محتار وعاوز أراء عن تجربة .. 127 ولا 128 ولا ريتمو !!!
[justify]السلام عليكم ...
بإختصار أنا محتار فى إختيار سيارة مستعملة لإستخدامي الشخصي مش العائلي .. أنا شاب وليا خبرة كبيرة ف السواقة وغيرت عربيات كتير جداً .. بس نتيجة الظروف الإقتصادية وتعدد المسئوليات قررت أكمل الطريق بعربية متواضعة أروح بيها شغلي كل يوم ومشاويري الخفيفة ..
دلوقتي أنا محتار بين العربيات دي على إفتراض إن كلهم نفس الحالة .. يعني هنعتبر إن كلهم فابريقة دواخل وشاسيه سليم ومش محتاجين مصاريف .. :ma:
أولا : 127 .. بميل فيها للموديل 2 باب سواء كان توب أو نصر .. ولو إني بميل للنصر عشان موديل 82 وأكيد فى فرق سنين عن التوب اللى أخرها موديل 80 وبستظرف شكلها أكتر من التوب اللى باين عليها عوامل الزمن أكتر من الشكل العادي بتاع النصر .. أما لو 4 باب فأكيد هنتكلم عن السوبر فيورا ع طوووول ..
ثانياً : 128 ... بحب الشكل العادة بتاعها أكتر من المعدل وكمان العادة ايطالي مش مصري .. بس لو أجمعت الأراء على المعدل يبقى مفيش مشكلة
ثالثاً : ريتمو .. الريتمو العادية اتنين فانوس مش الريتمو ريجاتا .. سمعت إنها أنعم وأقوى من ال 127 و 128 ..
أما عن الميزانية .. مش عاوز أكسر حاجز الـ 13 ألف
ياترى السادة الخبراء ينصحوني بأيه :grinder:!!! أنا بقالي 6 شهور مش عارف أخد القرار ومش حابب أستعجل وأرجع أندم إني أتسرعت ف اختيار على حساب اختيار افضل .. انا عاوز عربية سهلة ف التحكم والصيانة وملهاش مشاكل كتير وكمان العربية تكون جرّاية لإني بحب الجري ومش عاوزها بطة وتقرفني .. وغالبا انا هكون راكبها لوحدي .. مش عاوز أرمي الفلوس ع الفاضي ف حاجة ماتستاهلش .. اما نقطة اعادة البيع مش فارقة كتير لإنه كله بيتباع ف الاخر ومفيش حاجة بتقعد .. شكرا مقدماً :36_2_46[1]:
[/justify]
