الموضوع: كيف تتعامل مع طفلك في أمراض الشتاء ؟!

هو صحيح أنا مش أطفالجي ( مع الاعتذار لرجالة الأطفال ) :)
بس حبيت أنفع الناس بمعلومات مهمة جدا خاصة في فصل الشتاء ....
أنا هحاول أخلي الموضوع بلهجة سهلة وبطريقة التسكيم والاختصار
احنا بنواجه في الشتاء مشكلة الالتهابات في الأطفال ...
التهابات الجهاز التنفسي بشقيه العلوي والسفلي ...
دي أكبر مشكلة هتواجهنا وهنتكلم عنها ...
الالتهابات دي عادة بتكون نوعين من حيث المسبب للمرض ...
1 - باكتيري .....
2 - فيروسي ....
أعراض الالتهاب بتكون:
رشح ... تغير في الصوت .... صعوبة في البلع ...
دي أعراض عامة في كل الالتهابات ....
خد بالك بقى علشان اللي جاي مهم :
ازاي نفرق بين الالتهاب الفيروسي والبكتيري وهتفرق معانا في ايه ؟!!
الالتهاب الفيروسي ... العيل مابيبقاش مفرهد منك ... تحس ان الواد بيلعب ونشيط صحيح مش زي ما يكون سليم .. بس بيكون نشيط وشهيته للأكل معقوله ....
الالتهاب البكتيري : الواد مفرهد وتحس انه مش قادر يصلب طوله وشكله يصعب عليك ....
أهم حاجة :
.................[COLOR=rgb(71, 13, 13)]ارتفاع درجة الحرارة[/COLOR] ......................
ارتفاع درجة الحرارة أهم حاجة هنركز عليها ...
أي أب بيحترم نفسه وبيحترم أبوبته لازم يكون في بيته
ترمومتر
لاااااااااااازم
مفيش حاجة اسمها أنا حسيته لقيته دافي !!!!!!!!!!!!!!!!!!
الترمومتر بخمس جنيه ياخويا :)
أول ما تحس ان الواد ابنك دافي ... على طول تجيب الترمومتر وتحط الترمومتر تحت باطه ...
تحت باطه ..... ولمدة دقيقتين
درجة حرارة الطفل لو طلعتلك على الترمومتر 37 ... يبقى هي في الحقيقة ... 37 ونص
طيب ...
خد بالك من الرقم اللي جاي علشان مهم ...
لو وأنت بتقيس درجة حرارة الواد أو البنت ولقيتها على الترمومتر 38 ...
يبقى درجة حرارة هذا الطفل هي
38.5
وده رقم مهم علشان هنا هنستخدم مضاد حيوي !!!!!!!!!
أول ما تلاقي طفلك درجة حرارته 38.5 ... تعرف ان هذا التهاب باكتيري أو فيروسي تسبب في اضعاف مناعة الطفل فحدث التهاب فيروسي فوقه ... بنسميه : 2ry infection
طيب ... طول ما احنا أقل من 38 فاطمئن عزيزي المواطن أنت في خانة الأمان ...
هتدي الطفل أبيمول شراب والجرعة حسب السن .... وتشرب الطفل سوائل دافئة بغزارة ...
يعني ايه بغزارة ؟!!
يعني لتر ونص في اليوم مثلا ... مش تشربهولي كوبايتين وتقول لي غزارة !!!! :)
طيب ... في حاجة تانية ممكن نديها للطفل ؟!!
اه طبعا ... ممكن نديله أمبروكسول لو في بلغم ... والجرعة برضو حسب السن ....
الأمبروكسول منظم لحركة المخاط ودواء آمن ...
ممكن لو حسيت ان الرشح زايد قوي تدي مضادات للهستامين ... برضو الجرعة حسب السن ...
طيب في حاجة مهمة عاوزين نقولها :
الكونجستال دواء غير محبوب ... الأدوية اللي بتعمل انقباض للأوعية عموما التوصيات الدولية انها ماتستخدمش للأطفال ...
برضو الكورتيزون ومشتقاته ..علاجات ممتازة لكن لا تستخدم إلا تحت إشراف طبي ...
طيب كل ما سبق لو درجة الحرارة أقل من 38.5
طيب افرض بقى ياكبير درجة الحرارة
................... 38.5 .................................
هنا بقى ................
حمادة تاني خااااااااااااالص ...
طبعا لو حضرتك اكتشفت هذا الاكتشاف المذهل فأول حاجة هتحطها في دماغك :
التخطيط لزيارة الطبيب في أسرع فرصة ممكنة ...
لكن افرض اكتشفت الكلام ده بالليل ؟!!
أهم حاجة عندنا اننا نقلل درجة الحرارة بشكل عاجل ...
عادة مضادات الحرارة مابتشتغلش بعد درجة حرارة 38.5
.
.
.
. نعم ؟!!!
أمال هي فايدتها ايه ؟!!!
هي بتحافظ على درجة الحرارة بعد ماننزلها بال .....
كمادات
والكمادات دي ليها استخدام بطريقة معينة :
الكمادات مش مياه باردة ... الكمادات بمية الحنفيه الجاريه ...
أفضل الطرق انك تفتح مية الحنفية العادية في درجة حرارة 25 تقريبا وقلع الطفل وتحطه تحتها ....
أول ما الواد تحطه تحت الحنفية ... تسيبه كدة 5 دقايق ... وتخرجه ...
وقبل ما تخرجه تديله : أبيمول شراب الجرعة حسب الوزن ....
طيب هو ممكن نديله دولفين ؟!!
على الخلاف ... في توصيات دولية حديثة بتقول الدولفن غير آمن قبل سن سنتين ...
أنا شخصيا بدي عيالي دولفن لو اتزنقت ....
الأبيمول بقى ياجميل هتديه للطفل كل ست ساعات ... بس ماتستناش لما يسخن ...
لازم ياخده قبل ما يسخن ....
بمعنى : لو سبت الطفل يسخن ... الأبيمول مش هيشتغل فوق درجة حرارة 38.5
وبالتالي هتدخل في مشكلة انك تحط الطفل تحت الميه تاااااااااااااااااااااني !!!!!!!!!!
في نقاط مهمة :
لما تقلع الطفل وتحطه تحت الميه ... لازم المكان يكون مغلق باحكام ... لازم تنشفه بعدها كويس ... لازم تديله الأبيمول بعدها مباشرة ... لازم تخلي المكان مغلق بعد الكمادات لحد الطفل ما ياخد درجة حرارته العادية ...
طيب لو هتستخدم كمادات على شكل قطن وفوط هتحطها فين على جسم الطفل ؟!!
تحطها على مساحات جلد عاليه من جسمه ... تحت باطه أفضل الأماكن
كل ده مش علاج المرض .... ده للتحكم في درجة الحرارة فقط ...
طبعا لأنك أب محترم ... وبتحترم أبوبتك :) فترمومترك في ايدك ... وبتقيس كل شوية لحد ما الطفل درجة حرارته تستقر ....
استقرت ... بها ونعمة أول ما النهار يشقشق تاخد الطفل ووالدته على الطبيب ...
طيب افرض بقى ما استقرتش ؟!!!!
هتكرر المحاولة تاااااااااااااااني وتعمل كمادات تاااااااااااااااااني ....
لو استدعى الأمر تنقعه في طشت انقعه بس ماتفقدش السيطرة على درجة الحرارة ....
أنا شخصيا ... بدي لبوس دولفن حسب الوزن ...
طيب افرض عملت كل ده وبرضو الحرارة مانزلتش ؟!!
تاخد ابنك وأمه وعلى استقبال أقرب مستشفى علشان تعلق برفلجان ...
وده نادرا مايحدث ....
اطمئن الحرارة ان شاء الله سهلة ...
الطبيب هيديك مضاد حيوي لما توصل له بالسلامة وهنا نقاط مهمة :
أولا : تسمع كلام الطبيب في الجرعات وتكمل الكورس للاخر مش أول ما الطفل يخف تطنش !!
ليه ؟!
أولا ممكن يحدث انتكاسة
ثانيا : البكتيريا تقوم بتكوين مناعة وده بيخلي المضادات الحيوية غير فعالة
السوائل الدافئة بغزارة مهمة جدا جدا طول فترة العلاج ..
مهم قوي توضح للطبيب مدى إمكانياتك المادية وإمكاناتك في إعطاء الدواء للطفل ...
يعني أنا شخصيا أفضل العلاجات اللي بتتاخد عدد مرات قليلة علشان الأطفال متعبين في الدواء ...
هنضرب مثال : طفل عنده التهاب في اللوزتين وممكن نديله مضاد حيوي كل 8 ساعات فالطفل مابيحبش طعمه فيقعد يفلفص منك ويتف نص العلاج !!!
ده هيعمل مشكلة كبيرة في حساب الجرعة وهل الطفل أخد الجرعة كاملة ولا لا ...
في حين إن مضاد حيوي اخر يتم اعطاؤه مرة واحدة يويما سيعفينا من تكرار المشكلة ...
في حاجة تانية نحب نضيفها ؟!
اه ... الطبيب ده مش ساحر ... ومش بينجم ... لازم تديله كل المعلومات مهما بدت لك عبيطة وهبلة ...
هنضرب :
مثال :
طفل عنده 4 سنوات أصيب بالتهاب في الحلق ...راح للطبيب فالطبيب كتبله ديوراسيف شرب 250 ووصفه لمدة أسبوع بالجرعات المناسبة لوزن الطفل ...
أم الطفل قامت بإعطائه العلاج 3 أيام فقط والطفل تحسن فتوقفت عن العلاج ...
الطفل بعد يومين رجع تعب تاني ... فوالدته رجعت للعلاج تاني لكن الطفل ازداد سوءا !!
راحول لطبيب تاني .. لازم تقول للطبيب انه أخد العلاج الفلاني علشان الطبيب مايوصفلكش نفس العائلة العلاجية أو نفس العلاج بمسمى تاني ...
في حاجات تانية ؟!
اه :
الكورتيزون ومشتقاته في العلاج : مهم جدا جدا جدا ... ولا يستخدم الا تحت اشراف طبي
شغل بقى : أنا يادكتور مابحبش الكورتيزون !! ده شغل قديم وفاكس وحوار اتهلك خلاص ...
المفروض احنا في زمن فاهمين كويس ان الكورتيزون ده مادة يتم افرازها في الجسم أصلا وأنه مثله مثل أي علاج له أضرار كما له مميزات ...
وأحب أحكي قصة طريفة : مرة كنت نبطشي 24 ساعة وجالي طفل في أزمة تنفسية وتدرجنا في العلاج وكان لازم يخد حقنة كورتيزون ... وفجأة الساعة 3 الفجر ألاقيلك أم الطفل بتقول : لا يادكتور أنا مابحبش الكورتيزون !!
طبعا أنا صاحي بقالي كتير قوي :) ومش مستحمل كلمة من حد ... ونبطشي طواريء وفيا اللي مكفيني ... فانطلقت في الأم يعيني وبعلو حسي : أنت مييييييييييييين علشان ماتحبيش الكورتيزون .... تعرفي أنت ايه عن الكورتيزون أصلا ؟!!
الست ارتعبت من منظري لأن عيني حمرا وحالتي بالبلا ... وأنا في الاستقبال عندي اللي في حادثة واللي بينزف واللي في جفاف ومش ناقص أي كلمة فزلكة من أي حد :)
طبعا أنا غلطان وماينفعش الواحد يتنرفز على مريض مهما تكن الظروف ربنا يسامحنا ..
المهم ...بلاش تعمل نفسك علامة زمانك وبحب ومابحبش ... ممكن تصيغ اعتراضك بشكل لطيف زي : يادكتور أنا سمعت ان الكورتيزون وحش فهل في حاجات أو اجراءات معينة أتخذها أثناء استخدامه ؟!!
ساعتها هتجد كل ترحيب لأن حقك تعرف انت بتاخد ايه ... لكن مش حقك تبدي رأيك العلمي في الهندسة وأنت طبيب :)
نقطة كمان : مفيش حاجة اسمها طفل عنده اللوز قبل سنتين ... لأن اللوز بتكون لسة ماتكونتش أصلا
نقطة كمان : ودي في منتهى الأهمية : أحيانا عيان الهاب اللوزتين الصديدي يجي العيادة بعرض غريب جدا !!
الترجيع !!!!!!!!!!!!!!
طفل بيرجع .... وهنا ماتستغربش كأب لما تروح للطبيب علشان ابنك بيرجع تلاقيه بيكتبلك علاج التهاب لوز !!!
الفكرة ان الصديد ممكن ينزل على المعدة يعمل تهيج لأغشيتها المغاطية فيحصل ترجيع ..
نقطة كمان مهمة : بعد الالتهاب بيكون في سوائل مخاطية في صدر الطفل ... خروج هذه السوائل من علامات الشفاء ... وبالتالي ماتستغربش أيها الأب إن بعد العلاج وبعد ما بدأت تحس ان الطفل بيتحسن تلاقيه بيكح !!! عااااااااادي جدا ... وهنا تأتي أهمية السوائل ... البلغم مش هيخرج من صدر الطفل بودرة :) محتاج ميه علشان يدوب فيها ... لذلك جسم الطفل لازم يفضل غني بالمياه Well Hydrated
انفتاح الشهية
هي أول علامة هتعرف بها ان العلاج بدأ يدي مفعول في مريض الالتهاب البكتيري خاصة اللوزتين والحلق
كل ماسبق كان عن التهابات الجهاز التنفسي العلوية ...
التهاب الجهاز التنفسي السفلي يحتاج زيارة طبيب ...وأي ضيق في التنفس لازم تروح أقرب استقبال طوارئ أطفال بشكل عاجل


يارب أكون قدرت أفيد في هذا البرد القارس ...
أسأل الله أن يشفي مرضانا شفاءا لا يغادر سقما وأن يلطف بعباده إنه لطيف خبير

تسلم الايادى يا كبير وربنا يجعلة فى ميزان حسناتك ان شاء الله