جديد في عالم الفورد افيدونا افادكم الله (فورد اسكورت)

السلام عليكم ورحمة الله وبركاته
دا اول موضوع ليا في المنتدي وللاسف داخل علي طمع استحملوني بقي انا من اسبوعين اشتريت عربية فورد اسكورت موديل 98 1600 زيتيك انجكشن ودا بتوفيق من ربنا مش شطارة مني لاني مابفهمش في العربيات كتير بس بالسعر دا ماكانش هيجيبلي غير شاهين او لانوس طالع عينها والاتنين مش هياكلو معايا خالص لان انا مشاوري كلها سفر ورجلي تقيلة عالبنزين شويتين:grinder::grinder: العربية حالتها جيدة جدا وصاحبها كان معودها عالغالي فالحمد لله حالتها كويسة جدا وبعد ماجربتها وسافرت بيها بسم الله ماشاء الله العربية ولا غلطة ثبات نعومة ولا كلمة بس بقا الحلو مايكملش المشاكل الي قابلتني
اولا
العربية من قدام واطية جدا يعني جوا البلد المطبات بتحك بشكل كارثي ومهما اخد المطب يمين شمال بتحك برضو قلت اروح لبتاع العفشة اشوف يقول اي عشان اعليها شوية من قدام واحد قالي هحطلك جوز كاوتشات في المساعدين وصدادات ودي هتكلفك 100 جنيه وهتعلي بتاع 3 سم وهتفرق معاك وواحد تاني قالي هتغير السوست الي ملفوفة عالمساعدين بسوست اطول شوية يعني السوستة دي 6 لفات هتجيب سوسته 7 لفات مثلا (بتاعت اي عربية تاني ) وقال دول يعملو 350 غير المصنعية وواحد تالت قالي هتغير سوست وتجيب سوستها الاصلية عشان السوست دي طريت طبعا انا تهت ومش فاهم حاجة قلت اجي اسال هنا انا حاطط صورة للعربية وموضح ازاي واطية جدا من قدام
ثانيا
استهلاك البنزين عالي جدا التانك 55 لتر عمل معايا 300 كلم منهم 60 كيلو جوا البلد ومش زحمة اوي عادي والباقي عالمحور والدائري والصحراوي متوسط السرعة من 100 ل 170 (وبالمناسبة 170 دا اخر العربية ماجابتش اكتر من كدا ) سالت ميكانيكي قالي دي حساسات البنزين وبيتكشف عليها بالكمبيوتر في التوكيل بالمناسبة انا حاسس الماتور عالي لاني لو العربية عالتاني وسبت البنزين والدبرياش تفضل ماشية عادي خالص وتطلع مطالع ومطبات ومابتبطلش خالص
ثالثا
الميكانيكي قالي ماتجرب تحط بنزين 80 كدا مدام العربية كدا كدا بتاكل بنزين وشوف الدنيا هتمشي ازاي فانا حطيت 80 عشرين لتر وقلت اجرب ماحسيتش بفرق خالص والسحب كويس ومافيش اي فرق هل الي انا عملتو دا غلط ولا كارثة ولا ايه؟؟؟؟؟؟
ملاحظة العربية معمولها سيرفس من شهر زيوت وفلاتر وسيور وبوجيهات
واسسسسسسسسسسسسف جدا علي الرغي الكتير

اولا الف مبروك عالعربية وربنا يباركلك فيها كان معايا فورد اسكورت قبل الفورد البوما الى معايا دلوقتى بس كانت 1300
نيجى بقى للاستفسرات اول حاجه مينفعش انجيكشن و 80 خاااااالص خليك فى 90 اقل حاجه و 92 كويس و مفيش فرق كبير بينه و بين ال90 فى السعر تانى حاجه موضوع استهالاك البنزين الى اعرفه انو ياما رشاشات البنزين عايزن تتنضف ياما لو علبة الشكمان مخرومه ممكن تفرق معاك بس حجات بسيطه وموضوع رفع العربيه من ادام نصيحه بلاش تخلى حد يجربلك حاجه جديده او تركب حاجه مش بتاعت العربية علشان هتاثر على حاجه تانيه على وصفك ممكن يكون المساعدين خلاصانين هما و الستت انا كان عندى المشكله دى بس غيرت مساعدين بس و الحمد لله فرقت شويه ارجو انى اكون افدتك على اد ماقدر و ياريت لو فيه تصحيح لحاجه حد يقول علشان الكل يستفيد

متشكر جدا ياغالي علي الرد انا لسة مش هعمل حاجة في العربية غير ماشوف راي الناس وبالنسبة للمساعدين انهم بايظين ماعتقدش الراجل صاحبها قالي مغيرلها اربع مساعدين ماركة بوجي الماني من سنتين وهو استعمالو خفيف خالص وثانيا الكام عفشجي الي بصو عالعربية ماقالوش حاجة عن المساعدين وبالنسبة لتنظيف الرشاشات برضو صاحبها قاالي انو منظفهم قريب باسبري مخصوص عند الميكانيكي
دي صورة العربية مش عارف هي واطية فعلا ولا العربية دي اصلا كدا
[IMG]http://nileup.com/up/uploads/nilemotors_13872369881.jpg[/IMG]

اقتباس:

---

المشاركة الأصلية كتبت بواسطة mohamede002e

متشكر جدا ياغالي علي الرد انا لسة مش هعمل حاجة في العربية غير ماشوف راي الناس وبالنسبة للمساعدين انهم بايظين ماعتقدش الراجل صاحبها قالي مغيرلها اربع مساعدين ماركة بوجي الماني من سنتين وهو استعمالو خفيف خالص وثانيا الكام عفشجي الي بصو عالعربية ماقالوش حاجة عن المساعدين وبالنسبة لتنظيف الرشاشات برضو صاحبها قاالي انو منظفهم قريب باسبري مخصوص عند الميكانيكي
دي صورة العربية مش عارف هي واطية فعلا ولا العربية دي اصلا كدا
[/url][/img]

---

ممكن يكون المساعدين كويسين بس السوست خفاف هيخلولك العربيه واطيه من قدام
بس لو غيرتهم هات جديد او استيراد بتوعها بلاش الافتكاسات عشان متخسرش ثبات العربيه

بيتهيقلى واطيه من ادام سنه انا الى كانت معايا كانت اوطى من كدا من ادام و من ورا :) بس شوف كدا موضوع السوست زى مالاستاذ مغربى قال و الفورد بالذات بلاش فيها افتى هتلاقها حاجتها احسن

اشترتها على كام

لو السوست بتاعتك بقت طرية هات نفس السوست بتاعتها جديد وغير مقاس الكاوتش هاتكاوتش اعلى شوية مثلا يكون على مقاس 65 هاتحس بفرق رهيب

وخليك فى البنزين ال 92 حرام ال80 مع الرشاشات وعشان تحكم على استهلاك البنزين احسبلها بس من غير ماتعدى ال 100 فى السرعة

مبروك عليك العربيه يا باشا ويديلك خيرها ويكفيك شرها
انا شايف إن العربيه مش واطيه هوا دا إرتفاع العربيات دي عموما لان العربيه دي على الطرق السريعه ثباتها أكثر من رائع بصراحه
بس أنا واجهتني مشكلة المطبات دي لما كنت مركب كاوتش على60 بصراحه مكنش في مطب في البلد مكلتهوش أو حكيت فيه وبقيت أغير طريقي مخصوص عشان أتفادى الشوارع اللي فيه مطبات

بص الحل من وجهة نظري إنك تبدأ بجوز يايات قدام لو الدنيا إتظبطت يبقى ميه ميه
مكنش يبقى إعمل زي ما انا عملت ورحت جايب 4 فرد كاوتش 70/185 بصراحة فرقت كتير وما بقيتش احمل هم المطبات إلا لو مركب نفرين تلاته معايا
بالتوفيق وإقني العربيه ومتبخلش عليها بجد عربيات تستاهل فلوسها
ربنا يباركلك فيها مره تانيه
تحياتي

شكرا ياجماعة عالردود والاهتمام انا عليتها من قدام بكاوتشات اسمها كاوتشات تعلية ٤ زومبة والحمد لله ظبطت معايا ارتفاع كل كاوتشة4 سم بس فرقت جامد
عندي سًؤال بخصوص الزيت اي افضل زيت موتور للعربية وكذلك افضل زيت فتيس

اسف طبعا اذا كنت بارد متأخر بس انا مش موجود كتير
عملت ايه فى استهلاك البنزين ؟
خاللى بال حضرتك من ان تعلية الاسكورت من قدام غلط و هاتحس بيها ع السريع فى ثبات العربية
العربية اصلا واطية و كان افضل حل ليها زى ما الأخوة قالوا تشوف السوست و مقاس الكاوتش هايفرق معاك بس مش قوى السوست هى اللى هاتفرق قوى
بالنسبة لاستهلاك البنزين حضرتك قلت ان
1-العربية صوتها عالى و لما بتسيب ع التانى بتفضل واخدة عزمها
2الاستهلاك عالى
3- لما حطيت 80 ما حسيتش بفرق
اولا ال 80 فى الانجيكشن حراااااام . فلاتر و موتور بجد حرام
بس الحلول ممكن تكون كالتالى
1- صاحب العربية لو راجل كبير و عنده مشكلة فى رجله هاتلاقيه معلى العربية و الدبرياج عشان ما تبطلش منه و ما تتعبوش فى الزحمة و ده بياكل بنزين (و بيقصر كمان عمر الماتور)
2 صاحب العربية اصلا كان بيحط 80 و ده طبعا حرام بس ما علينا عشان يعمل كدإ لازم يعمل حاجة من اتنين او الاتنين هايعلى الكهربا و ده اكيد . هايوسع الرشاشات و يلغى حساس كده اظن اسمه الادلر تقريبا دى كارثة بكل المقاييس و بتتعمل عند الفتايين انما لو صنايعى فورد اكيد هايقولك حرااااام
3 حاجة كانت بتحصل معايا شخصيا . و عرفتها بالصدفة . الفورد عربية حامية يعنى درجة حرارة الماتور بتبقى الاصلى اظن من 86/92 او 94 مش فاكر طبعا الحساس ده غالى كنت جايبه ب100و كسر من سنة . فييجى الصنايعى يقولك هات ترموستات فيات (دى فى حد ذاتها غلطة فى حق الفورد )
اكتشفتها بالصدفة لما غيرت دورة التبريد بالكوعة و الترموستات فى الاسكورت القديمة
صدق او لا تصدق بقت تعمل 240/260 فى الصفيحة فى السفر (بس طبعا من غير القرص ع الماتور اعلى من 120 كم ساعة
العربيات الاوروبى عموما عربيات حامية لو بردتها ما تديكش الاداء التمام بتاعها

شكرا علي الرد ياباشا طب ازاي اعرف ان الحساس دا بتاعها ولا متغير عموما العربية عندي مابتسخنش حتي لو في سفر طويل المؤشر مابيرفعش خالص عن اول شرطة مع ان العربية بتبقي متسخنة كويس وبالنسبة لتعلية وتوطية العربية دي هو الانجكشن ينفع يتلعب في اصلا الي اعرفو ان الكهربا بتبقي مظبوطة اتوماتك ماينفعش في تقديم وتأخير كهربا مش صح ولا اي؟؟؟؟؟

اسف ع التأخير فى الرد
ال 1600 الانجكشن المفروض انها بتضبط لوحدها بس المشكلة ان العباقرة فى البلد كتيرررر
و الحساس ممكن تخلى حد بتاع فورد يبصلك عليه
الاصلى بيبقى راكب فى الكوعة من فوق انما التانى بيتعمله حاجة كده زى القاعدة عند خراط