقيت اي عربية اسبرانزا دلوقتى ماشية نفس الموديل وماسكة نفسها، تحس ان كلها معجونة بالزيادة ومتبهدلة مع ان مبقلهاش في السوق ميكملش 5 او 6 سنين، في حين في عربيات كوري وماليزي في نفس فئة السعر وماشية بأحترام جدا واقربها للسعر اللانوس والفيرنا
فهل فعلا العربيات الصيني لا تصلح انها تكون عربية معمرة او على الاقل تعيش 10 او 15 سنة محترمة وماسكة نفسها
ولا هي عربية من بتاعت 4 ولا 5 سنين واقلب ؟؟