الموضوع: أي حد عنده استفسار عن تصميم المواقع أو التسويق الإلكتروني أنا في الخدمة

المشاركة الأصلية كتبت بواسطة محمد يوسف

جزاك الله خيرا يا أبو أسر..الحقيقة أنا نفسى أشتغل من المنزل لزيادة الدخل عن طريق الكمبيوتر بس حكاية تسويق منتجات وانك تجيب ناس وتاخد عليهم عمولة والكلام ده باحس انها نصب وحرام .. عايز حاجة تكون بتعمل شغل وبتاخد عليه مقابل ..كذلك باقلق من حكاية انشاء حساب على الباى بال والكلام ده خوفا من اختراق الخصوصية واستغلال بياناتى الشخصية.... تنصحنى بايه ؟

آمين وإياك أخي محمد
سيبك من موضوع العمولات على تسويق المنتجات زي كيو نت والكلام ده لأن في شبهة جامدة بل توجد فتاوى صريحة بأنه حرام شرعا لأنه استغلال ونصب
توجد طريقتين لزيادة الدخل من المنزل عن طريق الإنترنت
الأولى إن حضرتك تعمل حساب في خدمة جوجل أدسنس وهي خدمة تتيح ليك إنك تضع إعلانات جوجل اللي بتتكعبل فيها طول ما انت بتتصفح مواقع النت عن طريق كود بتعمله من الحساب وتحطه في موقعك وتبدأ تروج لموقعك ده عن طريق عمل مواضيع مفيدة وحصرية ونشرها عن طريق وسائل الترويج المختلفة زي عمل صفحة على الفيس بوك مثلا أو التعليقات على المواقع والمدونات أو عمل مواضيع في المنتديات ... إلخ لكن الموضوع ده محتاج إن حضرتك تكون ملم على الأقل بالحد الأدنى من تصميم المواقع ومن وسائل الترويج والتسويق الإلكتروني ودي بتحتاج وقت وصبر ودراسة وأخذ كورسات ومتابعة شروحات وكل الكلام ده متوفر على الإنترنت ومجاني لكن زي ما قلتلك محتاج صبر وطولة بال زائد حب للمجال علشان تقدر تواصل وتصبر على النتيجة
لو حضرتك ألميت بالكلام ده يبقى مش فاضل غير إنك تقدم طلب لجوجل علشان تعمل حساب أدسنس وده حاليا أصبح شبه مستحيل في مصر بسبب سوء استغلال المصريين للخدمة ومحاولة التحايل عليها عن طريق جلب أرباح بطرق الغش والخداع والاحتيال فأصبح موضوع قبول جوجل لحسابات أدسنس مصرية جديدة أمر شبه مستحيل إلا لو حضرتك عندك موقع فريد من نوعه ومليء بما يفيد المستخدمين وليس مجرد كوبي وبيست من مواقع أخرى كما هو الحال في أكثر من 90% من المواقع المصرية بل والعربية عموما
هتقولي إنت بتعقد الأمور ليه أكيد في حل ! أقولك في نص حل مش حل كامل وهو إنك تقدم على حساب اسمه حساب مستضاف وده بيكون عبارة عن إن يكون ليك مدونة تبع جوجل "بلوجر" ودي أي حد سهل يعملها ومش محتاجة كتير خبرة في مجال التصميم عموما وتقدم على حساب مستضاف وده معناه إنه حساب غير كامل لأنه بيبقى مقتصر على وضع الأكواد في مدونتك على البلوجر فقط زائد إنك ممكن تعمل قناة على اليوتيوب وترفع فيديوهات لازم تكون حصرية برده مش مسروقة أو منتهك حقوقها وتفعل أوبشن monetized علشان يوتيوب يعرض الإعلانات على الفيديوهات
بالإضافة إلى إنك ممكن تستغني عن جوجل خالص وتشترك في مواقع تسمى affiliate وهي عبارة عن أكواد برده بتاخدها من المواقع دي وتحطها في موقعك علشان يعرضوا بضاعتهم أو خدمتهم عندك على موقعك مقابل نسبة من كل عملية بيع تمت عن طريق موقعك وفي مواقع كتير شهيرة في الموضوع ده من أشهرها أمازون مثلا أو بيت دوت كوم أو Commission Junction وغيرهم
الطريقة التانية إنك تعمل متجر إلكتروني وده ممكن تستعين بمصمم يعملهولك وانت تديره بس والإدارة بتبقى سهلة من خلال لوحة تحكم مبسطة وتبدأ تجيب بضاعة من أي نوع وتعرضها وتسوقلها زي مثلا نضارات هاي كوبي أو ساعات أو اكسسوارات حريمي أو أدوات منزلية خفيفة أو أي شيء بتفهم فيه

آخر حاجة موضوع الباي بال ، الباي بال معمول أساسا لحفظ الحسابات وحمايتها من السرقة لأن لو معاك فيزا كارد أو ماستر كارد بتشتري بيها من النت انت معرض ان بيانات الفيزا تتسرق منك لو أدخلتها في موقع غير موثوق أو موقع ممكن حد يخترقه ويسرق الفيزا اللي متسجلة عليه أما الباي بال فمعمول علشان تقدر تتعامل على المواقع بدون ما تدخل أي أرقام للفيزا انت مجرد بتدخل إيميلك المربوط بالباي بال وهو بيسحب من الفيزا عن طريق الباي بال اللي هو مفترض إنه آمن بنسبة 100% زائد إنك كمان تقدر ترسل أو تستقبل أو تسحب فلوس من وإلى أي حساب باي بال وده غير متاح في الفيزا بس الخدمة دي طبعا بتختلف من دولة لتانية وحاليا في مصر لسة مفعلوش الاستقبال والسحب من حساب الباي بال لكن بتقدر تشتري وترسل فلوس بيه عادي واقرأ الموضوع ده هيفيدك
كيفية فتح حساب فى PayPal - الخطة..أدسنس