الموضوع: اريد حلا ... فاتورة USB Modem من فودافون بقيمة 483 فى شهر ؟؟؟

الحكاية بدأت من شهر يناير اللى فات كان عندى مشكلة مع بتوع تى اى داتا والنت عندى كان مقطوع وكنت رايح فرع فودافون ادفع فاتورة موبايلى اللى هو كان على نظام ايزى وكانت الفاتورة ساعتها بدفعها 57.5 وانا بدفع الفاتورة قاللى حضرتك ليك هدية USb Modem من فودافون وحضرتك ليك حرية الاختيار بين الباقات المهم اخترت باقة ب 25 جنيه فالشهر تضاف الفاتورة بتاعتها على فاتورة الموبايل يعنى اجمالى كنت ادفع حوالى 85 جنيه وقعدت فترة 3 شهور على الوضع ده لغاية ماربنا كرمنى والنت اشتغل من تى اى داتا (ملحوظة : لما ال 25 جنيه اللى هم ليهم ليميت معين كانو بيخلصو كانو بيدونى اختيار انى اشترى 1 جيجا = 1024 ميجا ب 20 جنيه) المهم ساعتها وقفت الخدمة من الفرع ونسيت الموضوع على كده واترمى اليو اس بى فى الدرج على كده ماهو محدش هيبقى عنده نت فالبيت وهيستخدم يو اس بى المهم ربنا كرمنى بشغل جديد وسيبت شغلى القديم الكلام ده كان فى شهر فبراير وعرفت فى شغلى الجديد انهم بيدو خطوط بيزنس بقيمة شهرية ثابتة المهم انا مكنتش عايز اغير رقم تليفونى اللى كان بقاله معايا عشر سنين فالمسئول عن الخطوط نقل ملكية الخط بتاعى من على اسمى على اسم الشغل والكلام ده كان فى شهر 6 اللى فات....
كل الكلام اللى فات مقدمة للى حصل من حوالى 3 اسابيع
حد كلمنى وقاللى انا فلانة الفلانية من الشئون القانونية لشركة فودافون وحضرتك عليك متأخرات بقيمة 483 جنيه طبعا فى الاول قلت ده حد ناوى ينصب عليا لكن بعد ماقفلت بعدها بعشر دقايق حد كلمنى تانى وبرده قال نفس الكلام بس مقالش اذا كانت فاتورة على الموبايل ولا اليو اس بى المهم طبعا انا افتكرت انها فاتورة الموبايل وقلتله لا انا بسدد الفواتير فى ميعادها للمسئول عن الخطوط فالشغل عندى وقفلت على كده وبلغت المسئول عندى فالشغل بالكلام اللى حصل قاللى لا المفروض لو فى حاجة يكلمونى انا المهم من يوم الاربعاء اللى فات واحد كلمنى وبيقوللى برده عند حضرتك فاتورة متأخرة قلتله فاتورة ايه قاللى فاتورة يو اس بى قلتل حضرتك انا واقف الخدمة عليها من بدرى جدا قاللى لا حضرتك متسجل عليك الفاتورة دى ويا الدفع يا يتعمل قضية ويتبعت لحضرتك انذار يوم السبت اللى هو اللى فات ده قلتله على العموم انا هروح اقرب فرع واشوف ايه المشكلة رحت الفرع اللى اخدت منه اليو اس بى هدية لقيت طقم Stuff اللى كان موجود مشى وفيه طقم جديد المهم واحد سألنى ايه المشكلة سردت له الواقعة وان المفروض ان اكون وقفت الخدمة واللى وقفهالى موقفهاش ليه قاللى حضرتك الطقم القديم مشى من شهرين وانا مش هاقدر اعمل لحضرتك حاجة قلتله يعنى ايه يعنى عايزينى ادفع 483 جنيه على فاتورة من شهر 5 اللى فات طيب محدش بلغنى ليه قاللى حضرتك الرقم اللى كان بيتبعت عليه الفواتير اتنقل ملكيته من حضرتك او اتقفل قلتله يعنى مفيش اى وسيلة كان ممكن اتبلغ بيها زى ما الاخ كلمنى وقاللى على المشكلة قاللى الحل ان حضرتك تتصل ب 888 وتكلم قسم الشكاوى المهم مشيت من الفرع وانا مروح اتصلت بخدمة العملاء رد عليا واحد قلتله عايز اكلم قسم الشكاوى قاللى حضرتك ايه المشكلة طبعا شرحت ووضحت كل حاجة قاللى حضرتك اللى ظاهر عندى ان ده استهدام حضرتك فالفترة من 11/5/2013 لغاية 31/5/2013 قلتله يعنى انا كل شهر بدفع 25 او 45 بالكتير تقوللى 483 جنيه طيب ازاى قاللى حضرتك الباقة اللى ب 25 خلصت وكان قدام حضرتك خيارين يا تختار ب 20 جنيه ويدى لحضرتك 1 جيجا اللى هيه (1024 ميجا) يا تختار الاختيار التانى اللى هو تتحاسب (1 ميجا = 25 قرش) وحضرتك اختارت الاختيار التانى واتسجل على حضرتك استخدام 1800 ميجا قلتله كده مش صح كده تعتبر سرقة علنى وقلتله ادينى اى حد مسئول اكلمه قاللى حضرتك انا سجلت الشكوى وفى خلال 48 ساعة هيكلمك حد من عندنا وبعدها بحوالى ساعة ونص لقيت واحدة بتكلمنى وطبعا نفس الكلام ولا حضرتك ده استهلاكك ودى مشكلتك حضرتك تحلها اتنرفزت عليها طبعا وقلتلها كده يبقى سرقة وسالتها على اسمها وقلتلها الشركة بتاعتكم تاخد الاجراءات بتاعتها وانا كمان هاخد الاجراءات بتاعتى وابلغ عنكم فى حماية المستهلك وطبعا الاستاذة المحترمة بتكلمنى باسلوب اكنى بشحت منهم ......

ملحوظة (الاستهلاك اللى هما بيقولو انا استخدمته اللى هو 1800 ميجا مكملش 2 جيجا بالحسابات بتاعتهم على الاختيار الاولانى اللى هما عاملينه يعنى 40 جنيه تمن 2 جيجا استخدام + 25 جنيه تمن الباقة يعنى المفروض 65 جنيه الاجمالى)

ياريت حد من الاخوة الزملاء يفيدنى فالموضوع ده ومعلش ان كنت طولت بس كان لازم احكى التفاصيل علشان حد يقدر يفيدنى اعمل ايه سامحونى بجد مخنووووووووووووووق جدا

المشاركة الأصلية كتبت بواسطة tameraast

الفكره انت استخدمت 1800 ميجا ولا لا ؟

لو استخدمتهم فعلا و مكنتش طالب النظام الجيجا ب 20 جنيه يبقى هتتحاسب بنظام الميجا ب 25 قرش و بحسبه بسيطه هيطلع استهلاكك 1800 * 25 = 450 ج

يا باشا انا دلوقتى واحد جاى يقولى انت استخدمت 1800 ميجا طيب بالعقل كده استخدمهم ب 40 جنيه على حساب 2 جيجا ولا اروح ادفع 450 جنيه هو كده مش يبقى نصب برده ولا ايه

المشاركة الأصلية كتبت بواسطة wael_kamel

معلش انا هستأذنك انك تكلموا بنفسك عشان تفهم منه بالظبط كل التفاصيل
انك صديق وائل كامل اللى فى حدائق الاهرام اتنمنى انه يفيدك
هبعتلك رقمه على الخاص

شكرا لاهتمامك وان شاء الله هاكلمه فى اقرب وقت

المشاركة الأصلية كتبت بواسطة someone5

الي انا اعرفة انك لو خلصت الباقة و مجددتش الأشتراك و استمريت في استخدام النت يبقي كدة هتتحاسب ب ربع جنية للميجا ( حصلت معايا نفس القصة بردة خلصت الباقي و مأخدتش بالي و قعدت استخدم النت لحد ما الرصيد كلة خلص )

لالالالالالا حضرتك لو خلصت الباقة اللى هيه ب 25 او ب 50 ومجددتش هيديك اختيارين الاول جيجا ب 20 جنيه والتانى الميجا ب 25 قرش وده اللى حصل معايا