النترا .. مسألة مبدأ

**mahmoud_afifi** · 11-12-2013 03:41 PM

المشاركة الأصلية كتبت بواسطة alizowail

والله يا جماعة أنا حاولت ألاقي حلول بعيد عن الكوري بس بلاقي في كل حاجة عيب وفي كل عربية مشكلة.. مابين الوكيل و توفر قطع الغيار وسعر اعادة البيع وأخيرا بقه وده الأهم استهلاك البنزين..
لإن أنا استهلاكي عالي نسبيا.. يعني الفلوانس مش حتستحمل فرك كتير..
والأمبريزة عالية اوي في استهلاك البنزين مقارنة بالكوري..
من هنا اخترت اسلم نفسي للكوري واقارن بين موديلين من نفس العربية..
وبالمناسبة يا باشا اللي بيرجح 2011 لو فيها كل التفاصيل الجميلة اللي تفضلت وذكرتها..
هو أنا بس مشفتهاش دي لحد دلوقتي.. بالكتير بلاقي نص الكلام ده في واحدة..

انا ايقنت ان البلد دي ماينفعش معاها عربيه كويسه لأن قطع غيارها هتكون غاليه مهما كانت معمره.
ولو انت عاوز عربيه للمشاوير الطويله وفي نفس الوقت مصاريف تشغيلها قليله يبقى ال2011.
انا في 4 سنين عامل 130 الف كيلو. في صيانة ال120 الف دافع 1000 بس. لو كانت عربيه تانيه مش هتقل عن 2 ونص.
بس طبعا للأمانه العربيه بتهبط من ورا مع التحميل سواء ال2011 او ال2012

**devil_storm** · 11-12-2013 07:50 PM

2012 طبعا بس خد بالك الاتنين بيتسرقوا بسهوله

**alizowail** · 12-12-2013 11:25 AM

أهو كله كوم ... وموضوع الإتنين بيتسرقوا ده كوم تاني.. يعني بغض النظر عن كل اللي اتقال..
موضوع السرقة المنتشر ده .. يعلي الضغط ويفقع المرارة ...

**yoyome** · 12-12-2013 02:39 PM

المشاركة الأصلية كتبت بواسطة alizowail

والله يا جماعة أنا حاولت ألاقي حلول بعيد عن الكوري بس بلاقي في كل حاجة عيب وفي كل عربية مشكلة.. مابين الوكيل و توفر قطع الغيار وسعر اعادة البيع وأخيرا بقه وده الأهم استهلاك البنزين..
لإن أنا استهلاكي عالي نسبيا.. يعني الفلوانس مش حتستحمل فرك كتير..
والأمبريزة عالية اوي في استهلاك البنزين مقارنة بالكوري..
من هنا اخترت اسلم نفسي للكوري واقارن بين موديلين من نفس العربية..
وبالمناسبة يا باشا اللي بيرجح 2011 لو فيها كل التفاصيل الجميلة اللي تفضلت وذكرتها..
هو أنا بس مشفتهاش دي لحد دلوقتي.. بالكتير بلاقي نص الكلام ده في واحدة..

وجالك قلب تحط الأمبريزا جنب الحاجات دية كلها !!

الأمبريزا دية بشوفها بتصعب عليا وكأنها طفل شوارع ... عربية رهيبة مظلومة ظلم الحسن والحسين في البلد العجيبة دية !!

**تامر.محمد** · 12-12-2013 03:05 PM

لو ما يهمكش التسارع يبقى فلوينس 2011 هتلاقي فيها كل حاجة و قطع غيارها احتمال تكون ارخص من الالنترا 2012
العربية اثبتت اعتمادية معقولة جدا بفضل شقها الياباني , و استهلاكها في البنزين كويس

**Angel_wolf** · 16-12-2013 07:46 AM

لو ناوى ومصمم على الالنترا يبقى الجديدة كفاية تغير الشكل وخلى بالك مش كل الاوبشن بتستخدمها يعنى لو جبت الشكل الجديد وفية Airbags &ABS يبقى تمام كدا فى شوية امان وممكن تغيرلها الكاست و بالى موجود فى الفول اوبشن

8" 2012 هيونداي إلنترا سيارة دي في دي مع راديو gps،،، ipod swc،، rds بث التلفزيون usb بلوتوث،،/، sd بطاقة

وبالتوفيق ان شاء الله

**msm32** · 18-12-2013 04:24 PM

2011 بلا تفكير من اجمل موديلات الانترا

**Samir Elshahawy** · 22-12-2013 03:05 AM

أخي الفاضل ..

110 ألف مش هايجيبوا ألنترا 2012 الا لو كانت مستعملة لأن سعر أول فئة أوتوماتيك زيرو كان ب 123,600 جنيه و الكلام ده سنة 2011 أما دلوقتي فبنتكلم في 135,000 تقريبا أو أكثر خاصة مع نزول موديل 2014 و مش الشكل الجديد كمان

مبدئيا العربيتين تقريبا واحد الالنترا MD و الالنترا HD موديل 2011 مع أختلافات بسيطة , و ممكن أعمل لك مقارنة بسيطة بينهما علشان تساعدك :

- الشكل الخارجي : الالنترا MD أفضل و لكن يعيب هذا الشكل أرتفاع أسعار قطع غياره من فوانيس و رفارف
- الشكل الداخلي : الالنترا MD أفضل كشكل و أوبشن في التابلوه
- أتساع الصالون : تقريبا العربيتين واحد مع ميزة أرتفاع السقف في المنطقة الخلفية للالنترا HD
- الارتفاع عن الارض : الأثنين واحد تقريبا
- المحرك : قدرة محرك الالنترا HD حوالي 122 حصان بينما محرك الالنترا md حوالي 128 حصان مع نفس العزم تقريبا و لكن فتيس الالنترا md أفضل من حيث توفير الوقود
- الثبات : الالنترا hd أفضل بسبب وجود نظام التعليق الخلفي المعتمد علي تعدد الوصلات multi-links أما الالنترا md فتعتمد علي نظام torsion beam الامر الذي يقلل من ثباتها في الملفات مع وجود فواصل قليلا أو يشعرك بذلك

دي كده مقارنة سريعة بين العربيتين
طبعا لو الالنترا hd الخليجي متوفرة و باوبشن ووسائل أمان و بسعر 110 ألف يبقي توكل علي الله و هاتها

اما أي حاجة خارج العربيتين دول مش هاتلاقي بالسعر ده تقريبا حاجة كويسة و مضمونة
- الفورد : قطع غيار نار و قد تكون غير متوافرة و سعر اعادة بيع متدني ده لو عرفت تبيعها
- الفلوينس : عربية كويسة لكن مش ممتعة الصراحة
- السوبارو : عربية ممتازة و لاغبار عليها لكن لا أظن أنها هاتكون بالسعر ده

طبعا و أنت بتشتري عربية سيبك من موضوع التسارع و السرعة لأن الشوارع و الطرق و الحمد لله واقفة و لو عرفت تجيب 60 كم/س يبقي كويس و بذلك كل المواتير بتتساوي و مش هاتعرف تجيب حتي سرعة الكراش تست و يبقي بترمي فلوس في الهوا علشان حاجة مش هاتتحقق في البلد دي

يبقي دور علي توافر قطع الغيار و سعر اعادة البيع في بلد العربيات ماشية فيها بسرعة السلحفاة و معرضة أنها تتخبط من أي توكتوك أو واحد مش فاهم كل شوية