الموضوع: الى خبراء المنتدى فقط

رد رائع من الأستاذ أكرم ، و طبعا المشكلة ان حضرتك طالب مقرنات بين عربيات كتير و للأسف من فئات مختلفة و ده بيصعب (ان ما كانش غلط) المقارنة اساسا
فيه عربيات 1000 سى سى و عربيات 1300 ، و 1400 و 1500و طبعا لو حضرتك تقول لنا بتدور على ايه فى العربية ممكن نساعد اكتر
عموما انا عن نفسى كان معايا لانسر بطة قبل كده
1300 مانيوال تكييف و زجاج و سنتر
نادر انك تلاقى كماليات اكتر من الباور لأن لو اوتوماتيك و باور و تكييف على 1300 يبقى كتير جدا ، و ايامها ال1500 ما كانتش منتشرة فى مصر
العربية كانت ممتازة لحد ما بعتها و هى بصراحة حمارة شغل و حمالة اسية و ماتفتحش بقها (مهما تقسى عليها) و شوية دلع يخلوها عروسة من جديد ، استهلاك بنزين ممتاز ، عزم لا بأس به بالنسبة للتكنولوجيا القديمة و سعة الموتور ، مكيف ممتاز
عيوبها : واطية واطية واطية طحن ، انا كنت باحك فى كل مطب و انا لوحدى ، و مش عايز اقول الصوت بيبقى ازاى لو محمل ، و لكن الحق يقال ، كل ما بارفعها بالاقيها زى الفل من تحت ، تقولش مصفحة
قطع غيارها الأصلية قليلة و لكن الكورى (نفس قطع غيار الأكسيل) و التايوانى مالى السوق و زى الفل ، و ممكن تعرف (زى ما عملت) ايه اللى بيركب عليها من 96-99 و تجيب الأصلى ساعتها
عيون صفية نفس الموتور لكن صالون اصغر و واطية برضه (و لكن مش نفس الدرجة) و طبعا نفس مشكلة قطع الغيار (اصعب مع الفوانيس و الذى منه)

- هيوانداى اتوس
عربية وسط لكن قطع غيارها موجوده * و يعيبها العفشة ضعيفة و صالون صغير رغم ان سقفها عالي جداً جداً و طبعاً شنطة صغيرة

مع اختى و صالونها من ورا مش بطال لكن ما بعرفش اركب كويس فيها قدام و باتخنق لو هاسوقها لأنى بارجع الكرسى للآخر و برضه مزنوق
السقف فعلا عالى و لكن الكراسى برضه عالية و ده بيدى احساس كاذب انك راكب minivan و لكن تكفى نظرة للكاوتش ابو مقاس صغير علشان تصحى على الحقيقة
عزمها ضعيف و لكن مكيفها معقول و طبعا الشنطة صغيرة نسبيا و لكن بينرفزنى فيها ان القاعد ورا يلعب فى الشنطة براحته (ما فيش حاجة تفصل الشنطة عن العربية و لا حتى لوح ابلاكاش) ، ما الثبات فحدث ولا حرج ، عربية سقفها عالى على قاعدة عجل ضيقة يبقى التركيبة المثلى للتعويم و عدم الثبات (لما بتعدى ال60 تبيقى الدنيا مهلبية عالآخر)
مراياتها زى ال128 و 127 بتتحرك حتة واحدة و بالتالى كل شوية تظبط فيها
موفرة جدا جدا للبنزين
بالنسبة للأكسيل فمعلوماتى عنها انها مش عربية شقا ، لازم تدلعها و اياك تقسى عليها او تهمل فيها ...تروح فاتحة بقها بالجامد ، غير كده كويسة جوه البلد
باقى السيارات الأستاذ اكرم رده اكتر من رائع
و تحياتى