كان ياما كان وما يحلى الكلام إلا بذكر النبى عليه الصلاة والسلام واحد غلبان اللى هوه العبد
لله عايز يشترى عربيه من بنك ناصر وحكيلكو الموضوع بالتفصيل لكى تعم الفائدة ويستفيد بيها أى
حد عايزيشترى عربيه من بنك ناصر:
· أولاً: مميزات البنك:
o اقل سعر فائدة فى مصر 6% فقط.
o اقل مقدم 15% من ثمن السيارة.
o اطول فترة تقسيط حتى 90 شهراً.
o الــتأمين على السيارة اختيارى للعميل.
· ثانياً الضمانات:
o المقدم 15%:(دى الحالة بتاعتى مش عارف باقى الحالات)
§ تحويل مرتب المشترى.
§ تحويل مرتب الضامن عند الطلب.
· ثالثاً الأوراق المطلوبة:(أول زيارة)
o مفردات مرتب للشارى والضامن مختومة من جهة العمل.
o ايصال كهرباء أو مياه أو غاز للشارى والضامن.(أو ختم ورقه من جهة العمل بمحل الإقامه)
o 5 صور بطاقة شخصية للشارى والضامن.
o الرقم التأمينى للشارى.
o عرض سعر بالسيارة المطلوبة.
· ملاحظات هامة:
o الرقم التأمينى مهم جداً لأن بيتفتح حساب فى البنك للشارى بنفس الرقم.
o الرقم التأمينى للشارى ممكن يتجاب بالتليفون على ما أعتقد مش عارف رقم التليفون صراحة.
o لو معرفتش تجيب الرقم التأمينى بالتليفون لو الرقم متسجل قبل كده توجه لأقرب مكتب تأمينات اجتماعيه وهاته.
o مكتب التأمينات الإجتماعية بيشتغل من 8,30 مش شغالين السبت.
o لو الرقم مش متسجل قبل كده توجه لمكتب التأمينات الإجتماعيه طبقاً لمحل الإقامة الموجود فى الرقم القومى مفيش مكتب تانى هيرضى يسجل بياناتك.
o احضار صورة من شهادة الميلاد لإستخراج الرقم التأمينى.
o وأنا فى البنك سمعت الموظف بيقول مينفعش الضامن يكون من التربية والتعليم أو مديرية أمن القاهرة.
o يرجى احضار دوسيه بلاستيك لحفظ أوراقك فيه فى البنك.
o أنا عن نفسى كنت فى بنك ناصر فرع النصر-أقرب مكتب تأمينات خلف ميركاتو عباس العقاد بعد جامع الحق.
وهكمل الموضوع بالتفصيل ان شاء الله