قدرت اقنع زوجي بالعمل ولكن واجهتني مشاكل كتير ساعدوني لاني محتارة

**إنسانة** · 16-12-2013 11:57 AM

نزلت مشكلة من حوالي 6 شهور هنا

بعنوان : مشكلتي مع جوزي معقدة ياريت القى حل مناسب

اتبعت النصائحكم والحمدلله فادتني جدا و قدرت انفذ الي ناسبني بقدر الامكان وعمري ماهنسالكم دعائكم ونصائحكم مش عارفه اشكركم ازاي

معلش هتعبكم معي لاني انا طلعت من البيت لاول مره اختلط بالمجتمع يمكن في حياتي وحصلتلي مشاكل

اختصارا

اقنعت زوجي بموضوع الشغل بالموت طبعا

ودخلت فترة تدريب في مركز طبي وتم قبولي بعد 3 شهور تدريب للوظيفة والمرتب 9000 الاف ريال

زوجي هياخد 6 منها وانا هاخد 3

مرتب كويس ووظيفة كويسة لكن فيه مشاكل حصلتلي وانا حاسه على طول اني بعمل حاجة غلط ومتكلمتش لحد باللي حصل ودي اول مره هقول وياريت تفيدوني اعمل ايه

يتبع

**إنسانة** · 16-12-2013 12:02 PM

اولا زوجي لما شافلي الوظيفة شفهالي في قسم نسائي وهي فعلا في قسم نسائي ولكن

انا لما دخلت التدريب لقيت ان عملي مرتبط مع فريق عمل من اقسام وعيادات تبع المركز لكن خارج القسم النسائي و اعتقد انه ميعرفش النقطة دي لانه لو يعرف مكنش وافق

هو اصلا وافق على المركز دا بالموووت

اجتماع فريق العمل كل يومين ساعتين او اكتر او اقل على حسب عدد الحالات اللي بيكون عندها مشكلة

المشكلة ان فريق العمل فيه شخص عرف وضعي والشخص دا انا حاسه ان تعاملو معايا اتغير من بعد ماعرف المشكلة

عرف عن طريق وحده كنت بسئلها عن حد متخصص لبنتي لان بنتي بتقلدني في كل حاجة فكانت عايزة تعرف الاسباب فقلتلها مش بتشوف حد غيري ودا السبب من وجهة نظري

فقالت ليه وحكيت لها عن وضعي وهي الوحيده الي عرفت مشكلتي لكن مع الاسف مكنتش على قدر الثقة وراحت قالت الكلام الله اعلم لمين

والاخصائي دا قالي انه عرف عن طريقها وهو مكنش عنده فكره عن وضعي وقالي الناس هنا مش امينة والكلام دا خطير لو حد عرفه << انا معرفش انه خطير !

فقلتله ليه خطير ؟ قالي ممكن حد يفهم انك لوحدك ويضرك

وبدأ يسئلني انتي ليه قبلتي على نفسك كدا فكنت مضطره اقوله اني مجبره وانا عمري ماكنت هقبل لاي سبب قالي طيب هي الست دي بتقول عنك كلام مش كويس وانا رديت غيبتك

متكلمتش ومسألتش ليه حبيت اختصر بقدر الامكان الكلام مع اني كان نفسي افهم ليه بتقول عني كلام مش كويس انا عملت ايه مش كويس او ضريتها فايه

وحتى مسالتهاش سكت وخلاص

يتبع

**إنسانة** · 16-12-2013 12:08 PM

لكن من بعدها والشخص دا بيعاملني معاملة مختلفة وانا نفسي عندي مشكلة بتظهر مع الناس كلها لما بتكلم مع الناس بتكلم بارتباك وبفكر في كل كلمه قبل ماقولها

لكن لما بتكلم معاه مش بحس باي خوف ولا برتبك ولا بفكر في كلامي بتكلم طبيعي جدا

فليه بيحصلي كدا

خايفة من الوضع دا ومش عارفة ازاي ممكن اشتغل وهل دا طبيعي ولا لا

وسبب خوفي مش بس موضوع الاجتماع

خوفي من الاخصائي دا اكتر بكتير لان معاملته مختلفة وحصل كذا موقف فدا مش مجرد احساس او شك دي حاجه انا تاكدت منها

اخر موقف الكل حس بيه مش انا بس كان عندي مشكله مع حاله بعرضها للدكتور وقالي حاضر بكره جهزي نفسك هشرحلك تتصرفي معاها ازاي

وجيت تاني يوم نسيت القلم والمسجل وحتى الموبايل في القسم النسائي فلما روحت الاجتماع بدونهم الدكتور شبه اداني درس ومرضيش يخليني انزل اجيبهم

فهو طلع قلم من جيبه وكلم الدكتور بعصبية

قاله الموضوع مش مستاهل كل الناس بتنسى مش حاجة تدل على التقصير فالدكتور قاله انا بعلمها مش موضوع قلم فقاله طيب ملاحظه مكتوبة تكفي مش بالشكل دا

وطول الاجتماع شادين مع بعض على كل كلمة

فالدكتور ناداني مكتبه بعد الاجتماع وقالي انا مكنش قصدي احرجك لكن لازم ادواتك تبقى معاكي ودا مش عشاني دا طول العمر شنطة صغيره وحطي فيها نماذج الاختبارات وورق التقييم وقلم رصاص وورق فاضي ومسجل صغير

دي كلها متطلبات شغلك تبقى فايدك على طول

فقلتله انا اسفه على اللي حصل بس انا معرفش هو عمل كدا ليه قالي بصي دا شيء راجعلك بس انا بقولك خلي بالك انتي زي بنتي ودا يعتبر تجاوز عليكي مش عليا

فلما طلعت ونازلة عشان ارجع القسم بتاعي لقيته فوشي قالي كنتي فمكتبه ؟ قلتله انا اعتذرت عن سوء التفاهم الي حصل بسببي وبعتذرلك كمان

قالي وانتي اش دخلك ؟ انا الي كلمته يكلمني زي الراجل قلتله يكلمك وتكلمه ليه ؟ انا غلطانه ودا دكتور و كبير يمكن فعمر والدك مش حابه تتكلم معاه كدا بسببي بينكم شيء خاص طلعوني برا الموضوع

قالي صحيح منتي متعودة تتكلمي مع الي فعمر والدك //يقصد جوزي//وقالي دخلتي عنده بكل ثقه طار الخوف ولا عشانه مصري زيك ومشي

لكن دا موقف بينلي ان تعامله مش تعامل حد طبيعي وحصل كمان موقف بينلي انه تعامله مش عادي

وانا مش عارفه هو ازاي شخص يتكلم بالشكل دا وكانه يعرفني من سنين !

فبقيت حاسه ان الشغل في المكان دا عمري ماهقدر امشي فيه بدون مشاكل وانا عموما عارفه نفسي مش هعرف اعملي حدود واكلم الناس بشكل حازم

وفنفس الوقت مش عايزة استسلم بسرعة لخوفي وافشل من اول محاولة وخصوصا ان دي مشاكل عندي هتظهرلي فاي حتة

فساعدوني لاني محتاره

هل اقبل الوظيفة بالوضع دا ولا ارفضها وارجع للوضع المأساوي اللي كنت عايشه فيه في البيت

**تامر.محمد** · 16-12-2013 12:16 PM

سلام عليكم

هاحاول اوصل وجهة نظري باختصار

دايما اي واحدة ست تتحط في الموقف ده بيبقى قدامها حل من اتنين

يا اما يبقى لديها من الحسم و الشخصية انها تحط كل واحد على بعد معين هي اللي بتحدده و بتقيم حدود على البعد ده

يا اما تتنقل من المكان نفسه لمكان تاني

و الاولاني لو تقدر تعمله بصورة دائمة و مستمرة و عامة يبقى افضل , لو ما تقدرش يبقى التاني

**Eng_hatemfathy** · 16-12-2013 01:03 PM

السلام عليكم
لم اطلع على الموضوع الاول ولكن الموضوع التانى فيه ما فيه ويغنى عن الاولوارجوا انت تتقبلى كلامى وان كان قاسيا
اولا لا تخفى قيد انملة عن زوجك لان المجتمع جعل الرجل يشك فى نفسه فما بال زوجته وقد عمت البلوى الا من رحم ربى وللاسف فى صفوف من يحسبهم الناس على خير فاصبح للشيطان طريقا سهلا لعقول الازواج واصبح من نحسن الظن برجاحة عقله معرضا لان يشك فى زوجته بسبب مكالمة خاطئة او ما شابه ذلك فنصيحتى اختى الكريمة لا تخفى شيئا عن زوجك ايا كان وضعه فطالما زوجك فله حق وحق له ان يغار ويقرر ما يثير غيرته وما لا يثيرها والرجال شتى منهم المتوسط منهم الزائد فاخبريه بالله عليكى ودعى له قرار الاستمرار او الترك مهما كانت تنتائج الترك
ثانيا العمل المختلط مفسده لقلوب الرجال والنساء معا وقد عملت سنوات فى بيئة رجالية وكان الاتصال الوحيد بالنساء تليفونيا وليس مشاهدة وكان نادرا وكنت حينها اضبظ الاختلاط بقواعده ولما انتقلت الى الادارة واصبح الاختلاط ديندننا تغيرت كليا وجزيئيا وتساهلت فيما كنت اراه من عظائم الامور والتساهل فى الكلام هذه الايام اصبح لا حرج عليه ولا حياء والامور لا تبدأ سهله ولكن للشيطان مداخل ويعرف طريقه الى القلوب ايما معرفة وان كنت ممن يعتبر "انسان طيب" فانت مطمع للكثير الا ما رحم ربى فلا تفتنى نفسك وغيرك واتركى اى عمل مختلط ولو ساعة فى الاسبوع
وأسأل الله ان يسدد خطاك ويعصمك من كل ذلل
قد يرى البعض فى ردى شدة او تشديد ولكن هذا ما ارضاه لزوجتى وابنتى واختى وان كنت اخالفه فلا ارض به

**hnh_75** · 16-12-2013 01:17 PM

كم اهلكت ودمرت (الريالات) عائلات مصرية في جريه وراء المال......ما يحدث معك هو جرس انظار ...انجي بنفسك من مرض الخليج

**friendship7897** · 16-12-2013 01:29 PM

بصي يا صديقتي الإنسانة

الست اللي بتشتغل دي ست قوية وواعية ومسؤلة وتعرف هدفها وتسعى له
والرجالة اللي في الأعمال بيكونوا عرفين وفاهمين كدة ، وحتى لو هي مش كدة
ومتوقعين إنها ست متحررة وبتفهم كل حاجة
فعلشان كدة لازمي تكوني آد فكرهم في أنك ست قوية ، وتصديهم في أنك ست متحررة
فأوعي تكوني مستعبدة ومستغفلة ومستغلة
فأنتي كما أتذكر من موضوعك السابق لا تحتاجين المال ، وحتى لو محتاجة
فلازم توقفي كل واحد عند حدة ، ولا يتعداه أي حد مهما كان منصبه أو طريقته أو نيته
ومتخليش أيدك تحت ضرس حد
وحاول تكوني قوية مع هذا الإخصائي أو أي حد تاني مهما كان
وأفتكر موقف قرأته وأضعه أمامي في كل تصرفاتي في عملي
موقف هند بنت عتبة
لما وقفت للفاروق رضي الله عنه ( الفاااروق ) في المسجد ترد عليه الكلمة بالكلمة وأستشهدت بآية من القرآن حتى قال: أصابت المرأة و أخطأ عمر.
فمتخافيش من حد وخليكي آد المكان اللي أنتي وضعتي نفسك فيه وأنت غير مضطرة
وأعرفي أن القطة رغم ضوافرها وخرابشها فهي محبوبة للجميع
بس الكل وهو بيتعامل معها بيحترسوا منها ومقدرين زكائها
وربنا يقويكي – أنت ست طموحة وشخصيتك قوية رغم عدم إعترافك بدا
لأنك بتحققي اللي أنتي عايزها – فحطي أمام إن سمعتك وسمعة زوجك وسمعة أبنتك من أهدافك
فتأكدي : بشخصيتك دي هتعرفي تحافظي عليهم كويس جداً

**Eng_hatemfathy** · 16-12-2013 03:51 PM

المشاركة الأصلية كتبت بواسطة friendship7897

بصي يا صديقتي الإنسانة

الست اللي بتشتغل دي ست قوية وواعية ومسؤلة وتعرف هدفها وتسعى له
والرجالة اللي في الأعمال بيكونوا عرفين وفاهمين كدة ، وحتى لو هي مش كدة
ومتوقعين إنها ست متحررة وبتفهم كل حاجة
فعلشان كدة لازمي تكوني آد فكرهم في أنك ست قوية ، وتصديهم في أنك ست متحررة
فأوعي تكوني مستعبدة ومستغفلة ومستغلة
فأنتي كما أتذكر من موضوعك السابق لا تحتاجين المال ، وحتى لو محتاجة
فلازم توقفي كل واحد عند حدة ، ولا يتعداه أي حد مهما كان منصبه أو طريقته أو نيته
ومتخليش أيدك تحت ضرس حد
وحاول تكوني قوية مع هذا الإخصائي أو أي حد تاني مهما كان
وأفتكر موقف قرأته وأضعه أمامي في كل تصرفاتي في عملي
موقف هند بنت عتبة
لما وقفت للفاروق رضي الله عنه ( الفاااروق ) في المسجد ترد عليه الكلمة بالكلمة وأستشهدت بآية من القرآن حتى قال: أصابت المرأة و أخطأ عمر.
فمتخافيش من حد وخليكي آد المكان اللي أنتي وضعتي نفسك فيه وأنت غير مضطرة
وأعرفي أن القطة رغم ضوافرها وخرابشها فهي محبوبة للجميع
بس الكل وهو بيتعامل معها بيحترسوا منها ومقدرين زكائها
وربنا يقويكي – أنت ست طموحة وشخصيتك قوية رغم عدم إعترافك بدا
لأنك بتحققي اللي أنتي عايزها – فحطي أمام إن سمعتك وسمعة زوجك وسمعة أبنتك من أهدافك
فتأكدي : بشخصيتك دي هتعرفي تحافظي عليهم كويس جداً

معذرة النصيحة دى لم تتجاوب مع الحدث التى هى به الان ويتلخص فى امرين
الاول -هل تخبر زوجها باوضاع العمل وتتحمل نتيجة وصوال المعلومة له الان ام تخفيها وتتحمل عواقب الاخفاء بجانب الاثم ان كان يرفض هذا الوضع حين يعلمه او امرها بعكسه
ثانيا -ما موقفها فى العمل وقد علم عنها امور خاصة قد تستخدم اداة ضغط وقد وجد بالفعل من اصبح سبيلا للفتنه سواء لنفسه او لغيره ولا يعلم ماذا تخبأه الايام

هذه النقاط يجب ان تحظى بنصح لانها محور الاستشارة على قدر ما فهمت وفهم الاخوة
وقد يكون ما وصل للاخت friend ship واجابت عنه هو مطلق العمل والحفاظ على النفس ضد اى طامع او منتهز او ....... الخ
الامر لا يتعلق باثبات الذات او القوة او ما شابه
الامر يتعلق بشخصية معينة فى موقف معين امام اناس معينين وبالتالى النصح يجب ان يركز على الحالة المعينة وليس مطلق الامر

-

الموضوع: قدرت اقنع زوجي بالعمل ولكن واجهتني مشاكل كتير ساعدوني لاني محتارة

LinkBack

أدوات الموضوع

عرض

-

-

-

-

المواضيع المتشابهه

مشاكل كتير ومش عارف اروح فين ؟

استلمت الكروز ولكن...لو سمحتوا ساعدوني

عندى مشاكل كتير و عايز مساعدة

أشتري فليشيا ولا فيها مشاكل كتير؟

ماتريكس ولا Sx4 هاتشباك...ساعدوني انا محتارة

الكلمات الدلالية لهذا الموضوع

المفضلات

المفضلات

ضوابط المشاركة