الموضوع: التشنج الحرارى عند الاطفال

السلام عليكم ورحمة الله وبركاته
بنتى عندها سنتين ونصف
من سن 9 شهور كانت سخنت والحرارة وصلت الى 39 وحصل تشنج وجسمها ازرق ثم ابيض ثم اتخشبت
طبعا جرينا بيها على مستشفى تبارك للاطفال وتم وضع محاليل والحمد لله الحرارة نزلت
تكرر الموضوع مع كل نزلة برد مرة تسخن ومرة لأ
فى الاونة الاخيرة جالها التهاب فى زورها وكان التهاب بسيط لكنها قعدت 3 ايام تسخن
لدرجة انه ممكن اقيس الحرارة الاقيها طبيعية وبعدها بـ 5 دقائق اقييس الاقيها سخنت يعنى الحرارة بترتفع بسرعة رهيبة لدرجة ان مثلا 2 دواء السخونية كل اربع ساعات بالتبادل تاخد الدواء الاول وبعد ساعتين تسخن تانى مع العلم ان البنت فى الظروف العادية طبيعية جدا

تم العرض على دكتور الاطفال الخاص بيها وقال ان فى نسبة كبيرة من الاطفال عندهم التشنج الحرارى دا ودا بقا عادى اليومين دول واكد انى اخد بالى من الحرارة دائما وادوية السخونية والكمادات

تم العرض على دكتور متخصص حميات
اكد نفس الكلام ولكن زيادة ان اول ما تسخن اضع راسها وليس اطرفها تحت الماء وان نمو الجهاز المسئول عن الحرارة فى جسم البنت لم يكتمل بعد وسوف يتم اكتمالة عند بلوغ سن 6 سنوات وزاد القلق بقولة ان ممكن الوضع يتطور الى مرض صرع واعطاها مضاد حيوى ومضاد للحساسية وطبعا كان فى زيادة فى التهاب الزور نظرا للحالة الجوية المنيلة بنيلة

تم العرض على دكتور مخ واعصاب وقال ان التشنج الحرارى هى حالة صرع مؤقت فعلا ولابد من اكتشاف سبب السخونية وعمل رسم مخ واشعمة رنين على المخ مع التاكيد ان المشكلة سوف تنتهى فى سن 6 سنوات ولو حصلها الموضوع دا تانى على فترات متقاربة هتاخدج ادوية صرع

الموضوع صعب انك طول الشتاء ماشى بميزان حرارة - طول الشتاء مفيش خروج من البيت- طول الشتاء البنت داخل غرفة مغلقة ( مؤخرا بسبب تطور الحالة)

انا قربت السع من كتر اللف
السؤال
1) اذا كان فية دكتور فى المنتدى متخصص فى الموضوع دا ياريت يطمنى
2) ربنا يعافينا ويعافى اولادنا جميعا لكن اللى انا عرفته ان فى اطفال كتييير عندهم نفس المشكلة فلو فى عضو من اعضاء المنتدى عنده طفل يمر بهذة الظروف ياريت يفيدنى

نسالكم الدعاء

السلام عليكم ورحمة الله وبركاته
اخوكم فى المنتدى استشارى طب الاطفال
واحب ان اقول للاخ صاحب المشكله
ان حوالى 5% من الاطفال عرضه للاصابه بالتشنجات الحراريه
وهذه التشنجات عند حدوثها لابد من التمكن من فتح مجرى التنفس حتى لا يحدث اختناق لاقدر الله
مع ضروره تخفيض درجه الحراره بالكمادات او الوضع تحت الماء اذا كانت الحاله تسمح بذلك وممكن اللبوس الشرجى
وهكذا-واعطاء الحقن المانعه للتشنجات عن طريق الاطباء فلابد من الذهاب بسرعه لاقرب مركز طبى لديك
اما بالنسبه لسبب ارتفاع حراره الجسم
فاحب ان أقول ان ارتفاع حراره الجسم عرض وليس مرض
بمعنى ان المرض مثل التهاب اللوزتين او الحنجره مثلا يؤدى الى ارتفاع درجه الحراره
والالتهاب الشعبى وهكذا كله يؤدى الى ارتفاع درجه الحراره
المهم فى حاله اهالى الاطفال المصابين بالتشنجات الحراريه
فانا أقول دائما لا تنتظر حتى تتاكد من ان طفلك ساخن
بل لمجرد الشك فى انه دافىء بادر باعطاء مخفضات الحراره
فى صوره شراب او لبوس وان لم يوجد كمادات ماء بارد على الجبهه والاطراف
وفى الحالات الشديده الحراره حمام ماء بارد..يعنى تحط الطفل تحت الدش
طبعا وجود ترمومتر طبى له اهميه كبرى فى المنزل
مع الذهاب لاقرب طبيب
بالنسبه للخطوات الواجب عملها بعد ذلك
عمل رسم المخ كما فى حاله الاخ العضو
واذا ظهر كما هو واضح من تقرير رسم المخ
انه حاله نوبات صرعيه (ارجوا عدم الانزعاج من كلمه صرعيه لانها التعبير الطبى السليم ونحن فى مصر جملناها
و اطلقنا عليها كلمه كهربه زياده فى المخ )
والمفروض الذهاب الى اخصائى امراض عصبيه لاخذ العلاج المناسب لسنه
والحاله العامه استجابتها حسنه جدا وتاخذ علاج من سنه ونصف الى سنتين
وتزول الحاله تماما ولايصبح هناك اى قلق بعد ذلك
ملحوظه:_انا مستغرب من ان طفلتك شفاها الله
عندها سنتين ونصف والتسنجات تحدث لها من عمر 9شهور ومتكرره
واخصاثى المخ والاعصاب لم يعطها العلاج المناسب واكتفى بالقول ان الاعراض ستزول
عند عمر 5 او6 سنوات..الحقيقه انا مقتنع بالكلام ده
وتقبل تحياتى وامنياتى بالشفاء العاجل لابنتك
والسلام عليكم ورحمة الله وبركاته