هل ينفع أروح مصطفى النحاس (الحديقة الدولية) من المهندسين بالدائري؟

السلام عليكم،،

أنا ساكن قريب من المهندسين، على طول بروح مصطفى النحاس ـ مدينة نصر عند الحديقة الدولية بالظبط، طريقي المعتاد:

أحمد عرابي ـ طريق العجوزة ـ أطلع كوبري أكتوبر ـ طوالي ـ نزلة طريق النصر ـ أخش من جنب المنصة ـ مصطفى النحاس ـ الحديقة الدولية

سعات كتير الطريق ده بياخد حوالي ساعتين، خصوصًا لو وقت الذروة في المهندسين وفوق كوبري أكتوبر، عشان كده عايز أستكشف طرق تانية، أنا طلعة الدائري قريبة مني، وفي ناس صحابي بيروحوا من عندنا من الدائري للتجمع الخامس بالدائري على طول، بصيت في الخريطة لقيت التجمع جنب الدائري أساسا إنما الحديقة الدولية بعيدة شوية، يا ريت لو حد يوصفل أروح الحديقة الدولية إزاي بالدائري، عشان أجرب ولو طلع الطريق ده أقصر في الوقت يبقى أفضل..

الدائري تمشي فيه باتجاه التجمع وتنزل نزله القطاميه أول ما تنزل هتلاقي مستودع أنابيب تاخد منه يوتيرن وتدخل تحت النفق اللي على شمالك وتمشي على طريق الوفاء والامل لحد ما تلاقي مستشفى الشرطه وبعدها بنزينه التعاون تدخل من جنبها يمين هتلاقي ميدان خد منه شمال ده كده عبد الله العربي امتداد الطيران تمشي لحد ما تلاقي مطعم البرج على يمينك ادخل منه يمين كده انت في مصطفى النحاس.

كوبري أكتوبر طبعا أقصر بس وقت الزحمه الدائري أسرع ولو انه أطول في المسافه.

لو معاد وقت الذروه صباحا او مساءا يبقى اكتوبر افضل .... لى صاحبى ساكن فى زايد و شغله فى التجمع و بياخد طريقك ه و ميخدش الدائرى و لما سالته ليه قالى اكتوبر اخرى ساعه او ساعه و نص بينما الدائرى لو وقف فيها ٣-٤ ساعات

بلاش دائري ، المسافة بتاعتك حوالى 20 كيلو

بالدائري هيبقى قدامك طريقين يا اما 44 كيلو يا اما 60 كيلو ! ، والمصيبة انك هتقف كتير برضو في اوقات الذروة زي كوبري اكتوبر وانيل شوية بالاضافة ان اخطار الدائري اكتر من جوة البلد ، والشوية اللى هيبقوا سالكين ، هم دول اصلا المسافة الزيادة ، يعنى مش هيجد عليك غير استهلاك بنزين زيادة وخلاص وغالبا الوقت هو هو عن تجارب


اقتراحى ليك كطريق بديل تاخد كوبري 15 مايو من جامعة الدول لحد الكورنيش ( وزارة الخارجية ) (بدل اكتوبر ) الوصلة دى غالبا اروق بكتير من كوبري اكتوبر

وبعدين تكمل لعبد المنعم رياض ، وبعدين شارع رمسيس ... الى غمرة الى العباسية وتكمل طوالى بعد نزلة كوبري العباسية وتطلع طلعة اكتوبر من هناك وتنزل الاوتوستراد وتكمل زي ما انت متعود ، ( مع انه الطريق التقليدي بس في الذروة بيبقى احسن حاجة !) يعنى تقريبا نفس طريقك بس بدون كوبري اكتوبر اللعين


ده كحل الى حد ما لمشكلة زحمة اكتوبر في الذروة ..

انما لو الطريق فاضى ( في الرجوع مثلا ) فطريقك طبعا هيبقى احسن طريق فيهم كلهم

و ممكن كوبرى الفنجرى و كوبرى القبه بتطلع على سبرا و كورنيش ل ١٥ مايو ... فكره برضه

ألف شكر يا جماعة، النهاردة رحت من أكتوبر برضه، أنا هجرب الدائري بعدين من باب الفضول لما يكون عندي وقت.