دعوة لمناقشة مبدأ (عبوها) عند بيع أو شراء سيارة.....
السلام عليكم ورحمة الله وبركاته
إحترت كتير أكتب الموضوع ده في أي قسم،وفي نهاية المطاف إستقريت هنا على الإجتماعي لأنه مالوش علاقة بعربية معينة قد ماهو ليه علاقة بطريقة تفكير وأسلوب حياة.
معلشي هو موضوع طويل شوية لأنه موضوع حيوي وأساسي لأي حد معاه عربية وخاصة عربية جديدة.
أعرفكم بنفسي وخاصة إني أول مرة أشارك هنا في القسم ده
طبيب أسنان أحمد الفيومي من محافظة المنوفية
طبعا كلنا عارفين وأكيد سمعنا كلمة عابوها
يقولك العربية دي عابوها ( إختصار على أبوها) يعني فابريكة ومافيهاش سكينة معجون أو دهان جديد
وده بيرفع سعر العريبة عند إعادة البيع
بس هل ممكن نتناقش شوية في كلمة عابوها دي
أنا معاكم إن عابوها دي معناها إن العربية دي مافيهاش سكينة معجون أو أي حتة مدهونة جديد وده دليل إن العربية دي ما خادتشي خبطة جامدة تأثر على أجزاءها الداخلية أو الهيكل أو الشاسيه.
ولكن لما عربيتي تتخدش أو تتخبط خبطة بسيطة جدا أو تتحك مني وأنا بركن مثلا هل يبقى عابوها هي سبب إني أسيب العربية من غير علاج صحيح مناسب؟
هل أسيب عربيتي يادوب أعدلها على البارد وبقلم فلومستر مثلا أدهن الحتة اللي ظهرت من الصاج؟
هل أسيب صاج عربيتي باين من الخدش وأغطيه بستيكر عليه دبدوب أو قلب أو مثلا حبيبة باباها؟
هل أسيب عربيتي الصاج بتاعها مخدوش وباين وبيصدي والصدى يبدأ فيها عشان تبقى عابوها لما آجي أبيعها؟
ححكي حكايتي باختصار مع عابوها
في يوم عادي جدا كنت راكن عربيتي في نفس المكان اللي بركنها فيه من سنتين في أقصى يمين شارع عرضه حوالي 8 أمتار وفي حتة داخلة جوا يعني مستحيل بأي حال من الأحوال حاجة تحصل لها. لقيت الناس بتنده عليا إلحق يادكتور عربيتك إتخبطت. طلعت لقيت تريسكل كان اللي سايقه باصص لوار بيكلم واحد وهو ماشي والترسيكل بدأ يدخل يمين وعقبال ما عدل وشه وشاف عربيتي قدامه لحق نفسه بس كان حك في عربيتي.
المهم الأضرار هي خربوش طايل الصاج في الإكصدام الخلفي والرفرف اللي ورا شمال.
المهم قلت أسأل أهل الخبرة في حل هذا الخربوش وبعد يومين من التفحيص والتمحيص والسؤال والكلام والقيل والقال
وصلت للخلاصة الآتية بدون أي تحريف من فم كل الناس اللي سألتها:
ده خربوش صغير مالوش لازمة
إوعى تروح التوكيل، حيعورك
إياك ترش الرفرف والإكصدام، سعر العربية حينزل الربع
ردها على البارد حيبقى شكلها متخبط بس أحسن من إنك ترش الرفرف
بالنسبة لجزء الصاج اللي بان سيبه عادي مش مشكلة ده حيرفع سعر العربية لما تيجي تبيعها
ممكن تعلم عليه بقلم فلومستر أو ستيكر حلو كده
كده تبقى العربية عابوها لما تيجي تبيعها
طبعا قلبت الكلام في دماغي وفهمت ليه بشوف عربيات مخبوطة وصاحبها سايبها.
عندنا مثلا في البلد سي كلاس زيرو واخدة خبطة في الباب الشمال بتاعها وصاحبها سايبها بشكلها العفش (وآسف على اللفظ) عشان تبقى عابوها لما ييجي يبعها.
فهمت ليه تلاقي عربية لانسر واخدة خربوشين كباااااااار (الخربوش بتاع عربيتي جنبه ولا حاجة) والصاج صدى من عند الخربوش وطبعا عابوها والخربوشين دول يرفعوا سعر العربية والناس تجري وراه عشان تشتري منه العربية وهو مش راضي.
فهمت ليه أفيو واخدة خبطة حلوة كده من عند العتبة اللي ورا شمال والصاج باين وصدى وصاحبها سايبها عشان تبقى عابوها.
فهمت ليه كرولا واخدة خبطة في الرفرف ومردودة على البارد وشكلها مخبط وقميء وصاحبها فخور بالشكل ده عشان تبقى عابوها.
وغيرهم كتيييييييييييييييير قوي قوي قوي
بس الغريب إني على قد ما سافرت ولفيت، ما شوفتش مبدأ عابوها العبقري ده غير عندنا في مصر.
في دبي شوفت بورش 911 موديل 2003 صابحها بيبعها بحوالي 18 ألف دولار عشان فيها خدش واصل للصاج ومصدي والعربية لازم يتعالج الخدش ده وماعندوش وقت إنه يصلحه ولازم يسافر.
شوفت في لندن عربية فشلت في إنها تنجح في إختبار السلامة اللي بيتعمل كل سنتين عشان العتب من تحت وقع من عليها الدهان نتيجة إحتكاك برصيف. (ولسه العتب ما صداش أصلا).
العربيات في كل دول العالم بتلمع كده ومافيهاش خربوش وأي خبطة أو حكة في العربية لازم تتصلح وتبقى فلة. ما عدا أم الدنيا. العربية لازم تبقى عابوها.
نيجي بقى عند التحليل وراء سبب مبدأ عابوها:
في اللي يقولك أصل الرش ما بيبقاش زي دهان الفابريكة.
وفي اللي يقولك عشان أبقى ضامن إن العربية دي ما خدتشي خبطة جامدة أثرت في الشاسيه.
وفي رأيي ده كله لا يمت لأي أساس بأي صحة
هل بفرض إن دهان الرش مش زي دهان المصنع، يبقى أسيب العربية صاجها يصدي؟؟؟ منطق عجيب
هل أقبل إني أسيب عربيتي شكلها قميء وسيء والصدا يبدأ فيها عشان يبقى واضح إن الخبطة ماكانتشي جامدة؟ منطق أعجب
في رأيي الخاص
إن موضوع عابوها ده جه من نقطتين:
أولا وجهة نظر البائع:
لما ييجي مواطن عربيته تتخبط ويلاقي إني عشان يعالجها صح محتاج مالا يقل عن 3 آلاف جنيه. وهو أساسا مقرر إنه العربية بعد سنة أو إتنين. يبقى الأوفر ليه إنه يتبع مبدأ عابوها عشان يبقى وفر تمن تصليح العربية. ماهو مش حيصرف 3 آلاف جنيه وهو عارف إنه حيبيعها مثلا بعد سنة.
ثانيا: وجهة نظر المشتري:
لما مواطن ييجي يشتري عربية ويحتاج إنه ينزل في سعرها من البائع على قد ما يقدر يقوم يتلكك بمبدأ إنها مش عابوها وينزل في سعرها زي ماهو عايز.
عندي سؤال ياريت حد فعلا يجاوبني عليه,
عربية صاحبها بيعمل لها الصيانة في التوكيل بصفة منتظمة كل 5آلاف كيلوا (مش كل 10 آلاف حتى) وحصل إنها إتخبطت من موتسيكل أو حكة بسيطة (خبطة لم تؤثر على هيكل العربية) وصاحبها ما بخلشي عليها بحاجة وراح صلحها في التوكيل برضه واتعور ( زي ما كل الناس بتقول) ودفع 3 أو 4 آلاف جنيه عشان ترجع تاني شكلها الجميل ويحافظ عليها من الصدى.
وعربية تانية صاحبها بيعمل صيانة ليها كل مايفتكر وعند الميكانيكي اللي على راس الشارع ومابيعملشي صيانة غير لما يظهر فيها مشكلة ويجيب قطع غيار أي كلام عشان يوفر فلوس في صيانتها وبرضه جه نفس الموتسيكل وخطب العربية. فصاحب العربية قرر إنه مش حيدفع طبعا 3 آلاف جنيه فراح عند عم سعيد السمكري ردها له على البارد وحط على الخربوش ستيكر (حبيبة باباها) ودفع 100 جنيه.
حد يفهمني إزاي بقى العربية التانية تنباع أغلى من العربية الأولى؟ إزاي؟ إزاي؟ حد يفهمني...
عارفين
أنا حاسس إن قصة البلد اللي أهلها من غير ودان بتنطبق علينا بالكااااااااااامل
واللي مش عارف القصة دي أشرحها سريعا
كان في بلد الملك فيها أصيب بداء عضال في الأذن إضطر الأطباء إنهم يقطعوا ودان الملك عشان يعالجوا الملك.
مع الوقت بعد قطع ودان الملك، لاحظ الملك إن الوزراء بدؤا يضحكوا عليه من تحت لتحت فأصدر مرسوم ملكي إن كل الوزراء يقطعوا ودانهم. وبالفعل تم قطع ودان الوزراء.
شوية وزوجات الوزراء بدؤوا يضحكوا على الوزراء. فقام الوزراء قطعوا ودان زوجاتهم.
شوية وزوجات الوزراء قطعوا ودان اللي شغالين معاهم في البيوت
شوية ودي بقت صفة للعظمة والبيوت رفيعة الشأن في البلد دي.
ومع الوقت بقى كل أهل البلد يقطعوا ودانهم والغريب إنهم لما كان يتولد لهم مولود كان لازم يقطعوا ودانه. والأغرب إنهم كان لما ييجي غريب من برة البلد كانوا بيتريقوا على إنه مش قاطع ودانه...
أهو أنا حاسس إننا بقينا زي البلد دي بالظبط. عشان نقنع نفسنا إننا ما نصرفشي على عربية عشان تتصلح صح، إخترعنا مبدأ عابوها وصدقناه مع الوقت وبقى هو ده الصفة السائدة على مجتمعنا. واللي يفكر غير كده يبقى غريب ونضحك عليه.
في نهاية المطاف أنا عملت اللي في دماغي ورحت توكيل هوندا وصلحت عربيتي صح.
والسلام ختام
