الموضوع: دعوة لمناقشة مبدأ (عبوها) عند بيع أو شراء سيارة.....

موضوع جميل طبعا , وعلى فكرة دي مش اول مره يتفتح الكلام فيه على المنتدى بس برضه ادينا بنفضفض

المشكلة الرئيسية في رأيي هي ازمة الثقة بين البائع والمشتري , والمتسبب في كده فئة من التجار معدومي الضمير اللي بيشتروا عربيات عامله حوادث و متغيرلها انصاص و يبيعوها على انها راشه نضافه , عشان كده اي عربيه راشه حتى وان كانت نضافه فعلا سعرها بينزل

وانا شخصيا عربيتي كانت فابريكه 100% من بره و من جوه واتخبطت في العتب , وكنت مأمن عليها تأمين شامل , فصلحتها في الـتأمين , مندوب التأمين اللي انا بتعامل معاه حب يجاملني فرشلي الجانبين كلهم مش العتب بس , هم طبعا كان فيهم خدوش و حكات بسيطه من الغباء اللي مالي الشارع عندنا

ودلوقتي انا عارف اني لما هابيعها هاواجه مشكلة في اقناع المشتري اني فعلا رشيت الجانبين نضافه و معملتش بيها حادثه جامده اضطرتني اني ارشها واكيد السعر هاينزل شويه , بس هانعمل ايه , ده حال السوق المصري ولازم نقبله على علته

طبعا الناس كلها خلصت الكلام اللى نفسى فيه و زياده

عايز ازود حاجه بسيطه : ان اللى بيشترى عربيه مستعمله فى مصر هو فى الاساس بيشترى شاسيه بس

مش مهم الموتور و لا العفشه و اى حاجه المهم الشاسيه سليم و الحكمه دى سمعتها من راجل فى بنزينه كنت بكشف على عربيه عنده و العله فى كده ان اى حاجه بتتغير فى العربيه ممكن تجيب غيرها لو باظت انما الشاسيه لو حصله حاجه يبقى كده شكرا العربيه معيوبه

و الموضوع فضل يتطور تدريجيا لحد لما وصل لصاج العربيه و الخبطات و الرش و للأسف اللى بيتحكم فى معظم سوق المستعمل تجار معندهومش ضمير الا من رحم ربى