حد هنا ساكن فيالتجمع الخامس في البنفسج فيلات؟

**أبو صلاح** · 11-12-2013 10:01 AM

السلام عليكم
ياشباب في حد هنا ساكن في البنفسج فيلات؟
محتاج منه شوية معلومات
شكرا

**4fun14** · 11-12-2013 10:03 AM

طيب ما تسيب الاسئلة عشان اللى عارف يجاوب على طول..
انا مش هعرف افيدك لانى شارى ف البنفسج عمارات ولسه مسكنتش

**tareksakr** · 11-12-2013 12:18 PM

قول اللي انت عاوزه وان شاء الله هارد عليك

**Amr_tika88** · 11-12-2013 12:48 PM

انا في الياسمين لو حضرتك محتاج اي حاجه اقدر افيد بيها مش هتاخر

**أبو صلاح** · 12-12-2013 08:44 AM

الموضوع باختصار اني معروض علي فيلا في البنفسج فيلات
بس هي عبارة عن ارضي منخفض (بدروم) + ارضي مرتفع (ارضي عادي)
ومعاها ارض حديقة مساحتها كويسة
هي طبعا فرق سعر رهيب مابينها وبين فيلا اول وثاني دور تقريبا النصف
كنت عايز اعرف طبيعة الحياة داخل البدروم كويسة ولا هتبقى فيها مشاكل خصوصا ان معظم الحياة هتبقى بالتكيف وفتح الشباك للتهوية
يوجد ايضا بالبدروم حمام ومطبخ والسمسار بيقولي هيتركب جهاز شفط هل فعلا الكلام ده صحيح وان الجهاز ده لا يسبب ازعاج وعملي فعلا؟
هل مستقبلا يمكن استغلالها كمشروع تجاري بسهولة ولا في مشاكل في التراخيص؟

**walidzakzok** · 12-12-2013 11:17 AM

هية المشكلة هل البدروم معزول كويس بيتومين وهل مواسير الصرف ماشية جواه وهو مغطيها لان كل ما يحصل مشكلة فى الصرف فى المبنى هتلاقي السباك ضيف عندك دة غير ان مستقبلا لما المجاري تضرب لسوء الصيانة البدروم عندك ممكن يغرق

الخازوق الكبير بقى انك هاتحتاج تركب طرمبة رفع علشان صرف البدروم عندك اوطى من منسوب صرف الشارع وخصوصا ان انت بتقول ان البدروم فيه حمام ومطبخ

لازم تسال نفسك هية ليه بنص تمن العلوي!!

**mohamed_selim** · 12-12-2013 11:27 AM

انا مبحبش البدروم لعدة اسباب ... اولها انت كده مخالف لان البدروم مش سكنى ... هم بيتحايلو على كده انهم يعملوها فيلا فبالتالى العداد فوق مش تحت بس برضه تبقى عارف ان اللى تحت مش مظبوط (بس مسمعتش ان فى حد حصله حاجه من الجهاز على عكس الروف بيعملو مشاكل عليه) ...
التانى طبعا موضوع الصرف و المنسوب و تجميع الميه عندك من العماره .... و زود على كده لو الدنيا مطرت و الميه اتحوشت فى الشارع هتروح فين؟ لو ماسوره فى الشارع ضربت الميه هتنزل فين؟
الارضى و البدروم هتدفع كتير للتأمين و حديد على الشبابيك و المداخل و برضه لو هتعمل الجنينه جنينه ليها مصاريف.... عشان كده سعره بيكون اقل بس لما تفكر فى المصاريف اللى وراه هتلاقيك دافع زى اللى فوق و يمكن اكتر كمان

**أبو صلاح** · 12-12-2013 01:13 PM

المشاركة الأصلية كتبت بواسطة walidzakzok

هية المشكلة هل البدروم معزول كويس بيتومين وهل مواسير الصرف ماشية جواه وهو مغطيها لان كل ما يحصل مشكلة فى الصرف فى المبنى هتلاقي السباك ضيف عندك دة غير ان مستقبلا لما المجاري تضرب لسوء الصيانة البدروم عندك ممكن يغرق

الخازوق الكبير بقى انك هاتحتاج تركب طرمبة رفع علشان صرف البدروم عندك اوطى من منسوب صرف الشارع وخصوصا ان انت بتقول ان البدروم فيه حمام ومطبخ

لازم تسال نفسك هية ليه بنص تمن العلوي!!

المشاركة الأصلية كتبت بواسطة mohamed_selim

انا مبحبش البدروم لعدة اسباب ... اولها انت كده مخالف لان البدروم مش سكنى ... هم بيتحايلو على كده انهم يعملوها فيلا فبالتالى العداد فوق مش تحت بس برضه تبقى عارف ان اللى تحت مش مظبوط (بس مسمعتش ان فى حد حصله حاجه من الجهاز على عكس الروف بيعملو مشاكل عليه) ...
التانى طبعا موضوع الصرف و المنسوب و تجميع الميه عندك من العماره .... و زود على كده لو الدنيا مطرت و الميه اتحوشت فى الشارع هتروح فين؟ لو ماسوره فى الشارع ضربت الميه هتنزل فين؟
الارضى و البدروم هتدفع كتير للتأمين و حديد على الشبابيك و المداخل و برضه لو هتعمل الجنينه جنينه ليها مصاريف.... عشان كده سعره بيكون اقل بس لما تفكر فى المصاريف اللى وراه هتلاقيك دافع زى اللى فوق و يمكن اكتر كمان

الله ينور عليكم يا رجالة
انا عارف ان السعر المنخفض ليه ضريبة لازم تتدفع
انتوا نورتوا بصيرتي لاهم حاجة غايبة عني هي الامطار ومواسير المياه وكمان الصرف بتاع العمارة كلها ممكن يغرقني لو حصل مشكلة عندي
الحاجة التانية موضوع المخالفة ده مانضمنش تيجي رئاسة حي قوية تبهدل الدنيا ونلبس احنا في الحيطة

**M7md86** · 12-12-2013 06:29 PM

باشا لو رحت الجهاز هتلاقي منشور متعلق بيحذر الناس من شراء البدروم ، غير قانوني و لو حصل اي مشاكل ملكش دية ، سيبك مل بدروم خالص ده غير انه مش صحي و مفهوش هوا ولا شمس و هيكون مرتع للحشرات