طب ايه راي حضرتك ف السويفت 93 ياباني مكيفة
عرض للطباعة
طب ايه راي حضرتك ف السويفت 93 ياباني مكيفة
حضرتك سألتى على سعرها فين ؟؟ سيبك من النت ياريت تسألى على سعرها فى المعارض لأنى أعرف إنها ب 63 ألف ومش موجودة كمان فى المعارض وطبعاً سعرها مستعمل حيبقى أكتر من 35 كمان لآنك حتاخدى عربية موديل حديث من 2007 وطالع وإمكانيتها كويسة . وأنا شخصياً بفضل إنك تبعدى عن عربيات التسعينات نهائى حتبهدلك كل شوية فى الصيانة وحتصرفى عليها كتير .. الماروتى والألتو صيانتهم سهلة وأى حد يشتغل فيهم وقطع غيار أسعارها رخيصة وعربية على الرغم من حجمها الصغير لكن حمالة آسية
متشكرة جدا ليكم
طيب هل في أي اقتراحات أخرى ؟
و ممكن أعرف ايه أفضل مكان للشراء ؟؟
طبعا انا مقدرش ازود كتير عن اللى قال كل الاعضاء لانه مستوفى .. لكن ايدى بتاكلنى بصراحه اقول راى :C_laugh[1]: . طبعا حضرتك متابعه اسعار العربيات دلوقتى وملاحظه كده الغلاء اللى حاصل وحضرتك بتقولى ان امكانياتك لا تتعدى ال35 ولو فى المستعمل ممكن تجيبى حاجه تكييف وباور بس موديل قديم وطبعا القديم عيوبه قاتله وحتلاقى نفسك بتصرفى كتير وبتروحى لصنايعيه كتير ودى حاجه فى حد ذاتها تكرهك فى ركوب العربيه اصلا وانتى لسه فى الاول . راى الشخصى تجيبى ماروتى موديل حديث مش اقل من 2011 مميزاتها انها صغيره يعنى فى الزحمه والركنات مش هتعانى وهيه مش باور بس ناعمه وتكلفة تصليحها وقطع غيارها لا يذكر . العيوب الحجم من جوه والتكييف . لكن انا راىى انها بدايه كويسه جدا انك تتعلمى ومتصرفيش كتير ولما حتيجى تبيعيها مش حتخسرى فيها وتبقى تزودى على تمنها وتجيبي حاجه كويسه. او تحطى ال35 مقدم وتجيبى التو زيرو لكن حتخسرى فيها لو حبيتي تبيعيها الا لو مش ناويه تبيعيها لفتره طويله. اتمنى اكون افدتك
أشكر جدا كل الأساتذة اللي ردوا على الموضوع
أنا ابتديت اتعلم السواقة
بس للأسف حسيت الموضوع صعب جدا .. المدرب كان بيزعق فيا جامد و ضايقني كتير
من أول 5 دقائق عرفني الغيارات و الدواسات و مرة واحدة طلعني شارع زحمة
ارتبكت جدا و ماكنتش مالكة نفسي و الدواسات فلتت مني و زعق فيا كتير
للأسف أنا مش عارفة المشكلة فيه ولا ف ايه بالضبط بس حاسة انني اتعقدت مع العلم اني ف أشد الحاجة لسيارة
هل غلط اني أتعلم 7 بليل في وقت ضلمة ولا المشكلة ف العربية لأني حسيت الدواسات عالية عن رجلي جدا ولا المشكلة ف المدرب اللي كان طول الوقت بيزعق و ملهوش خلق
ساعدوني جازاكم الله كل خير أنا خايفة أتعقد
اولا : لازم تغيرى اللى بيعلمك لان الزعيق ده حيخليكى متوتره جدا ومش عارفه انتى بتعملى ايه والسواقه محتاجه هدوء تام وتركيز
ثانيا : التعليم الصبح افضل ولو بدرى كمان والدنيا رايقه يبقى كويس جدا عشان تبقى شايفه الطريق كويس والرؤيه من داخل العربيه تبقى واضحه
ثالثا : كلنا فى اول السواقه ارتبكنا وخبطنا بدل المره تلاته :) سواء غلطتك او غلطة الاخرين لان ببساطه حضرتك مش بتتعلمى سواقه فقط بتتعلمى ايضا كيفية تفادى اخطاء الغير.
رابعا: السواقه فى مصر عايزه تعود مش تعلم :Copy of new:
خامسا: لازم تحطى فى دماغك ان اللى بيسوقوا مش احسن منك وحضرتك خريجه جامعيه وعارفه الكلام ده كويس
سادسا واخير : اتعلمى كويس عشان تحسنى سمعة سواقة الستات شويه فى مصر لو سمحتي
والله المستعان اولا واخيرا
المدرب ده فاشل
بلاش عربيات تسيعينات
يا تستنى وتكملى على التو او خليكى ماروتى واستغنى عن التكييف
شكرا أستاذ A.Saad و osos007 على اهتمامكم
أنا اما رحت المركز اختارت أغلى كورس اليي هو على فيرنا و قلت أكيد أغلى هيبقى أفضل
للأسف المدرب رجل كبير و عصبي و حسسني اني غبية مع اني فهمته أنا خريجة صيدلة
أستاذ A.Saad أنا فعلا نفسي ف ألتو لكن دلوقتي أنا مرعوبة تماما من السواقة و خايفة أجيبها تتخبط و أضيع كل اللي حوشته في حياتي
أنا كنت أول مرة ألمس الدواسات و مش عارفة ازاي أتحكم فيها و لا الدريكسيون لأني ببساطة أول مرة لأقعد على كرسي السائق و المدرب على طول متعصب
للأسف المركز مش بيرجع فلوس الكورس و أنا مش عارفة أتعلم في الضلمة عشان شغلي بيخلص 5 المغرب و مضطرة
و خايفة يكون اتضحك عليا و حسوا اني وحيدة هنا !!
من فضلكم دلوني أعمل ايه
سامحينى بس المدرب ده جاهل معندهوش خبرة
إنت دلوقتى مش قادرة ولا عارفة لسه تتحكمى فى عربيتك إزاى يدخلك شارع زحمة ؟؟؟؟
المفروض تتعلمى بالنهار فى أماكن فاضية تتعلمى الأول تتحكمى فى العربية إزاى تطلعى من غير ما تبطل وإزاى تقفى وتفرملى فى المكان اللى إنت عايزاه بالظبط وإزاى تبصى فى المريات وتتعودى تستخدمى الإشارات وإزاى ترجعى مارش بالعربية .. كله ده عايز على الأقل 5 أو 6 أيام ولما تبقى تمام يبدأ يدخلك فى الزحمة واحدة واحدة شوارع مصر إسطورية ملهاش علاقة خالص بالسواقة هى عايزة تعود .. دا مايكل شوماخر نفسه لو ساق فى مصر حيرتبك
أوعى تتعقدى من حاجة ياما خبطنا بالعربيات . أنا بقالى سنة بسوق ولسه خابط إمبارح بس مش غلطتى إحنا داخلين على فتحة والطريق زنقنى فى الشمال ومقدرتش أدخل الحارة الوسطى قلت العربية اللى قدامى تلف وأنا أكمل طوالى ... تاكسى من ورايا بقى ذكى وفكيك خمن إنى حلف على الرغم إنى مديتش إشارة بس فى بلدنا الطبع غلاب لآن عربيات كتير بتلف من غير اشارة قام ناطط من قدامى عشان يلف معايا صف تانى ودا كمان غلط مستعجل ليه على رزقه لو عايز يلف ما يستنى ورايا ويلف بعدى .... المهم لمحته وهو بيكسر ومسكت فرامل على اخر لحظة والحمد لله اشارة الزوايا بس هى اللى اتخلعت من مكانها ولسه مركبها دلوقتى