التوكيل غير معترف بيه امام المرور !! ياريت المساعدة
السلام عليكم..
انا لسة مسجل في المنتدى عشان اكيد في ناس هنا خبرة وهتفيدني من الورطة دي !!
انا اشتريت عربية مستعملة في شهر 5 من واحدة في اسكندرية
اخدتها منها بتوكيل رسمي..
والمالك الاول للعربية هو جوزها والرخصة باسمه وعملها عقد بيع مسجل باسمها وهيا عملتلي التوكيل..
رخصةالعربية خلصت بتاريخ 12/12 يعني من 5 ايام تقريبا رحت مرور اسكندرية عشان اطلع شهادة المخالفات وشهادة البيانات
طلعت شهادة المخالفات بعد ما طلعوا روحي منهم لله جيت اطلع شهادة بيانات موجهة للشهر العقاري عشان اسجلها باسمي كانت كل حاجة ماشية تمام الموظفة بصت في التوكيل قالتلي مش نافع محتاج صاحبة العربية تعملك توكيل جديد مكتوب فيه رقم الموتور والشاسيه
طبعا فضلت ساعه اشرحلها ان اللي باعولي خارج مصر قالتلي دي تعليمات جديدة وكانوا قبل كده بيتعاملوا بتوكيلات عادية مش شرط يكون مكتوب فيها رقم الموتور والشاسيه
رحت الشئون القانونية ودخلت للظابط رئيس الوحدة قالولي ده قانون جديد مفيش غير اني ادور على صاحب العربية يعملي توكيل جديد مذكور فيه رقم الموتور والشاسيه
دلوقتي انا لا عارف انقلها باسمي ولا عارف اجددها حتى باسم صاحبتها لان مطلوب في التجديد شهادة بيانات والشهادة لازم تطلع بالتوكيل المعدل,,
وللاسف صاحبة العربية سافرت فعلا ارقامها مقفولة ورحتلها على عنوانها اللي معايا..
فا مش عارف اعمل ايه في المصيبة دي..
ياريت لو حد عنده حل قانوني يفيدني
