تجربتي لBMW e84 X1 و مقارنة مع e90
السلام عليكم
العربية عجبني فيها
1)الأرتفاع عن الأرض ...فعلا أول عربية بي ام أسوقها و مبقاش مرعوب و أنا طالع المطبات
2)الشكل الخارجي خطوطه متميزة و الجنط ال18 تصميمه ما شاء الله روعة
3)الكراسي مريحة فى السفر و التجهيزات كويسة ...عجبني حامل الأكواب القابل للنزع
4)الشنطة معقولة و نظرا لعدم وجود استبن ففيه مساحة تخزين اضافية أسفل فرش الشنطة
5)كنت متوقع أن العربية هتكون مش ثابتة أوي فى الملفات زي الe90 ,بس اتفاجئت الصراحة لما لقيتها ثابتة جدا بعد تجربة مثيرة على محور صفط و ملفاته الجامدة...مقاس الجنط برضه يساعدك تحط العربية مكان مانت عايز فى الملف.
6)عجبني الباور الكهربا فى الركنة جدا ...بيسهل الركن جدا
7)من أهم الكماليات اللى عجبتني الباركينج سنسور ...رائع
8)رغم ان موتور العربية و فتيسها نفس الe90 ...بس حسيت ان تجاوب الموتور أفضل و الفتيس متجاوب أكتر...برضه حسيت أن العربية أسرع من الe90 يمكن تكون الكرونة أقصر علشان كده العربية أسرع...مش متأكد من الراشيو بتاعه الاتنين
ما عجبنيش فيها
1)الباور الكهربا: الصراحة محستش انه مديني نفس احساس الطريق زي الe90 و ان كان بيتقل بصورة سريعة جدا عند تغيير زاوية ميل الدركسيون...بس برضه حسيت اني مفتقد احساس الباور الزيت مع انه كان بيبقى تقيل بزيادة شوية خصوصا فى الe90...كنت بحس انه اتقل من الe46
2)الوسع الداخلي: القعدة ورا نفس الe90 تقريبا مع انها تبان أكبر بس هيا مش أوسع
3)الجنط ال18: فى مصر و مع الانتشار الهائل للحفر و النقر,بتبقا خايف جدا لأن الكاوتش هيبقى غالى جدا و هو بالمناسبة good year made in germany بخلاف كاوتش الفابريكة فى الe90 اللى كان بريجستون بولندي
4)العربية كانت محتاجة جدا الموتور الألفين التربو و الفتيس الzf التمن نقلات..كان هيخليها حكاية تانية.
5)الكراسي مش كهربا و دي حاجة مش مقبولة فى عربية بالسعر ده
رأيي النهائي
الBMW X1 هيا فعلا أحسن حل لطرق مصر و رغم حبي الشديد لموتور الF30 و تأكدي انها هتبقى أسرع بس أكيد هتعرف تسوق الBMW x1 براحة بال أكتر نظرا لارتفاعها عن الأرض.ولو بتفكر فى واحدة مستعملة فهى برضه أفضل من الBMW e90 .
