هندسة البترول والتعدين - جامعة السويس للعاطلين

**mustafavet** · 16-12-2013 12:21 PM

السلام عليكم
انا اخويا خريج بترول وتعدين قسم بترول بتقدير جيد جدا مع مرتبة الشرف ومش لاقي شغل
انا مش عارف المفروض نعمل ايه ف البلد دي لما يبقي خريج احسن كليه ف مصر مش لاقي شغل
الموضوع دا مازمني انا نفسيا اكتر منه لاني للاسف كنت سبب انه يدخل الكليه دي بعد ما قعدت اقنعه ان هندسة احسن من الطب لكن انا كنت غلطان
صحيح الطبيب مرتبه بسيط بس ف الاخ بيلاقي شغل في مجاله. صحيح هو متعب بس مع الوقت بيتحسن
يعني لما واحد يحب يشجع طفل لسه علشان يجتهد المفروض يعمل ايه
يقولي يا بني احرق نفسك علشان تتخرج وتقعد علي مصطبة العاطلين؟؟؟؟؟؟؟؟

**ahmedteam** · 16-12-2013 12:51 PM

خلى فى بالك انت و اخوك ان الرزاق هو الله بيرزق الطبيب و المهندس و الجاهل و الموضوع ملوش دعوه بالتعليم

خليه يعمل اللى عليه و يتوكل على الله قال تعالى "وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْراً"

و قال رسول الله صلى الله عليه و سلم ( لو أنكم توكلتم على الله حق توكله لرزقكم كما يرزق الطير تغدو خماصا وتروح بطانا)

**احمد المصرى** · 16-12-2013 12:58 PM

المشكله مش كليه ايه اطلاقا دى مشكله جيل مش فرد لوحده

**ahmedkhairy** · 16-12-2013 01:33 PM

ان شاء الله ربنا يوفقه

**monamize4** · 16-12-2013 01:38 PM

تصدق ان انا كنت فاكر ان خريج هندسة السويس بعد ما بيتخرج على طول
بيبدأ يجمع ف الملايين

لحد ما قابلت واحد صاحبى لسه متخرج و مش لاقى شغل و بالتالى بيشتغل ف محل ابوه
و قعد يحكيلى عن مأساته و ان الحكاية مش زى ما انا فاكر

و ياريت يا جماعة نسيب الدكاترة ف حالهم ,,, دول اغلب من الغلب

**أحمد كمال** · 16-12-2013 02:52 PM

باشا

خليه يدور في شركات البترول العالمية زي بيكر هيوز و هاليبرتون و غيرها

و يقدم على مواقعها جوة و برة مصر

و ربنا يوفقه

**Amr_tika88** · 16-12-2013 08:57 PM

انا خريج اقتصاد وعلوم سياسية ونفس الوضع وحاليا بعمل career shifting
لاني علشان اعمل نفسي في المجال ده محتاج اكون من الاخوة بتوع السبوبه وانا ارفض الكلام ده رفضا قاطعا
علشان كده اخدتها من قاصرها وحولت علي مجال اللوجستيات والنقل
وانا انصح اخوك يفكر في نفس المجال ده ويعمل مثلا دبلومة او اي شهادة في في مجال تاني زي ال project management
لان من الواضح ان حاليا اي بكالوريوس مبقاش ياكل عيش