عرض للطباعة
سؤال محير ناس كتير و أعتقد إن اجابته الوافية عندكوا..
أدفع 110 ألف وأجيب النترا 2011 هاي لاين خليجي فيها كل الحركات والكماليات بس الشكل القديم..
ولا اتقل 10 كمان على ال 110 دوول واجيب النترا 2012 اوتوماتيك أول فئة بس الشكل الجديد..
يا ريت تاخدوا في الإعتبار كل الفروق من حيث الشكل والمضمون والكماليات وقطع الغيار والثبات و سعر اعادة البيع وكل ما هو غير ذلك..
طبعا مستني ردودكم الوافية ويسعدني جدا كمان اللي حلاقي فيها حلول تانية أصلا.. فلوانس وفوكاس وسيراتو وغيرهم...
هو انا شخصيا بفضل الشكل القدييم من حيث الشكل الخارجي
ولكن الشكل الجديد من جوة والطابلوه والعدادات والصالون شييك جدا جدا وافضل من القدييييم
بس انا لو مكانك في الاخر هجيب الشكل القدييم عشان اكوون معياي وسائل امان وجنوط وفتحة سقف وتكيف تتش .....الخ
اما بقي من خارج الاختياريين ددول ودة حسب دماغ وتفكيير الي بيشتري ف انا وش هجييب بي ام دابليو الفئة الخامسة موديل 2000:2001 او الفئة التالتة نفس المودييل
لو الHD اعلى فئه فيها abs هجيبها وش من غير تفكير
شوف فلوانس او فوكاس او سوبارو انضف و احسن و اثبت
اشمعنى النترا؟
هو من رأيي لو لازم النترا يبقى الشكل الموجود دلوقتي احسن بس طبعا ف حالة انك تقدر علي مصاريفه
وبالنسبالي بال110 الف هركب حاجه ألماني
اوبل فيكترا سي
فولكس جيتا
سكودا ايه 5
بي ام فئه خامسه موديل 2002
بي ام فئه تالته 2002
الشكلين بتوع الانترا زي بعض في الأداء لكن طبعا الجديدة شكلها برقبة القديمة من جوه و بره و أنا مش شايف أي مبرر أنك تجيب القديمة غير القدرة المادية أو قطع الغيار اللي هي طبعا أرخص في القديم. علي فكرة أنا كان معايا الاتنين.
اكيد هات الجديدة هى احسن فى كل حاجة
وجهة نظر شخصيه
الجديده أحسن من القديمه فى الشكل الداخلى والخارجى - وقوة موتور تزيد 10% عن القديمه تقريبا
القديمه لو خليجى وفيها كل اللعب وشاشه تاتش وتكييف تاتش وفرامل ABS وجنوط ومرايات اشاره - واوتوستوب خلفى - وفتحة سقف (وأن كنت مش بحبها) ومداخل Ipod + Aux والعربيه تبقى فابريكه بره وجوه وحالتها فعلا كسر زيرو وطبعا مش هاننسى قطع الغيار المتوفره بهبل لأنها صوره طبق الاصل من سيراتو 2009 - 2012 - اعادة بيعاها الرائع اللى فعلا احسن بنسبه طفيفه من ال 2012 - توافر قطع الغيار الاستيراد بتاعتها جداااااااااااااااااااا - سهولة عمل اى حاجه فى سمكرتها (لا قدر الله) ----------- يبقى ابقى مجنون لو سيبت العربيه ديه وروحت ل 2012 (انا بتكلم على نفسى مش اسقاط على اى حد)
السوبارو برقبه الاتنين وشوف برده الفلوانس لو كان الاستهلاك بتاعك خفيف
والله يا جماعة أنا حاولت ألاقي حلول بعيد عن الكوري بس بلاقي في كل حاجة عيب وفي كل عربية مشكلة.. مابين الوكيل و توفر قطع الغيار وسعر اعادة البيع وأخيرا بقه وده الأهم استهلاك البنزين..
لإن أنا استهلاكي عالي نسبيا.. يعني الفلوانس مش حتستحمل فرك كتير..
والأمبريزة عالية اوي في استهلاك البنزين مقارنة بالكوري..
من هنا اخترت اسلم نفسي للكوري واقارن بين موديلين من نفس العربية..
وبالمناسبة يا باشا اللي بيرجح 2011 لو فيها كل التفاصيل الجميلة اللي تفضلت وذكرتها..
هو أنا بس مشفتهاش دي لحد دلوقتي.. بالكتير بلاقي نص الكلام ده في واحدة..
انا ايقنت ان البلد دي ماينفعش معاها عربيه كويسه لأن قطع غيارها هتكون غاليه مهما كانت معمره.اقتباس:
المشاركة الأصلية كتبت بواسطة alizowail
ولو انت عاوز عربيه للمشاوير الطويله وفي نفس الوقت مصاريف تشغيلها قليله يبقى ال2011.
انا في 4 سنين عامل 130 الف كيلو. في صيانة ال120 الف دافع 1000 بس. لو كانت عربيه تانيه مش هتقل عن 2 ونص.
بس طبعا للأمانه العربيه بتهبط من ورا مع التحميل سواء ال2011 او ال2012
-ال 2012 طبعا كفاية الموتور d-cvvt
2012 طبعا بس خد بالك الاتنين بيتسرقوا بسهوله
أهو كله كوم ... وموضوع الإتنين بيتسرقوا ده كوم تاني.. يعني بغض النظر عن كل اللي اتقال..
موضوع السرقة المنتشر ده .. يعلي الضغط ويفقع المرارة ...
وجالك قلب تحط الأمبريزا جنب الحاجات دية كلها !!اقتباس:
المشاركة الأصلية كتبت بواسطة alizowail
الأمبريزا دية بشوفها بتصعب عليا وكأنها طفل شوارع ... عربية رهيبة مظلومة ظلم الحسن والحسين في البلد العجيبة دية !!
لو ما يهمكش التسارع يبقى فلوينس 2011 هتلاقي فيها كل حاجة و قطع غيارها احتمال تكون ارخص من الالنترا 2012
العربية اثبتت اعتمادية معقولة جدا بفضل شقها الياباني , و استهلاكها في البنزين كويس
طب ما تفكر فسيفيك
لو ناوى ومصمم على الالنترا يبقى الجديدة كفاية تغير الشكل وخلى بالك مش كل الاوبشن بتستخدمها يعنى لو جبت الشكل الجديد وفية Airbags &ABS يبقى تمام كدا فى شوية امان وممكن تغيرلها الكاست و بالى موجود فى الفول اوبشن
8" 2012 هيونداي إلنترا سيارة دي في دي مع راديو gps،،، ipod swc،، rds بث التلفزيون usb بلوتوث،،/، sd بطاقة
وبالتوفيق ان شاء الله
2011 بلا تفكير من اجمل موديلات الانترا
أخي الفاضل ..
110 ألف مش هايجيبوا ألنترا 2012 الا لو كانت مستعملة لأن سعر أول فئة أوتوماتيك زيرو كان ب 123,600 جنيه و الكلام ده سنة 2011 أما دلوقتي فبنتكلم في 135,000 تقريبا أو أكثر خاصة مع نزول موديل 2014 و مش الشكل الجديد كمان
مبدئيا العربيتين تقريبا واحد الالنترا MD و الالنترا HD موديل 2011 مع أختلافات بسيطة , و ممكن أعمل لك مقارنة بسيطة بينهما علشان تساعدك :
- الشكل الخارجي : الالنترا MD أفضل و لكن يعيب هذا الشكل أرتفاع أسعار قطع غياره من فوانيس و رفارف
- الشكل الداخلي : الالنترا MD أفضل كشكل و أوبشن في التابلوه
- أتساع الصالون : تقريبا العربيتين واحد مع ميزة أرتفاع السقف في المنطقة الخلفية للالنترا HD
- الارتفاع عن الارض : الأثنين واحد تقريبا
- المحرك : قدرة محرك الالنترا HD حوالي 122 حصان بينما محرك الالنترا md حوالي 128 حصان مع نفس العزم تقريبا و لكن فتيس الالنترا md أفضل من حيث توفير الوقود
- الثبات : الالنترا hd أفضل بسبب وجود نظام التعليق الخلفي المعتمد علي تعدد الوصلات multi-links أما الالنترا md فتعتمد علي نظام torsion beam الامر الذي يقلل من ثباتها في الملفات مع وجود فواصل قليلا أو يشعرك بذلك
دي كده مقارنة سريعة بين العربيتين
طبعا لو الالنترا hd الخليجي متوفرة و باوبشن ووسائل أمان و بسعر 110 ألف يبقي توكل علي الله و هاتها
اما أي حاجة خارج العربيتين دول مش هاتلاقي بالسعر ده تقريبا حاجة كويسة و مضمونة
- الفورد : قطع غيار نار و قد تكون غير متوافرة و سعر اعادة بيع متدني ده لو عرفت تبيعها
- الفلوينس : عربية كويسة لكن مش ممتعة الصراحة
- السوبارو : عربية ممتازة و لاغبار عليها لكن لا أظن أنها هاتكون بالسعر ده
طبعا و أنت بتشتري عربية سيبك من موضوع التسارع و السرعة لأن الشوارع و الطرق و الحمد لله واقفة و لو عرفت تجيب 60 كم/س يبقي كويس و بذلك كل المواتير بتتساوي و مش هاتعرف تجيب حتي سرعة الكراش تست و يبقي بترمي فلوس في الهوا علشان حاجة مش هاتتحقق في البلد دي
يبقي دور علي توافر قطع الغيار و سعر اعادة البيع في بلد العربيات ماشية فيها بسرعة السلحفاة و معرضة أنها تتخبط من أي توكتوك أو واحد مش فاهم كل شوية
في مثل انجليزي عملي جدا go for more options.
Sent from my GT-N7100 using Forum Runner
فى مثل مصرى بيقولك متشتريش حاجه ممكن تتسرق فى ثانيه