مرسي : تعرف أيه عن المنطق !! ... هل افلس المصري فكرياً .

طبعاً انتوا داخلين الموضوع ومتحمسين وبالذات اول ما قريتوا كلمة مرسي
منكم المؤيد ومنكم المعارض واحد داخل يدافع عن مرسي وواحد داخل يشتم في مرسي

https://encrypted-tbn3.gstatic.com/i...0yz7K6zMbRYVEQ

لكن الموضوع ملهوش اي علاقة بالسياسة ولا بمرسي الي في بالكم الموضوع بعنوان

.
هل افلس المصري فكرياً
( تعرف ايه عن المنطق. اوا لتفكير المنطقي )


واسمحولي اضيف ان من ضمن الافلاس الفكري هو ان تفكيرك يبقى قاصر على حاجة معينة او مبتفكرش غير حاجة معينة بدون توسعة الافق او المدارك ، واذا كنت داخل الموضوع وحاطط في بالك انك تدافع عن مرسي فانتا مفلس وان كنت داخل تهاجم او تشتم فانتا مفلس فكرياً اكتر من زميلك ... وعودٌ على بدء استوقفني مشهد في مسرحية مدرسة المشاغبين لمن المدرسة بتدرس حاجة كده اسمها (( علم المنطق )) او مادة بتدرس في المدارس اسمها المنطق ... وسئلت نفسي هو في فعلاً في وزارة التربية والتعليم مادة اسمها مادة المنطق !!

http://www.assafir.com/Photos/Photos...2012/70203.png

متبرقليش كده يا ابني انتا وهوا سؤالي واضح وصريح ... وسيبك من ام السياسة الي لحست نفوخك انتا وهو ... سؤالي بيقول هل في مادة في مناهج التربية والتعليم. اسمها المنطق او التفكير المنطقي ...

https://encrypted-tbn1.gstatic.com/i...Js_YyRU6B9gw3w

كتيراً مثلاً بشوف شارع طويل عريض واسع وكبير وقف مرة وحدة ... ولمن بشوف فين بداية المشكلة بلاقي عربية ركنت على جنب والعربية الي وراه بدل مايفكر بالمنطق ويشغل مخو ويطلع منوا لا ده بيلزق وراه ويقعد يزمرلوا مع ان الشارع واسع وفاضي وهكذا نفس الحال العربية الي وراهم والي ورى وراهم لغايت مالشارع كلو يوقف !!

طبعاً ده مثال ومش موضوعنا كمان زحمة المرور ... انا بتكلم عن المواطن المصري هل افلس فكرياً ولم يعد يفكر بالمنطق في اي شيء من نواحي امور حياتوا .... والامثلة كتيرة يعني ممكن تكون قاعد مثلاً في صالة الاستقبال لاحد الشركات او المستشفيات والكراسي كلها فاضية وتبص تلاقي واحد داخل يقلك لوسمحت ممكن تتاخر شوية عاوز اقعد في الكرسي الي جمبك مع ان الدنيا فاضية بس هو حبكيت يقعد يغتت عليك . او مخو مشغلهوش وهكذا بقه ... امثله كتيرر كتير مش هقعد اعددها كلها بس انا بلاحظ ان ناس كتير مبتشغلش مخها ومستنينك تفكر انتا بالنيابه عنهم ... وحتى على ابسط الاشياء زي مثلاً تلاقي صحبك يقلك انا جعااان !! ... تيجي تقولوا طيب عاوز تاكول ايه ... يقلك مش عاااارف ... طيب اذا انتا مش عارف انتا عاوز تاكول ايه انا الي هعرف !!! ومن جملة الغباء ينادي على الجرسون وهو ماسك المنيووو في ايدووو ويقلوا عندكم ااايه !!! .

مثلاً ولادك يشوفوك نايم وتيجي بنتك. تسئلك بابا باباااا ... يا باباااااا انتا نايم !!
في الشغل يخشوا عليك المكتب ويقلولوا ايه ده انتا بتتكلم في التيلفون !!!
لا ماسك السماعه ببوسها .

حجات غريبة كتير ... ان دلت على شيء فبتدل على عدم التفكير المنطقي ... وتحس الافلاس الفكري واضح وجلي حتى في الاعمال الفينة الكل بيقلد بعضوا فنان عمل لحن ونجح الكل يقلدوا وخلاص ... قصص الافلام اغلبها بل اكترها قصص افلام اجنبية ومتاخدة بالملي ... الاعلانات والدعاية كلها مسروقه بالملي ولا يوجد بها اي تفكير ابداعي والمنطق... يكاد يكون ملغي من قاموس البني ادم ... واحد فتح محل شاورما ونجح الكل جي يفتح جمبو محلات شاورما بدون اي تفكير او تشغيل مخ ... جين يقلدوا وخلاص مفكروش للحظة ان الافندي ده نجح لانوا درس المنطقة ولقى انها محتاجة لمحل شاورما ... تعاله انتا بقه افتح محل هبورجر او كبدة او حاجة تانيه شغل البتنجانه الي في راسك دي شوية بدل ما تيجي تقلد وخلاص وتقلل حصة كل واحد منكم من السوق. ... المهم القصد من الكلام ده كلوا ان انا شايف ان اساس المشكلة ان مفيش مادة في منهج التربية والتعليم. للمنطق او التفكير المنطقي او التفكير الابداعي. ... ازاي اتوقع من شعب يبدع وهوا مش عارف ازاي يبدع. غير في الفهلوة وشغل حلق حوش ... والنتيجة. شعب منهم ناس كتير لاغيه لغة المنطق. والحوار وبتستخدم لغة الدراع والعنف ...

@@@@@@@@@@

من رئيك كيف نعلم ابنائنا التفكير بالمنطق وتشغيل الدماغ مش الدراع .
ام ان الموضوع بديهي ومش مستاهله تعيلم ولا حاجة وكل واحد يفكر بمنطقوا هوااا ونسيب كل واحد على هواه وزي مايجيبوا مخوا. او تفكيروا .ونقول ان ربنا لمن وزع العقول كل واحد عجبوا عقلوا !!

واسف للاطالة
وتحياتي ...

اقتباس:

---

المشاركة الأصلية كتبت بواسطة y a r i s

وتحس الافلاس الفكري واضح وجلي حتى في الاعمال الفينة الكل بيقلد بعضوا فنان عمل لحن ونجح الكل يقلدوا وخلاص ... قصص الافلام اغلبها بل اكترها قصص افلام اجنبية ومتاخدة بالملي ... الاعلانات والدعاية كلها مسروقه بالملي ولا يوجد بها اي تفكير ابداعي

من رئيك كيف نعلم ابنائنا التفكير بالمنطق وتشغيل الدماغ مش الدراع .

---

من رأيى ان علشان نعلم ابنائنا التفكير بالمنطق وتشغيل الدماغ ان احنا نشوف الاجانب بيفكر ازاى بالمنطق وننقل تفكيرهم بالمللى:Copy of m-s5::Copy of m-s5:

اقتباس:

---

المشاركة الأصلية كتبت بواسطة amr011111

من رأيى ان علشان نعلم ابنائنا التفكير بالمنطق وتشغيل الدماغ ان احنا نشوف الاجانب بيفكر ازاى بالمنطق وننقل تفكيرهم بالمللى:copy of m-s5::copy of m-s5:

---

+١١١١١١١
ههههههههههههههههههههههههه ... حلوة
اه واللهي عاوزين نشوف بره بيعملوا ايه ... مفيش حد معانا هنا مسافر برة او درس في الخارج او حتى اساتذة علم الاجتماع الي معانا في المنتدى يقولنا ازاي بره بيعلموا اولادهم يفكروا التفكير الابداعي والمنطقي ... وتحياتي .

اول حاجة تغير فكر النظام الحاكم للدولة - تهتم بالقضاء على الامية و القضاء على الجهل - تطور مناهج التعليم تطوير حقيقى يتناسب مع العصر الحالى مش التعليم هوه هوه من 40 سنة كل الى بيحصل انهم بيلغوا كلام منه لكن نفس الفكر الغبى العقيم فى التعليم

قنبلتين نووى ينزلوا ع البلد دى و نخلص و نبدأ من اول السطر بناس تيجى من اليابان ولا الصين حتى

اقتباس:

---

المشاركة الأصلية كتبت بواسطة algazar2

قنبلتين نووى ينزلوا ع البلد دى و نخلص و نبدأ من اول السطر بناس تيجى من اليابان ولا الصين حتى

---

+111111
هههههههههههههههههه بقولهم كده مش مصدقيني

دي من سمات عصور الانحطاط



الا هو مين مرسي اللي بتتخانقوا عليه ده؟

بدون الدخول في تفاصيل الموضوع
اعظم مسرحيه في تاريخ المسرح المصري
مدرسه المشاغبين

اقتباس:

---

المشاركة الأصلية كتبت بواسطة تامر.محمد

دي من سمات عصور الانحطاط

الا هو مين مرسي اللي بتتخانقوا عليه ده؟

---

ههههههه.
احنا بنتكلم عن مرسي ابن المعلم الزناتي يا ابو جويرية

علشان تنفذ ده يا عم ياريس ابتدى صلح الاتى
1/ التعليم من اول عدد التلاميذ اللى بالفصل الى الماده التعليمية
2/ العدل المطلق بين الناس .
3/ رفع المستوى الاقتصادى و المادى .
4/ التخطيط السليم لكل حاجة يلى ذلك التنفيذ السليم لكى ما خططته.

بعدد كده هيبقى عندك و عند الاولاد الوقت للابداع و التفكير فى المستقبل.

ياترى هتنفذ امتى ؟؟؟

اولا اجابه لسؤالك عن وجود ماده للمنطق فاحب اقولك ان فى ماده الفلسفه والمنطق تدرس فى الصف الثالث الثانوى لطلبه القسم الادبي .... وعلى ايامى كانت من اكتر المواد الممتعه ليا وللاسف اكتشفت ان كل اللى بيدرس الماده دى بيدرسها لان اسألتها محفوظه ومبتتغيرش كل سنه ومحدش بيفكر يقرأ فيها بتتكلم عن ايه ولكن ما علينا .

ثانيا احب اقولك ان قله التفكير السليم او الرؤيه الحقيقيه للامور ترجع برايي بالتاكيد لسلوكيات التعليم "طريقه التعليم وتوصيل المعلومه والشرح بعيدا عن المناهج " والشئ المهم الاخر التعصب الاعمى والرؤيه الضيقه "فاما ان ترى ما اراه بعيني او تصبح بالنسبه لى كفيف لا ترى "

وبالتالى علشان الناس تفكر بمنطق على الساده المدرسين تعليم الاطفال وحتى سن التعليم الثانوى بطريقه سليمه تعتمد على تشغيل اعظم هبه للانسان من خالقه "العقل " والبعد عن التلقين وعدم كبت افاق رؤيه الطالب بجمله "بلاش اسئله بره المنهج " وكأن المنهج قران منزل من السماء وعلى الطالب الا يجادل او يناقش "حرصا على وقت الحصه " وادخال التعليم الذى يتضمن الخروج من الفصل للتعلم كالذهاب لمعمل لاجراء تجربه بمشاركه الطالب او النزول للحوش للتدريب وهكذا وبالتالى يخرج طالب قادر على تقبل اراء الاخرين والتفكير باسلوب غير تقليدي ويتعود ان عقله موجود للعمل بانفتاح وليس لتقليد الغير او حفظ معلومات لا فائده منها .

وكمان علشان الناس تقدر تشوف قدامها صح يبقى اول درس لازم نفهمه ان محدش شايف الصوره كامله كل واحد بيبص على اللى هو قادر "او عايز" يشوفه وبالتالى مش لازم نغالى فى راينا ان احنا الصح او ان الفعل اللى بنعمله هو الفعل الصحيح ولكن نقول انه هو الصحيح من وجهه نظرى لانه ممكن يكون غلط بس انت مش شايف وساعتها حتتقبل انك تسمع وجهه النظر التانيه اللى ممكن تكون هى الجزء اللى انت مش شايفه
واخيرا كل واحد يفكر ان السلوك اللى الشخص اللى بتتعامل معاه بيعمله بيكون ناتج عن منطق شخصى ليه لرؤيه انت مش حتشوفها غير لو انت مكانه فالشخص اللى بيقولك توسع له يقعد جنبك والاماكن كلها فاضيه يمكن يكون شايف ان المكان ده مميز او انه عايز يرغى معاك علشان يضيع وقت "حتى لو كانت دى احيانا حاجه مزعجه" وصاحبك اللى بيقولك جعان بس مش عارف ياكل ايه بيكون مثلا مش حابب يفرض رايه عليك وعايزك انت تقترح الاكل او مفيش حاجه محدده فى دماغه وعايز اقتراحات وهكذا وللعلم لما احيانا بفكر بالاسلوب ده بريح اللى قدامى جدا واوصله للى هو عايزه باقصر طريق .

تحياتى .

اقتباس:

---

المشاركة الأصلية كتبت بواسطة gelgel2004

علشان تنفذ ده يا عم ياريس ابتدى صلح الاتى
1/ التعليم من اول عدد التلاميذ اللى بالفصل الى الماده التعليمية
2/ العدل المطلق بين الناس .
3/ رفع المستوى الاقتصادى و المادى .
4/ التخطيط السليم لكل حاجة يلى ذلك التنفيذ السليم لكى ما خططته.

بعدد كده هيبقى عندك و عند الاولاد الوقت للابداع و التفكير فى المستقبل.

ياترى هتنفذ امتى ؟؟؟

---

جلجل باشا صديقي العزيز
اول نقطة سهل تطبيقها ... والنقطة كمان رقم اربعه كمان سهل تطبيقها
بس رقم اتنين وتلاته ... هل تعتقد ان في شيء يسمى العدل المطلق في العالم كلو ... استحالة وان تحقق فالناس فاكرة ان العدالة هيا المساوة. في توزيع ثروات او ان المدير ياخود زي الغفير ... وبيختلط معاها مفهوم العدالة بمفهوم المساوة فالله عز وجل برغم انه اعدل العادليين الا انه لم يرزق الناس بالتساوي ولكن لكل مخلوق قدر له رزق يختلف عن رزق الاخر بس دي نقطة كتير من الناس مش قادرة تستوعبها وفاهمه العدالة الاجتماعية اننا ناخود من الغني وادي الفقير او الغني يدفع فاتورة او يحاسب بالنيابة عن الفقير. والنتيجة تحول المجتمع لسبهللة والطبقة المتوسطة راحت في الرجلين وانمسحت وتكاد تنقرض لانك بمنتهى البساطة بتدفع فاتورتك وفاتورة غيرك ... والطبقة الغنية الي بدل ماتعمل مشاريع جديدة بالارباح ويفتح مشاريع جديدة يشغل فيها شباب جديد. ... شعروا بالغبن وانهم بيدفعوا فاتورة امم حوليهم من نوعية ناس عاوزة تعيش بلوشي ونظام خلف وارمي. فابتدى في خلل اجتماعي وهوة كبيرة بين الطبقات التلاته الي التلاته حاقدين على بعض

وكزالك موضوع رقم ٤ رفع المستوى المادي والاقتصادي
ازاي ارفع مستوى المادي والاقتصادي لناس تالت تربعهم او نصفهم مبيشغلوش مخهم ولا يستخدمون المنطق في تفكيرهم ... او حتى التفكير الابداعي. انتا مع الاسف لو عندك عمال بتطلب منهم يلغوا مخهم تماماً لان لو عامل فكر بس مجرد فكر انوا يبدع في شغلوا. هيخرب لك بيت الشركة كلها ويبوظلك الشغل ومش بعيد. انوا هيجبلك دورفها ... ليه لانوا لا يستخدم المنطق في عملوا ويلجئ الى الاستسهال والفهلوة وشغل بالصلى على النبي. (( كلوو مااااشي ... وياسيدي مدؤش )) فازاي عاوزني ارفع مستوى اقتصادي لعامل او لموظف وهو القيمة الي انا باستفيد منوا فيها هيا هيا مفهاش اي تطور او مبيحقق لييش اي ارباح زيادة عن شغلوا ... بمعنى موظف محاسب هو وظيفتوا الحسابات واحد + واحد يساوي اتنين. جه طلب زياده. اديتو طلب حوافز اديتو. طلب وكل ما يطلب منك انتا بتديلوا النتيجة انتا هتفلس والشركة هتقفل. لان ارباحك هيا هيا مفيش اي زيادة في الارباح لكن في زيادة في المصروفات ... وهنا نرجع للنقطة الاساس. انتا محتاجة أمة يكون تفكيرها تفكير منطقي و يكون تفكيرها تفكير ابداعي ... علشان تقدر تحقق زيادة في الدخول وفي المستوى الاجتماعي ... وتحياتي

اقتباس:

---

المشاركة الأصلية كتبت بواسطة eslamrace

اولا اجابه لسؤالك عن وجود ماده للمنطق فاحب اقولك ان فى ماده الفلسفه والمنطق تدرس فى الصف الثالث الثانوى لطلبه القسم الادبي .... وعلى ايامى كانت من اكتر المواد الممتعه ليا وللاسف اكتشفت ان كل اللى بيدرس الماده دى بيدرسها لان اسألتها محفوظه ومبتتغيرش كل سنه ومحدش بيفكر يقرأ فيها بتتكلم عن ايه ولكن ما علينا .

ثانيا احب اقولك ان قله التفكير السليم او الرؤيه الحقيقيه للامور ترجع برايي بالتاكيد لسلوكيات التعليم "طريقه التعليم وتوصيل المعلومه والشرح بعيدا عن المناهج " والشئ المهم الاخر التعصب الاعمى والرؤيه الضيقه "فاما ان ترى ما اراه بعيني او تصبح بالنسبه لى كفيف لا ترى "

وبالتالى علشان الناس تفكر بمنطق على الساده المدرسين تعليم الاطفال وحتى سن التعليم الثانوى بطريقه سليمه تعتمد على تشغيل اعظم هبه للانسان من خالقه "العقل " والبعد عن التلقين وعدم كبت افاق رؤيه الطالب بجمله "بلاش اسئله بره المنهج " وكأن المنهج قران منزل من السماء وعلى الطالب الا يجادل او يناقش "حرصا على وقت الحصه " وادخال التعليم الذى يتضمن الخروج من الفصل للتعلم كالذهاب لمعمل لاجراء تجربه بمشاركه الطالب او النزول للحوش للتدريب وهكذا وبالتالى يخرج طالب قادر على تقبل اراء الاخرين والتفكير باسلوب غير تقليدي ويتعود ان عقله موجود للعمل بانفتاح وليس لتقليد الغير او حفظ معلومات لا فائده منها .

وكمان علشان الناس تقدر تشوف قدامها صح يبقى اول درس لازم نفهمه ان محدش شايف الصوره كامله كل واحد بيبص على اللى هو قادر "او عايز" يشوفه وبالتالى مش لازم نغالى فى راينا ان احنا الصح او ان الفعل اللى بنعمله هو الفعل الصحيح ولكن نقول انه هو الصحيح من وجهه نظرى لانه ممكن يكون غلط بس انت مش شايف وساعتها حتتقبل انك تسمع وجهه النظر التانيه اللى ممكن تكون هى الجزء اللى انت مش شايفه
واخيرا كل واحد يفكر ان السلوك اللى الشخص اللى بتتعامل معاه بيعمله بيكون ناتج عن منطق شخصى ليه لرؤيه انت مش حتشوفها غير لو انت مكانه فالشخص اللى بيقولك توسع له يقعد جنبك والاماكن كلها فاضيه يمكن يكون شايف ان المكان ده مميز او انه عايز يرغى معاك علشان يضيع وقت "حتى لو كانت دى احيانا حاجه مزعجه" وصاحبك اللى بيقولك جعان بس مش عارف ياكل ايه بيكون مثلا مش حابب يفرض رايه عليك وعايزك انت تقترح الاكل او مفيش حاجه محدده فى دماغه وعايز اقتراحات وهكذا وللعلم لما احيانا بفكر بالاسلوب ده بريح اللى قدامى جدا واوصله للى هو عايزه باقصر طريق .

تحياتى .

---

الله عليك
بصراحة عجبني رأيك ١١١١١

اقتباس:

---

اول نقطة سهل تطبيقها

---

اول نقطه يستحيل تطبيقها
من اساسيات الانظمه الفاسده الفاشيه افساد المنظومه التعليميه لشعبها لأن الشعب المحكوم من الانظمه الفاسده اذا تعلم بصوره صحيحه فأن اول شىء سيفعله هو القضاء على هذه الانظمه الفاسده
لا تفسر الماء بعد الجهد بالماء :wink10:

المنطق = الحكمه والحكمه هي موهبه من الله وليس شرطا ان تأتي من خلال التعليم بل قد تكون متأصله داخل الانسان منذ طفولته

كلامكوا ده معناه اننا محتاجين عمر ابن الخطاب من جديد
او محمد على

اقولكو على حاجه بس بمناسبه المنطق
انا مستخدم يومينا للمترو من 8 سنين رايح جاى فى لادراسه ولسه 4 سنين كليه لو مجبتش عربيه (قولو يارب)
عايز اقوللك انى بققيت بكره الاختراع اللى اسمه المترو ده حجاه بجد قمه القرف والغباء والتخلف والجهل والتناحه اللى موظفين المخروب ده شغالين فيه

زمان اول لما اتعمل المترو كان زمن التقاطر ثوانى(يعنى الوقت بين القطر واللى بعده)
دلوقتى مع الزحمه الشديده الزمين بيزيد هههههههههههههه متسألش ازاى طبعا ده بيسبب زحمه شديده جدا

+كمان ايه انهم مش عارفين يظبطوا مواعيد القطارات مع بعض يعنى المترو اول لما يخرج من المحطه تلاقيه وقف تانى ليه اصل هو خارج بدرى عن معاده ياااااااااااااااااااااابه ايم ايه اللى خرجك من ام المحطه

تخيل بقى المترو بيبدا من شبرا الخيمه تلاقى السواق يعمل ايه لاصبح
يقول اول محطه للمترو الشهداء تسمع شويه نرفزه وكلام قبيح من الناس واللى نازل قبل الشهداء بيخرج من المترو يقوم الباب يقفل وتلاقى المترو كمل مشواره عادى ولا كانه قال حاجه تخيل انت بقى ناس بالعقليه المتخلفه دى


اقوللك على اللى يغيظ اكتر فى المترو برضو بما اننا فى منتدى سيارات وفاهمين يعنى ايه انظمه تعليق (عفشه يعنى)
المترو نظام التعليق بتاعه هواء عباره عن بالونات مطاط مليانه هواء وهى اللى شايله المترو كله ععلى العجل ده بيؤدى لراحه عاليه فى المترو زى الاوتوبيسات كده

تخيل بقى لاسواق يعمل ايه شوف الاسلوب يجى يخرج من المحطه يقوم جارى جامد وفجاه هوب فرامل !!!!!! طبعا ما فيش اى راحه ويقوم مزود السرعه تانى ويجرررررررررررررررررى ويجى قبل المحطه بكام متر وهب تييييييييت فرامل شوف التخلف والجهل بتاع البنى ادمين مش عراف اتعلموا السواقه فى انى خرابه

منطق ايه بس ياعم
انت فى مصر!!!

يا عمدة لقد ذهب المنطق
واصبح لا يوجد الا الاختلاف

انا رائى ان العصر اللى احنا فيه هو اللى شجع على عدم التفكير بص على اولادنا و ازاى بنربيهم يحفظوا كلمتين و يخشوا بيهم الامتحان و يدلقوهم علشان ينجحوا و يطلعوا ناسينهم و لو الاسئلة جت زى اللى ذاكروها بس بطريقة مختلفة ما بيعرفوش يحلوها انا لما كنت باخد درس فى المدرسة و بسال المدرس بيقولى احفظها كده علشان الامتحان
و لما بيكبروا شويه و يتخرجوا يبقوا قاعدين مستنين حد يشغلهم و اللى بيشتغل بس اللى بيعرف حد ياخدوا معاه
محدش عاوز يتعب دماغه و يفكر اللى اتعود يمشى من طريق كل يوم لو لقاه زحمه ياخد دوره فى الزحمه بدل ما يجرب طريق جديد ممكن يكون اسلك و اسرع

للاسف اتعودنا على الاستسهال فى كل حاجة و عدم تشغيل المخ اللى ربنا انعم علينا بيه

فيها ايه لو كل واحد فينا فى نهاية كل اسبوع يوم الجمعة او السبت جرب يعمل حاجة جماعية هو و اولاده مثلا يركبوا ديكور جديد للبيت و حتى لو مش بيعرف يتعمل ازاى يدور على تركيبه على النت و يشترى الخامات و يبتدى يركبها هو و الاولاد و كل ما تقابلهم مشكلة يفكروا فى حلها و ح تبقى ممتعة ليهم و ليه هو كمان

نحن نريد العلم .....والايمان

فالعلم الغير مقترن بالايمان ينتج عنه كوارث اخلاقيه وغير انسانيه شديده
فتحكيم الايمان فى نفوسنا وفى قوانيننا وفى حياتنا ....... فسنحقق الاتي:
1- العدل
2- العلم
3- القوه
4- الرحمه

وبذلك فقد طبقت مفهوم المجتمع السليم .......ذو التفكير السليم ......والراي المنطقي

وما اقصده عن الايمان ...... هو علوم الاسلام