الموضوع: أي حد عنده استفسار عن تصميم المواقع أو التسويق الإلكتروني أنا في الخدمة

المشاركة الأصلية كتبت بواسطة matrix_it

تمام انا فاضلى css3 و html5 و هدخل على دريم ويفر :) و شكرا لحضرتك جزيلا :)

بالتوفيق يا باشا وأي استفسار تاني أنا معاك

المشاركة الأصلية كتبت بواسطة محمد فرج

السلام عليكم

اولا بشكر حضرتك على كرم اخلاقك وموضوعك الجميل

انا كنت بجهز لعمل موقع اخباري لاخبار الفضائيات والنجوم " قريب كدة لموقع فى الفن " ..

واشتريت دومين مدفوع ... مش عارف ينفع اذكرة هنا ولا لا .. عامتنا اشتريتة وجبت قالب ورد برس اخباري كويس هو مشهور لانة مدفوع بس انا عرفت اجيبة مجاني واسمة sahifa v3.0.1

لو ليك اي ملاحظات على كلامي فوق اتمنى تقولهالي

وصاحبي مهندس كمبيوتر عندة سيرفر .. هرفع عليه الموقع استفساري لحضرتك عن حاجتين الاولى
انا ناوي بعد شهر من انطلاق الموقع وبعد ما املية محتوى خصوصا ان هيكون فى جزء من قليل حصريات مش نقل كوبي وبست لان انا صحفي وجايب معايا مجموعة اصاحبي ودة مجال شغلنا

اني هعمل حساب جوجل ادسنس فهل هنواجة صعوبة فى الموافقة على الحساب ولا لا ؟

ثاني استفسار عن حساب الادسندس نفسة .. لو تقريبا فى الاول يدخلنا منة كام انا عارف انة بحسب الزوار لكن لو قلنا فى اول شهر من تركيبة متوسط الزوار شهريا 1000 تقريبا يدخلي كام

لان انا محتاج 3 الاف شهري من بعد 3 شهور من انشاء الموقع علشان ادفع مرتبات فهل دة هيكون سهل ولا لا ؟

وايه افضل وسائل الاشهار المدفوعة

وعليكم السلام ورحمة الله وبركاته
أخي الكريم محمد
بخصوص الجزئية الأولى فرديت عليك بخصوصها في رد على رسالتك الخاصة
ثانيا بخصوص أدسنس فجوجل مشددة جدا على إنشاء أي حسابات مصرية منذ فترة بسبب سوء الاستغلال لكن حضرتك ممكن تجرب وتحاول مش هتخسر حاجة
أما بخصوص الأرباح فدي مش بإيد أي حد ولا حد يقدر يقدرهالك لأنها متوقفة على موقعك نفسه وانتشاره ومصدر الزوار وعددهم وأماكن الإعلانات وعوامل تانية كتير
بس بصفة عامة لو الموقع تخصصه مصري فلو عرفت تقدر عدد الزوار اليومي ساعتها ممكن تقدر أرباحك بشكل تقريبي لأن الأرباح في مصر ومعظم البلاد العربية متدنية وتتراوح ما بين 2 إلى 4 سنت يعني حوالي 14 : 28 قرش للنقرة الواحدة ، ومتوسط نسبة عدد النقرات مقابل عدد الزوار بيكون في حدود من 5 - 10 % على أقصى تقدير
مثال: لو افترضنا إن موقعك بيدخله 10 آلاف زائر شهريا ، يبقى ممكن تطلع من ال10 آلاف دول متوسط 750 زائر هيضغط على الإعلانات هتضرب العدد في متوسط 3 سنت = 22.5 دولار يعني حوالي 155 جنيه مصري !
طبعا المبلغ قليل لأن عدد الزوار أولا قليل ثانيا سعر النقرة في مصر زي ما قلتلك قليلة لأن المعلنين بيدفعوا قليل برده لكن لو قدرت إنك توسع نشاطك وتكبر عدد الزوار وكذلك توسع دائرة اهتمام موقعك من موقع مصري فقط إلى موقع عالمي ساعتها هتحس بفرق كبير في متوسط سعر النقرة الواحدة زائد إجمالي عدد الزوار وبالتالي إجمالي الأرباح المتوقعة
آخر حاجة أفضل وسائل الإشهار المدفوعة هي جوجل أدوردز ثم الفيس بوك لكن دي بتبقى لمواقع الغرض منها الترويج لمنتجات معينة زي العقارات أو الأجهزة المنزلية أو الإلكترونية ... إلخ دول بس اللي مفروض بيصرفوا علشان بيستفيدوا من الزائر اللي بيدخلهم يعني لو صرفوا إعلانات شهريا 10 آلاف جنيه مثلا ممكن يكسبوا من وراها صافي أرباح مبيعات لا تقل عن 100 ألف جنيه مثلا
أما موقع إخباري وتصرف عليه ! فهتخسر لأنك لو هتعتمد على أدسنس كأرباح يبقى انت هتصرف أكتر ما هتاخد بكتير وهتبقى مضطر إنك تصرف كل شهر علشان تقدر تجيب زوار باستمرار وبالتالي لو بطلت تصرف غالبا عدد الزوار هيتوقف إلا من نسبة بسيطة هي من زوار دخلوا مرة وتابعوا الموقع باستمرار والنسبة دي بتختلف حسب مدى فائدة موقعك ونشاطه اللي يخلي زائر يدخلك مرة يبقى عايز يدخل بصفة مستمرة بدون ما يشوف إعلانك تاني زي نايل موتورز كده مثلا :)
طيب إيه الحل ؟ الحل أولا إنك تعتمد على وسائل الإشهار المجانية المعروفة زي صفحات وجروبات الفيس بوك والمنتديات وخلافه
ثانيا إنك تصرف الفلوس اللي مفروض هتصرفها على حملاتك الإعلانية المدفوعة على إشهار الموقع نفسه وتحسين ظهوره في نتائج بحث جوجل وهو ما يطلق عليه SEO يعني Search Engine Optimization
مثال: لو موقعك تخصص عقارات مثلا يبقى تحاول تحسنه بحيث لو حد بحث في جوجل عن كلمة "شقق للبيع" أو ما شابه من الكلمات الدلالية موقعك يبقى فرصة ظهوره في النتائج ال10 الأولى أكبر من غيره وده موضوع مش سهل أبدا وهيحتاج وقت جامد وتكلفة كبيرة وناس متخصصة بتفهم وغالبا صعب تلاقي حد بيفهم في الكلام ده في مصر هو في طبعا بس قليل جدا وصعب تلاقيهم وسط الزخم والزحمة بتاعة شركات التسويق الإلكتروني وإشهار المواقع اللي في مصر دلوقتي وبرده لو لقيتهم هتلاقي أسعارهم فلكية ومتنخدعش بالأسعار القليلة لأن معظمهم شوية هواة ومش هيعرفوا يعملوا حاجة وهتضيع وقتك وفلوسك على الفاضي ده إن متسببوش أصلا إن موقعك يتعمله حظر من الظهور في جوجل نهائيا ! بسبب استخدامهم لطرق غير مشروعة في رفع ترتيب موقعك وهو ما يسمى بـ Black Hat SEO واللي جوجل حاظره ولو اكتشف موقع بيعمله بيعاقبه ويمنعه من الظهور فانتبه للنقطة دي

المشاركة الأصلية كتبت بواسطة محمد فرج

انت حطمتني بعد ما كنت متفائل !! وسمعت عن تجارب اصدقاء مبشرة :) :) :)

بس عامتنا احنا متوقعين عدد زوار كبير لان عندنا محتوى حصري خاصة اننا صحفيين ودة مجالنا زي ما قلت لحضرتك .. غير كدة هيكون عندنا بيدج على الفيس وهنعمل لها فى الاول اعلان ممول

أنا مش عايزك تتحطم
أنا عايزك تواجه الواقع الفعلي علشان متحلمش كتير وفجأة تلاقي حلمك أصبح كابوس بعد ما صرفت عليه وقتك وجهدك ومالك
بس طالما عندك حصريات وهتعمل موقع مفيد وجديد يبقى إن شاء الله هتجيب زوار كتير وهتظهر في نتائج البحث الأولى مع بعض الاجتهاد والتسويق والدعاية
وفكرة كويسة إنك تصرف على صفحة الفيس بوك لأنك هتكسب معجبين بالصفحة هيستمروا معاك بشرط الصفحة برده تكون مفيدة وغير مملة
وبرده هنصحك سيبك من اللي يقولك هجيبلك 1000 معجب ب100 جنيه والكلام الهجص ده لأن كل دي اشتغالات والمعجبين دول وهميين وغير متفاعلين وفي صفحات تلاقي عدد المعجبين بيتجاوز ال100 ألف ولما بينزل بوست مش بياخد غير لايك أو اتنين بالكتير !!
وبخصوص أدسنس فمتستعجلش عليه انت ظبط موقعك الأول واشهره وبعدين قدم على أدسنس
وأي استفسار تاني أنا تحت أمرك .. بالتوفيق

المشاركة الأصلية كتبت بواسطة matrix_it

طيب معلش لوواحد عايز يبقى دة مصدر رزقه يشتعلم تصميم مواقع ولا seo ??
و ايه المطلوب على hire freelancers & find freelance jobs online - freelancer.com و www.odesk.com
و شكراا جزيلا

التصميم والسيو متلازمين ومطلوبين فحاول تتعلم الاتنين على الأقل تاخد الأساسيات وبعد كده لو عايز تتخصص في حاجة معينة منهم هتبقى عرفت إيه أكتر حاجة انت ميال لها واتخصص فيها لكن كقاعدة عامة لازم تكون بتفهم في التصميم علشان تشتغل سيو ولازم تكون بتفهم في السيو علشان تشتغل مصمم
والمطلوب في الموقعين دول إن يكون عندك خبرة كويسة في الحاجة اللي هتقدم عليها علشان تعملها لأن بيبقى في منافسة جامدة من ناس محترفين ولازم تكون أد المسئولية لأنك برده بتبقى ملزم بشروط لقبول المهمة ومنها التسليم في الموعد المحدد وطبقا للمواصفات المحددة ولو أخليت باتفاقك أعتقد ممكن يكون في عقوبات أو حظر مش متأكد لأني بصراحة متعاملتش معاهم لحد دلوقتي لكن ليا صديق كان شغال معاهم وقالي كلام زي كده