من لا يشكر الناس لا يشكر الله
انا عارف ان عنوان الموضوع غريب شوية على المنتدى .. بس ما علينا واعذرونى مقدما على الاطالة
بداية انا جبت الفيكترا بى 1 1600 الموتور الاسود 99 مانيوال طبعا من حوالى شهرين
ولظروف شغلى ما عملتلهاش السرفيس الاساسية الا تغيير الزيت بعد ما مشيت بيها حوالى 1000 كيلو
ابتدت العربية من فترة تعك معايا كالأتى
1- كنت أحس بتنتيش فى العربية وانا ماشى بيها على الطريق يعنى احس كده انها عايز تبطل او ان البنزين مش واصل للموتور لكن لما اكبسلها بنزين تكمل عادى وتفوق
2- القربة كان فيها تسريب بسيط من الخرطوم اللى ناحية الموتور من فوق فقلت افوق الاول من ظروف شغلى وهشترى قربة جديدة وخلافه
3 - العربية ابتدت بقى تستهبل شوية يعنى جيت فى مرة مثلا اشغلها واطلع بيها بعد ما كانت تبقى باردة تشتغل زى الفل فى الاول واثناء ماهى بتسخن تروح تفصل مرة واحدة بدون اى مقدمات واجى ادور تانى تاخد وقت على ما ربنا يهديها وتشتغل وممكن كمان تعمل الحركة دى حوةالى 4 او 5 مرات لغاية ما تشتغل وتبقى زى الفل اطلع بيها على الطريق تمام وابطل واشغل تبقى زى الفل لغاية ما جننتنى رحت بيها لمركز خدمة بتاع واحد مهندس معرفة حطها على الجهاز والجهاز ما قراهاش ( حاجة غريبة ) وكتبت عنها فى المنتدى والاستاذ فادى جزاه الله خيرا رد عليا وقلت لما افضى هبقى اعافر فيها زيه ... وده رابط الموضوع http://www.nilemotors.net/Nile/390853-a.html
4 - ركنت العربية كام يوم وجيت اشغلها لقيت البطارية مش مقوماها ولا حتى مشغلة النور المهم غيرت البطارية اللى كانت فيها وهيا هانكوك كورى 70 امبير ( الاسم التجارى ) بواحدة كلورايد ترست واشتغلت تمام بس بنفس مشكلة الفصل والتشغيل ( مع ملاحظة انى لما بركب كابل البطارية بيبقى فى شرز خفيف وعشان شغلى فى مجال الهندسة الكهربية فقلت غالبا فى قفلة او حاجة شغالة وعملت كل المحاولات عغشان اعرف مكانها فين وفى النهاية قلت اتصل وازعج بالاستاذ محمد الطنانى فقالى دى لازم منها عشان الكمبيوتر بتاع العربية بيبقى محمل على البطارية
5- دى بقى اللى تعبتنى جدا جدا كنت فى مشوار من قنا للبحر الاحمر مسافة 200 كيلو رحت بيها زى العسل مافيش تقطيع ولا اى حاجة وقعدت هناك يومين وجيت فى يوم السفر الصبح فكيت القربة عشان كانت مليانة صدا ووساخة فنظفتها برمل ومية وركبتها وشغلت العربية اشتغلت تمام وعملت بيها كام مشوار وجربت عداد الحرارة وكان تمام وركنت العربية وجيت اطلع عشان اسافر بيها بعد العصر ودى بقى حلفت براس ابوها ما هى شغالة فكيت الايدل وشفت فيشته وعملت البدع فيها ( على قد درايتى من المنتدى وخبرتى القليلة فى الميكانيكا من البيجو 305 ) برضو مش بتنطق .. فى الاخر كلمت الاستاذ طنانى ( الله يكرمه ) قالى بص على فيشة حساس الكرنك ونضفه بزيت باكم عملت زى ما قاللى وجيت اشغل ما اشتغلتش كلمته تانى قالى استنى عليها شوية وجرب .. عملت زى ما قالى المهم دارت .. بطلت العربية وشغلتها كذا مرة وانا تحت البيت والامور تمام فقلت اتوكل على الله اسافر بيها .. وانا ماشى بقى السرعة على 120 الاقيها نزلت مرو واحدة ل 100 مع ان دوسة البنزين ما اتغيرتش .. عملت كده حوالى مرتين المهم مشيت بيها 100 كيلو لغاية ما وصلت كافيتريا فقلت اريح شوية واشرب شاى عشان افوق ... بعد ما خلصت حلفت براس ابوها تانى ماهى شغالة .. لا بالزق ولا حتى لما حطيت لها بنزين فى البوابة ولا اى نيلة .. المهم لو كان الطريق فيه شبكة تليفون شغالة طبعا كنت هكلم طنانى باشا لكن للاسف الطريق مافيش فيه شبكة الا بعد 170 كيلو ... المهم ركنت العربية وقلت هاجى اشدها الصبح .. جيت الصبح بقى عشان اشدها فقلت اجرب يمكن ربنا يهديها .. ( للعلم العربية كانت بتقوم مارش وكل حاجة وكان فى بنزين بيترش فى البوابة يعنى المشكلة بعيدة من المارش والبنزين لكن ناقصة على قص الشريط زى ما بيقولوا )
المهم بشغل اشتغلت من اول مرة بطلت وشغلت كذا مرة والامور تمام .. طب كان لازمة الحركات القرعة باليل دى بس ... ما علينا قلت اكمل لغاية البحر الاحمر وانا ماشى بيها على 140 و 150 زى الفل لا فى تنتيشى ولا اى حاجة ... رحت بيها لميكانيكى وقبل ما ادخله بشغل وابطل تمام ما فيش مشاكل ... قلتله على الحوار الطويل ده قالى غالبا طلمبة البنزين
فك الطلمبة لقى فى قطع فى خرطوم الطرد راح قص الجزء المقطوع وركبه تانى بس مع تغيير القفيز طبعا وجرب يشغل قالى الطلمبة مش بتحقق ضغط ( انا شكيت وقلت فى نفسى مانا جيت بيها مسافة 100 كيلو مافيش فيها مشاكل ولا حاجة وقلت غالبا موضوع الخرطوم المقطوع ده اكيد هو اللى كان بيخليها تبقى عايز تبطل وهو السبب فى انخفاض السرعة على نفس دوسة البنزين امبارح ) المهم قلت خلينى وراه رح لمحل اكسسوار وورانى كذا نوع طلمبات منها البوش مكتوب على الطلمبة نفسها صناعة المانى ب 300 جنيه ورانى الكورى واليابانى ب 140 وقالى فى صينى ب 100 .. المهم كلمت محل الشيماء وقالى فى بوش ب 290 زى اللى فى محل الاكسسوار ... قلت اتاكد من طنانى باشا عشان هو ادرى بانهى الافضل عندى ... قالى ركب بتاعت الفرنا وابقى هات واحدة من توكيل بوش هتعمل 900 بس مضمونة لان اللى فى السوق مضروب ... انا قلت خلاص هخلى نفس طلمبتى الاصلية راكبة وابعت اشترى الجديدة ... المهم قلت اجرب موضوع ضغط الطلمبة بنفسى .. وجربت لقيت ضغطها تمام وشغلت العربية تمام رحت مركب الطلمبة والميكانيكى شايفنى انا شغال فيها بنفسى راح اتضايق وقالى انا هركبهالك يا باشا بقرف كده .. المهم ركبها وجيت اشغل ما اشتغلتش ... ( الله يخرب بيتك عملت فيها ايه خربتها تانى ما كانت شغالة كويس ) المهم قالى بعنطزة كده ( مانا قلتلك المشكلة فى الطلمبة قلتله والله ما مغيرها ولو هغيرها مش هغيرها عندك ماهى كانت شغالة كويس قبل ما تحط ايدك الكريمة ) رحت زاقق العربية من عنه وكملت شغل فيها وكلمت الاستاذ طنانى كذا مرة والراجل كل مرة يرد عليا بكل زوق ويوجهنى اعمل كذا وبص على كذا المهم يعنى من الاخر قرفت الراجل مكالمات واسئلة وكان بيرد على كل حاجة بمنتهى الحرفية
فى الاخر وبناءا على نقل الصورة وحالة العربية قالى ان المشكلة فى حساس الكرنك .. وطبعا الحاجة دى مش موجودة فى قنا او البحر الاحمر فالراجل ادانى رقم شركة سرور وكلمتهم وبعت واحد جابها وبعتهالى فى اتوبيس لغاية البحر الاحمر .. بس للاسف وبناء على عدم توضيح الصورة مكتملة ولانى ما قلتش للاستاذ طنانى على موضوع القربة ده فالمشكلة ما طلعتش فى الحساس وطلعت فى السلكتين اللى داخلين على المومبينة .. واللى كان بيحصل ان العربية لما بتحسن فالميه بتهرب من القربة عن طريق التنفيس اللى فى البوز اللى راكب عليه الخرطوم فبالتالى المية بتنزل على الفيشة دى وبتخلى العربية لو بطلتها مش بتشتغل ( ده تفسيرى والله اعلم )
المهم بعت علت قربة جديدة بغطاها ب 160 جى ام ... وحساس الكرنك كان عامل 300 جنيه حاجة فرنساوى بس ما شفتهوش طبعا لانى كنت سايب العربية لحمايا وهو اللى جرب الحساس مع الميكانيكى .. والموبينة بالمشط ب 500 جنيه ( مش غالية شوية ؟؟ ) هيا صناعة انجليزى تقريبى والمشط صناعة اتحاد اوروبى او العكس مش متذكروسير دينامو ليمفورد 90 جنيه
المهم الموبينة ما جاتش بالفيشة اللى فيها المشكلة .. بس الحمد لله العربية شغالة دلوقتى الحمد لله والموضوع ده حصل معايا تانى مرة واحدة بس المرة دى كنت بزود مية فى القربة فالمية نزلت على الموبينة فركنت لكن شلت الفيشة ونضفتها وركبتها واشتغلت تمام الحمد لله
انا عارف انى طولت عليكم فى سرد مشكلتى مع الفيكترا لكن فى حاجتين اتنين احب اوضحهم وهما الهدف من نشرى للموضوع ده
اول حاجة شكرى وتقديرى للشخص المحترم الاستاذ محمد طنانى على تعامله مع اى حد مايعرفهوش وبيفصصله المشكلة حتة حتة وبيشرح شرح وافى وحقيقى كنت بتمنى معرفته شخصيا وان شاء الله فى اول فرصة هنزل فيها القاهرة هروحله مخصوص المركز اشكره وبالمرة استغل وجوده ويشوف العربية .. لدرجة انى كذا مخرة كنت بشفق عليه من غلاستى فى التليفون وقلت يا ريت كان معايا رقم حد تانى فى المنتدى كنت كلمته وخفيت الضغط عليه
تانى حاجة .. بعد الموقف اللى حصل معايا ده والناس كلها اللى قالتلى ابعد عن الاوبل ومشاكلها قطع الغيار والصنايعية ومش عارف ايه كلهم بلا استثناء قالولى مش قلنالك ابعد عنها .. اشرب بقى يا معلم ( مش شماته ولكن تقطيم ) الا انه وبجد يا جماعة الالمانى المانى لدرجة انى فى مرة نسيت غطا القربة مفتوح ومشيت بالعربية مسافة 60 كيلو بين الاقصر وقنا والعربية المية اللى فيها فضيت والطريق كله مطبات كل 4 كيلو تهدى عشان 4 مطبات ورا بعض يعنى حوالى 100 مطب تقريبا والجو كان اواخر الصيف الا انه العربية حرارتها كانت بين ال 85 وال 90 ولما وصلت الاقصر وابتدت الزحمة بقى لولا ما حرارتها رفعت لغاية ال 100 واتفاجئت انها وصلتنى وما اشتكتش . الحمد لله
