محتار جدا بين الياريس الجديدة 2014 و بيجو 301 هاي لاين

الياريس 2014 الفئة 140 الف
الشكل الخارجى شايفه احسن
و برضه من جوه اجمل بكتير من البيجو و التقفيل انضف بمراحل و العدادات برضه شكلها شبابى اكتر
متقفله فى تايلاند صحيح بس يابانى برضه
الوسع الداخلى و الشنطة تقريبا زى البيجو وسعهم جيد جدا
بس ممكن متنتشرش و فى الحالة دى هتعب فى صيانتها فى المستقبل و بيعها بعد كدة هيخسر اكتر
و مش عارفين اخبار ثباتها ايه خاصة ان القديمة فى اختلاف عليها فى موضوع الثبات

البيجو الهاى لاين 136
فيها اوبشنز ازيد ( فوجات - بلوتوث - جنوط 16 - ....... ) لكن ممكن اركب اللى انا محتاجه من الاوبشنز بالنسبه للياريس فى التوكيل
الموتور اقوى علشان دى 1600 مش عارف هل الفرق محسوس قوى بينه و بين 1300 للدرجة دى
بدات تنتشر شويه

حاجة تحير

check this thread...

http://www.nilemotors.net/Nile/393773-2014-301-a.html

صديقي المواطن
قولا واحدا أنا دايما بنصح الناس اللي بتركب عربيات في مصر لو مكانش دخلك اليومي صافي من 1500 إلى 2500 جنيه بحيث تصل مرحلة من الرخاء والتشبع بحيث إنك متفكرش في حاجة إسمها سعر إعادة البيع وخد اللي يعجبك من العربيات مش اللي ماشي في السوق ولكن بما إن حضرتك على باب الله والرزق محدود ولكنك مرتاح بفضل الله ولكن يهمك عدم الخسارة في إعادة البيع فتاخد السيارة اللي دارجة في السوق والتي الناس مقبلة عليها وبتحقق إنتشار ومبيعات أكثر وأنا من غير منطلع إحصائيات ونسأل الشركتين ولكني متأكد أن كل 35 بيجو 301 تباع شركة تويوتا حتبيع واحدة ياريس ثم قولا واحدا الياريس ليست أفضل من بيجو 301 وعلى صعد كثيرة لذلك خليك في البيجو أفضل وأأمن وأستر وأوسع إنتشارا وأسرع بيعا واقله خسائرا واﻷسهل مستقبلا لتوافر قطع الغيار واﻹصلاح خارج التوكيل
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

راي الشخصي
البيجو أفضل من الياريس عشان الماتور أقوي طبعاً (وأن كنت أنا مشتريهاش لا هي ولا الياريس لسبب ممكن يكون عند ناس كتير هايف بس بالنسبه ليا أساسيات لا غنى عنها هو عدم وجود مؤشر حراره في الأتنين عارف أن ناس كتير ممكن تقول ده مجنون بس أنا بقى قفلت معايا على كده)

رأي الشخصي بالنسبه للرنج ده بيجو 301 (ده لو أنت معندكش هسهس مؤشر الحراره اللي عندي)
لو طلعت زي حالاتي بقى يبقى مفيش غير الشارك (ياباني 100%) يا أما هيونداي rb عشان تاخد اوبشنز أعلى وبالتوفيق

البيجو افضل

البيجو أفضل في كل شيء .. الياريس قوة موتور من 10 سنين فاتت .. تويوتا تعتمد في الياريس هذه على اسمها فقط !!

الميزة الرئيسيه في إلياريس هي الإعتماديه الغير عادية ....
ومع ذلك مش هاجيبها وهفضل البيجو لو أنا بختار بينهم ، كفاية فرق المواتير ...

ياريس

بيجو افضل فى التقفيل و السعر مع الاوبشنز

انا كنت في نفس الحيرة دي الشهر الي فات و دي كانت نتيجة المقارنة:
- البيجو 301 افضل من الياريس في:
1- في السعر بفارق 4000
2 - الموتور (فارق 30 حصان بحالهم!!)
3- الكماليات طبعا (الجنوط السبور لوحدها ب12 ألف جنيه في الياريس ده غير التكييف التاتش و سنسور الركن و ألخ)
4- الثبات بسبب ان الجنوط اكبر و الثبات الاوروبي المعروف
5- التقفيل لانها تقفيل اسباني كامل عكس الياريس الي تقفيل اسيوي بخامات اقل
6- الأنتشار اضعاف الياريس و ده هيؤثر بشدة في اعادة البيع و سمعة العربية و توافر قطع الغيار
7- سعر قطع الغيار اقل شوية من الياريس

- الياريس افضل من البيجو في:
1- التوكيل محترم اكتر من البيجو و انا اتعاملت معاهم شخصيا
2- استهلاك الوقود افضل

المقارنة طبعا لصالح البيجو بمراحل

شوف انت محتاج اية من العربية الاتنين حيتباعو اكيد ومتحكمش على التيوتا ياريس من دلوقتى لان السوق نايم فعلاً والعربية لسة نازلة وفى نفس الوقت منقدرش نغفل ان سعرها قريب من فئات اعلى ودة حيأثر على مبيعات السيارة

ارشحلك تجيب بيجو لانها اقل سعراً وبتحقق القيمة مقابل المال فى الوقت الحالى .. ولو فارق معاك اوى موضوع سعر اعادة البيع اتجة للكيا ريو ويليها هيونداى اكسينت .

بيجو 301

اقتباس:

---

المشاركة الأصلية كتبت بواسطة raad13

انا كنت في نفس الحيرة دي الشهر الي فات و دي كانت نتيجة المقارنة:
- البيجو 301 افضل من الياريس في:
1- في السعر بفارق 4000
2 - الموتور (فارق 30 حصان بحالهم!!)
3- الكماليات طبعا (الجنوط السبور لوحدها ب12 ألف جنيه في الياريس ده غير التكييف التاتش و سنسور الركن و ألخ)
4- الثبات بسبب ان الجنوط اكبر و الثبات الاوروبي المعروف
5- التقفيل لانها تقفيل اسباني كامل عكس الياريس الي تقفيل اسيوي بخامات اقل
6- الأنتشار اضعاف الياريس و ده هيؤثر بشدة في اعادة البيع و سمعة العربية و توافر قطع الغيار
7- سعر قطع الغيار اقل شوية من الياريس

- الياريس افضل من البيجو في:
1- التوكيل محترم اكتر من البيجو و انا اتعاملت معاهم شخصيا
2- استهلاك الوقود افضل

المقارنة طبعا لصالح البيجو بمراحل

---

تحليل منطقي، ومقنع!

اولا : بالنسبة للشكل الياريس افضل بكتير من جوة و برة ... البيجو 301 تصميمها بدائي جدا
ثانيا : سعر اعادة البيع الياريس افضل طبعا ... و اللي دخل سوق المستعمل هيعرف ان البيجو عموما سوقها في المستعمل واقع ..
ثالثا : قطع الغيار من حيث السعر و التواجد ف الياريس افضل لان البيجو عموما قطع غيارها مش متوفرة غير في التوكيل ( ليا صاحبي كان معاه بيجو 307 فضل راكنها شهرين علشان قطعة غيار مش لاقيها ... )
رابعا : توكيل تويوتا افضل من توكيل بيجو
خامسا : موتور الياريس مش ضعيبف خالص و موفر في البنزين ..
سادسا : الثبات لسة محدش يقدر يحكم عليه دلوقتي ( و مش اي عربية اوروبي تبقي ثباتها عالي )

اقتباس:

---

المشاركة الأصلية كتبت بواسطة matrix_2010

ا
خامسا : موتور الياريس مش ضعيبف خالص ..

---

الكلام دة علي أي أساس ...

اقتباس:

---

المشاركة الأصلية كتبت بواسطة Anxs111

الكلام دة علي أي أساس ...

---

علي اساس اني معايا سكودا اوكتافيا 1600 cc و مش حاسس بفرق خالص بين موتورها و بين موتور الياريس ...

الأوكتافيا كام حصان ، تقريبا ١٠٥ ....وأخبار وزنها إيه ....
البيجو ٣٠١ لو بنفس وزن الأكتافيا ونفس والهورس باور ساعتها يبقي كلامك صاح ....
دة غير إن علي كدة لو هانحكم علي اليارس مقارنة بالفيرنا هتكون الياريس سلحفة السنين ...

أنا رأيي أن الياريس أدخلت نفسها في فئة سعرية ليست من حقها على الإطلاق وأعادتنا لزمن ال 80 حصان في زمن نستطيع فيه الحصول على 105 حصان ( بالإضافة إلى عزم 175 ) من محرك 1200 سي سي ( أقصد موتور السيات ليون طبعا وعلى سبيل المثال فقط لا غير ) .
وبالتالي فليشتر الواحد ليون ب 160 ألف حتى ولو كانت أول فئة ولا يشتر ياريس ب 165 ألف حتى ولو كانت أعلى فئة.
والله أعلم.

اقتباس:

---

المشاركة الأصلية كتبت بواسطة anxs111

الأوكتافيا كام حصان ، تقريبا ١٠٥ ....وأخبار وزنها إيه ....
البيجو ٣٠١ لو بنفس وزن الأكتافيا ونفس والهورس باور ساعتها يبقي كلامك صاح ....
دة غير إن علي كدة لو هانحكم علي اليارس مقارنة بالفيرنا هتكون الياريس سلحفة السنين ...

---

ايه اللي دخل بيجو 301 في الموضوع انا بقول الياريس 1300 cc مفرقتش كتير عن الاوكتافيا 1600 cc
وبعدين لو عكسناها و افترضنا ان البيجو 301 بموتور 1300 cc ساعتها بقي هتحس بالفرق

اقتباس:

---

المشاركة الأصلية كتبت بواسطة ahmzd

أنا رأيي أن الياريس أدخلت نفسها في فئة سعرية ليست من حقها على الإطلاق وأعادتنا لزمن ال 80 حصان في زمن نستطيع فيه الحصول على 105 حصان ( بالإضافة إلى عزم 175 ) من محرك 1200 سي سي ( أقصد موتور السيات ليون طبعا وعلى سبيل المثال فقط لا غير ) .
وبالتالي فليشتر الواحد ليون ب 160 ألف حتى ولو كانت أول فئة ولا يشتر ياريس ب 165 ألف حتى ولو كانت أعلى فئة.
والله أعلم.

---

كلامك مظبوط لو 160 الف مش هجيب الياريس هجيب عربية تانية بس انا بتكلم في 140 الف اول فئة اوتوماتيك المبلغ ده ميجبلكش غير عربيات صيني او كوري و انا عندي تحفظ عليهم

باشا البيجو 301 مكتوبة في العنوان بتاع الموضوع فلما تقارن سرعات بنتكلم عن 301 مع ياريس ...
اللي دخلت الموضوع غلط هي الأكتافيا ...
أما البيجو ١٣٠٠ سي سي دي مش لاقيلها وصف مناسب ...

بيجو 301 طبعا

بيجو 301 بدون منازع