رحله جديده للحرفيين ... وتقرير

**Hesham.H** · 17-12-2013 03:21 AM

الزملاء الأعزاء

النهارده كنت فى القاهره وكنت جنب مدينه الحرفيين ... قلت أروح أشوف الدنيا هناك أخبارها إيه .. وطبعاً مشوار الحرفيين لازم بغرامه
نزلت عند أولاد عبد الشافى .. وسألته على دشمتين طنابير خلفيه ... عشان كنت عاوز أغير الفرامل الخلفيه عندى .. إتفقنا فيهم على ٤٠٠ جنيه كاملين بالتيل بتاعهم
بصراحه الطنابير تحفه وتحس إنهم لسه جداد مش إستعمال ... عيبهم الوحيد الصدأ وده الصنايعى اللى ركب قاللى يومين ومش هتلاقى الكلام ده خالص وهاتبقى زى الفل
كان رأى سليم انى أركبهم فى الحرفيين لأننا لقينا ماستر مش مظبوط وروحنا غيرناه
التيل بتاعهم يعتبر لسه جديد بس أنا بصراحه مارضيتش أركبه غير لما آخد رأيكوا عشان مش عارف ممكن أعتمد على التيل الإستيراد ولا إيه خاصه إنه ممكن يكون عمره سنين
جبت تيل خلفى ألمانى ماركه (sk) ب ١١٠ جنيه .. برضو مش عارف إيه نظامه
تانى حاجه جبتها كانت فبره القايم الشمال اللى فيها الحزام عشان كانت مكسوره عندى ودى ب ٨٠ جنيه
طبعا عوامه بنزين كلاكيت تانى مره ٧٠ جنيه .. بس المره دى إن شاء الله كويسه
مخدع أصلى حالته كالجديد ١٥٠ جنيه
جوان الفرن ٢٥ جنيه عشان اللى عندى ماكنش عاجبنى آخر مره فكيته

الحمد لله ركبت الطنابير فى الحرفيين وأخدنا الهوا بس حسيت إن لسه مستواها مش قوى .. الصنايعى قاللى لسه معاك يومين على ما الصدا ده يروح والتيل الجديد يطبع هاتبقى تمام إن شاء الله .. وأنا كده مشيت بيها حوالى ٢٠٠ كيلو اللى هو مشوار الرجوع من القاهره وحاسس إنها لسه برضو
يا ترى أكشف عليها هنا عند حد بتاع فرامل ولا أستنى شويه

لمبه abs منوره ولما سألت الراجل قاللى هاتطفى بعد ما تمشى بالعربيه شويه ... ولغايه دلوقتى لسه مش شغال .. وممكن تكون حساس من الجديد مش شغال
هل ممكن الحساسات اللى طالعه من عندى تركب عادى ولا أرجع لعبد الشافى آخد حساسات تانيه منه ؟؟
تحياتى وعذرا للإطاله

**amr elsisi** · 17-12-2013 09:16 AM

مبروك عليك يا هشام
بس كنت استخدمت نفس التيل
وكنت كشفت علي abs وانت هناك لسة حترجع
وكان من المفترض تمس الطنبورة علي المخرطة داخلي وخارجي

**فادى محمد** · 17-12-2013 03:30 PM

مبروك يا اتش..
باعتذر لك امبارح كان عندي ظرف في الشغل . والحمد لله.
-التيل اللي ركبته ده صيني مغلف germany
-قبل ماتعمل اي حاجه ركب التيل الاصلي اللي المفروض يكون مطبع علي طنابيره
وشوف الفرامل لو اتحسنت سيبه شويه ويبقي العيب من التيل ولو زي ماهي يبقي
اكيد في هوا في الدوره لان اداء الفرامل دي علي العربيه دي بالذات انا جربته خيال
علمي .لسه نفسي بتراودني علي التعديل بس خايف من بليه الصره !!
-الصدا كله هيروح مع الاستخدام ماتحطوش في دماغك ماياثرش علي حاجه.
-بالنسبه للايه بي اس اكشف ع الحساسات الجديده اللي ع الصره لان ممكن يكون
واحد فيهم مش شغال تغيره , ( احيانا لما الحساس بيتهز اللمبه بتنور وبيرجع يظبط تاني
لوحده علطول وده بيحصل معايا في العجل الامامي لما افك اعمل اي صيانه)

**Hesham.H** · 17-12-2013 04:54 PM

المشاركة الأصلية كتبت بواسطة فادى محمد

مبروك يا اتش..
باعتذر لك امبارح كان عندي ظرف في الشغل . والحمد لله.
-التيل اللي ركبته ده صيني مغلف germany
-قبل ماتعمل اي حاجه ركب التيل الاصلي اللي المفروض يكون مطبع علي طنابيره
وشوف الفرامل لو اتحسنت سيبه شويه ويبقي العيب من التيل ولو زي ماهي يبقي
اكيد في هوا في الدوره لان اداء الفرامل دي علي العربيه دي بالذات انا جربته خيال
علمي .لسه نفسي بتراودني علي التعديل بس خايف من بليه الصره !!
-الصدا كله هيروح مع الاستخدام ماتحطوش في دماغك ماياثرش علي حاجه.
-بالنسبه للايه بي اس اكشف ع الحساسات الجديده اللي ع الصره لان ممكن يكون
واحد فيهم مش شغال تغيره , ( احيانا لما الحساس بيتهز اللمبه بتنور وبيرجع يظبط تاني
لوحده علطول وده بيحصل معايا في العجل الامامي لما افك اعمل اي صيانه)

الله يبارك فيك يا باشا

فعلا زى ما انت قلت .. البيه الصنايعى نسى يركب حساس الفرده الشمال لما فكيت النهارده لقيته سايب ركبته وبقت تمام الحمد لله

الصدأ راح بنسبه كبيره الحمد لله والفرامل بقت احسن شويه .. بس لسه مش هى برضو
فرامل اليد عاليه قوى مش عارف ارجلشها من اليد ولا ليها طريقه تانيه

بالنسبه للبليه دى بكام وبتبوظ كل قد ايه ؟؟ انا مش ملاحظ شكوى منها الحمد لله من الزملاء اللى معاهم cdx
يا عم توكل على الله وركبها وهاتبقى زى الفل ان شاء الله ... وانت بتعرف تستنضف وانت بتشترى الحمد لله
تحياتى يا باشا

**alameer81** · 17-12-2013 04:56 PM

طيب بالنسبة للتيل نركب ايه
ناخدها من قصيرها ونركب صيني ؟
انا لسه شاريه من شهر sk مكتوب عليه الماني
في نوع مصري من مصنع في العاشر اسمه ماك لتيل الفرامل اظن هو الي بيصنع GM المصري
يا ريت نلاقيه ونشجع بلدنا

**Hesham.H** · 17-12-2013 08:30 PM

المشاركة الأصلية كتبت بواسطة alameer81

طيب بالنسبة للتيل نركب ايه
ناخدها من قصيرها ونركب صيني ؟
انا لسه شاريه من شهر sk مكتوب عليه الماني
في نوع مصري من مصنع في العاشر اسمه ماك لتيل الفرامل اظن هو الي بيصنع gm المصري
يا ريت نلاقيه ونشجع بلدنا

ايه اخباره المصرى ده ؟؟ وجربته قبل كده ولا ايه ؟؟ لو فعلا كويس يبقى اهلا بيه

**alameer81** · 17-12-2013 08:44 PM

لا للاسف ما جربتوش بس المصنع كويس وبينتج ماركات كتير
كنت دخلت المصنع ده من فترة وشفت مستوى الجودة
وعلي اي حال ناخد المصري الي مكتوب عليه مصري احسن ما ناخد الصيني ومكتوب عليه الماني

**فادى محمد** · 18-12-2013 12:20 AM

التيل المصري ده كويس جدا في التوقف جربته في افيو بتاعه نسيبي بس مشكلته انه بيخلص بسرعه وطبعا الهباب بيعدم الجنط !

-

الموضوع: رحله جديده للحرفيين ... وتقرير

LinkBack

أدوات الموضوع

عرض

-

-

-

المواضيع المتشابهه

اشتريت e250 2013 وتقرير حصري وتقرير عن الـ a200 حصري لنايل موتورز

زياره للحرفيين

من شبرا للحرفيين

زيارة ثانية للحرفيين

كيف اذهب للحرفيين من السويس

الكلمات الدلالية لهذا الموضوع

المفضلات

المفضلات

ضوابط المشاركة