بروتون بيرسونا 2009 كاملة اوتوماتيك فابيركة للبيع بالاسكندرية

بروتون برسونا الاسد الماليزي 2009 كاملة اوتوماتيك فتيس محترم جدااا استخدام راقي جداااا (ثاني مستخدم من الزيرو) 65000 كيلو متر رخصة بإسمي انا المالك لسة مجدد سنة تبدأ من 18/11/2013 والفحص كمان 3 سنين
ميزة هامة ايضا يعلمها الاسكندرانيةالسيارة ((( مرور مدرية الامن راحة تامة في التعامل )))
السيارة بها 2 مفتاح كونتاك بكيسته المفتاح بشفرة وريموت فنفس الوقت للسنتر والشنطة صيانة دورية بالكامل بالتوكيل بالفواتير والتواريخ وقطع غيار السرفيس المستبدلة القديمة موجودة بعلب الجديدة حتى الطنابير وجميع الفلاتر والسيور المستبدلة موجودة بالجراج عند المعاينة ...
السيارة تكييف فريون يعمل بكفائة عالية واقتصادي جدا في البنزين مع الماتور الانجليزي 1600 سي سي الرياضي جدا
السيارة بها نظام فرامل ABS و EBD وعافشة رياضية فابريكة لها ثبات مزهل يلاحظ مع اول تجربة مع الباور الاوتوماتك الذي يجعل الباور والثبات فالسرعات العالية ممتع مع الصالون والمقصورة الرياضية والطارة مقاس small
وبها ايضا عدد 2 اير باج للسائق ومن بجانبه للامان وبها نظام اللوك lock لحزام الامان والابواب مع السرعات العالية والاطفال ....
الابواب جميعا بها دعامات داخلية للامان عند الاصتدام لا قدر الله والسيارة بها ماسك بطاحات من الامام تحت الكبوت مثل السيارات الرياضية لذيادة الثبات... السيارة لم ترش دواخل او خوارج سوى اكصدامين وبها خربوش في باب السائق إلى جانب جنوط ألمونيوم سبور فابريكة بطقم بلوف ستانلس لا يوجد بهم خرابيش واستبن لم يستخدم ةكوريك ومفتاح (العلامات أصلية أمامي وخلفي ) كل شيئ بالسيارة والتابلوه يعمل وجميع الازرار التاتش وغير التاتش (سنتر وزجاج ومرايات والسخانات والانتظار ونور التابلوه والعدادات والمالتي فانكشن فالطارة ) تعمل ... فرش جلد فخم تفصيل عمره 6 شهور فقط إلى جانب ارضية جلد بالكامل حتى الشنطة ودواسات حوض كاملة جديدة....
كاسيت و4 سماعات قوية الفابيركة بحالة الجديد سيديهات وراديو قوي إلى جانب كابل AUX ومالتي فانكشن فالطارة للتحكم الكامل فالكاسيت والراديو (من اجود الكاسيتات الفابريكة اللي يركبلها عدة صوت اذا اردت ) الفوانيس الاصلية وبها زينون عالي وواطي وعالي فقط فالفوجات الفوانيس بها رموش فايبرجلاس والاكصدام الامامي به كساحة فيبرجلاس .... السيارة إستخدام راقي جدا والسعر75000 وهذا السعر اقل من قيمة السيارة ومميزاتها العامة والخاصة الاتصال للمعاينة بجراج بمحرم بك او للاستفسار او المشورة من اصحاب الزوق الرفيع في اي وقت 01281140131 او على فايبر او واتس اب من نفس الرقم وهذا لينك للصور بروتون بيرسونا 2009 كاملة اوتوماتيك فابيركة للبيع - بروتون سيارات في محرّم بيك الإسكندرية | دوبيزل مصر

العربية نضيفة جدا ماشاء الله

ربنا يوفقك في البيع

أشكرك اخي العزيز جزاك الله خيرا وسيارة فراري :)

مش عيب عليك تقول فابريكة وهي رشة كلو عدا السقف وعيب لما تخلي ناس تسافرلك من الصعيد والعربية تبقي محتاجة من 8000 الي 10000 جنية صيانة وعيب عليك لما تقول بتعمل صيانة ف التوكيل وهما فاتورتين بقطع غيار والعيب الاكبر تهرب من التوكيل ف حرفيين اسكندرية وتخبط القمع وتعور رجل فرد الامن اللي مش مصدق يروح يسال ف التوكيل
حسبنا الله ونعم الوكيل فيك
حسبنا الله ونعم الوكيل فيك
حسبنا الله ونعم الوكيل فيك

لا حول ولا قوة الا بالله تحذيييييير : اخواني هذه الايام لابد من التأكد من شخصيات الناس الحقيقية قبل التعامل ولا تقبل (((((شيكات او تحويلات بنكية)))) في اي عملية بيع من شخص لا تعرفه ولا تذهب مع احد الى اي مكان لا تعرفه ولا تقوم بالذهاب لأحد في مكان يحدده هو وتذهب وحدك بسلامه نية افضل شيئ ان يأتي هو لك في مكانك للمعاينة وإياك ان تترك المفتاح من يدك افضل شيئ ان يتم كل شيئ داخل الشهر العقاري وان يكون معاك كذا فرد ثقة وعربية تانية تروح بيها بعد تسليم السيارة للمشتري وأقبض فلوسك كاش وتأكد انها كلها سليمة قبل الشروع في اي عملية بيع وآخر حاجة تسلمه الرخصة وإذا ذهبت لمكان للكشف على السيارة دع الشخص المشتري يدفع مصاريف الكشف ((((مسبقاً )))) لانه اذا تورط ولم يجد مفر (((فلن تجده))) احزرووووو النصب

تم البيع بفضل الله اليوم وشكرا لإدارة الموقع على إتاحة الفرصة للإعلان وجزاكم الله خيرا

((((((((( تم البيع ))))))))

النصب ان انت تقول عربيتك فابريكة وهي راشة والنصب انك تقول بتعمل صيانات ف التوكيل وانت كبيرك شاري قطعة غيار من هناك والمهندس كشفك وقال ان عربيتك بالكتير تسوي 60 الف جنية والنصب انك تخدع الناس وتوديهم اسكندرية من الصعيد والنصب انك تهرب من التوكيل وتخبط القمع والرجل بتاع الامن يا بتاع الشهر العقاري
والنصب انك متقولش علي حقيقة عربيتك وعايز تروح بيها الشهر العقاري علي طول
عربية التقرير بيقول عايزة مساعدين وجوان عشان الزيت مبهدل الموتور وعلبة دركسيون ورشة كلها عدا السقف وشغل ف الفتيس عشان بياخر ف النقلات .... وغيره
ولو اللي عايز يشتريها يروح التوكيل المصري الالماني توكيل عز العرب ف حرفيين اسكندرية ويسال هناك علي اللي عملو الاستاذ وهرب ازاي بالعربية
حسبنا الله ونعم الوكيل فيك

ههههههههههههههههههههههههه هههههههههههههههههههه تم البيع الف بركة ع اللي اشتري وهيدعي عليك ان شاء الله ده لو اتباعت

اسلام عليكم
هوا فيه ايه العربية مالها
دى كان شكلها عاجبنى اوى
استاذ abkarabkar78
ايه اللى حصل وايه الكلام ده
ممكن تفاصيل

السلام عليكم اللي حصل اتصلت بصاحب العربية ا. محمد وسالتو ع العربية وقلتلو هشتريها هي فيها مشاكل او محتاجة صيانة رد وقال فابريكة عدا الاكصدامات ولسه عاملة صيانة زي الاعلان الطويل اللي كان حاطو علي كل المواقع قلتلو انا جاي من الصعيد مش جاي من الشارع اللي جنبك قال تمام سافرنا يوم كامل وبعد ما وصلنا لقينا العربية من جو الكبوت غرقانة زيت اتفقنا نكشف ف التوكيل وكانت المفاجاة العربية رشة كلها عدا السقف ومحتاجة صيانة بمبلغ ف حدود 8000 جنيه قلنالو عيب لما تكدب حرام عليك خليتنا ندب مشوار ومصاريف لو ينفع ناخد العربية ب 63 الف ونعمل الصيانة رفض والمهندس اللي هناك قال بالكتير من 60 ل 65 الف رفض وبعدين قلنالو ادفع فلوس الكشف لانك طلعت مش صادق وللعلم كان معاه والده مش لوحدو قام خد العربية وطلع زي المجنون وخبط القمع وخبط ف رجل بتاع الامن وللعلم معانا صورة الرخصة والبطاقة بتاعتو
المفروض يتحري الصدق كده عيب احنا مش ساكنين جنبو والمشوار كلفنا ف حدود 750 جنيه ده حلال ولا حرام
ع العموم قدر الله وما شاء فعل واللي مش مصدق يسال ف توكيل المصري الالماني بالحرفيين اسكندرية
ياريت هو يتعلم من الدرس ده ويكون صادق عشان اللي ياخد منه العربية يدعيلو ما يدعيش عليه .........ربنا يوفق الجميع يمكن لولا الواحد مصلي استخارة كان راح بنزينة ولبس ف تمن العربية 75000 جنية غير الصيانة يعني 83000 جنية يعني قريب من سعرها جديد
قدر الله وما شاء فعل

اقتباس:

---

المشاركة الأصلية كتبت بواسطة abkarabkar78

السلام عليكم اللي حصل اتصلت بصاحب العربية ا. محمد وسالتو ع العربية وقلتلو هشتريها هي فيها مشاكل او محتاجة صيانة رد وقال فابريكة عدا الاكصدامات ولسه عاملة صيانة زي الاعلان الطويل اللي كان حاطو علي كل المواقع قلتلو انا جاي من الصعيد مش جاي من الشارع اللي جنبك قال تمام سافرنا يوم كامل وبعد ما وصلنا لقينا العربية من جو الكبوت غرقانة زيت اتفقنا نكشف ف التوكيل وكانت المفاجاة العربية رشة كلها عدا السقف ومحتاجة صيانة بمبلغ ف حدود 8000 جنيه قلنالو عيب لما تكدب حرام عليك خليتنا ندب مشوار ومصاريف لو ينفع ناخد العربية ب 63 الف ونعمل الصيانة رفض والمهندس اللي هناك قال بالكتير من 60 ل 65 الف رفض وبعدين قلنالو ادفع فلوس الكشف لانك طلعت مش صادق وللعلم كان معاه والده مش لوحدو قام خد العربية وطلع زي المجنون وخبط القمع وخبط ف رجل بتاع الامن وللعلم معانا صورة الرخصة والبطاقة بتاعتو
المفروض يتحري الصدق كده عيب احنا مش ساكنين جنبو والمشوار كلفنا ف حدود 750 جنيه ده حلال ولا حرام
ع العموم قدر الله وما شاء فعل واللي مش مصدق يسال ف توكيل المصري الالماني بالحرفيين اسكندرية
ياريت هو يتعلم من الدرس ده ويكون صادق عشان اللي ياخد منه العربية يدعيلو ما يدعيش عليه .........ربنا يوفق الجميع يمكن لولا الواحد مصلي استخارة كان راح بنزينة ولبس ف تمن العربية 75000 جنية غير الصيانة يعني 83000 جنية يعني قريب من سعرها جديد
قدر الله وما شاء فعل

---

معلش ياياباشا
الحمد لله انها جت على قد كده

بعد الاستئذان من سيادة المهندس حسان المشتري والمالك الجديد للسيارة هذا رقمه ( ٠١٠٠١٠٨٧٩٤٥) الاتصال بعد المغرب لمن يهمه الامر ودعهم في حقدهم وجهلهم يحترقون واللي يعيش ياما يشوف !!
ملحوظة : تم إلغاء اشتراكي فالموضوع لعدم أهميته بالنسبة لي والرقم موجود للمشورة او اي مساعدات او من خلال برامج الشات المختلفة
تقبلوا مروري والسلام عليكم ورحمة الله وبركاته

انت لغيت اشتراكك عشان غاوي هروب ... انا اتحداك يا ابو ارقام عمال تحطها واللي اشتري منك واللي مشتراش ميهمنيش مين اشتري او مين باع يهمني ترد علي كدبك ... عربية فبريكة ( طلعت رشة) عربية بتعمل صيانات توكيل ( محصلش) انا عندي حل بس انا مش داخل معاك في جدال اللي حصل حصل وحسبنا الله ونعم الوكيل فيك ..... اتحداك تحط رجلك في التوكيل اللي هربت منه ..... عيب عليك اللي عملتو ... الموضوع بالنسبة لي انتهي واستعوضت ربنا في اللي خسرتو بس انا حبيت احذر الناس اللي ممكن تسافرلك او تدب مشوار .... والاعتراف بالحق حاجة كويس وكان ممكن تعترف انك غلطت د احنا سافرنا 600 كيلو ذهاب و600 رجوع عشان نروحلك اسكندرية
ف الاخر تقول حقد وجهل ايه اللي بنا وبينك عشان تقول حقد وجهل وهنحقد عليك ليه اساسا عشان انت مش صادق ولا عايز تبيع عربية فيها شغل بتمن متستهلوش
وللحق العربية من بره وجوه نضيفة زي الصور بس مش فبريكة ومش صيانة توكيل ومحتاجة مصاريف كتير وده كلام التوكيل واحنا لما نشتريه عربية مش هنكشف عليها ف بنزينة لان عذرا مش هيديني تقرير زي التوكيل
ارجو للمرة الاخيرة مراجعة نفسك وتكون صادق ف المستقبل لاني مش هرد عليك تاني الموضوع خد اكتر من حقه بس ربنا موجود ... لانك من الاول لو قلت الحاجات اللي ف العربية كنت وفرت علينا المشوار