-
استفسار عاجل
سلام عليكم
ازيكم يا وحوش انا روحت عملت صيانة ال 60 الف مع انى مش عامل غير 15 الف بس عشان مر عليا 3 سنين وفوجئت بإنهم بيقولولى طنبورة الدينامو محتاجة تتغير .. بيقولى هى سلمية بس فيها زى شرخ صغير وطبعا انا بره الضمان دلوقتى فقالى هتتكلف بتاع 1300 جنيه .. انا حجزت فى التوكيل وكنت رايح اغيرها بس ناس كتير قالولى بلاش ولو هتغيرها غيرها بره التوكيل .. إيه رأيكم يا وحوش واتمنى الرد بسرعة لأنى حجزت بكره فى التوكيل فأروح ولا اغيرها بره ولا ما اغيرهاش اصلا
-
صديقي المواطن
والله تعبنا وعجزنا وصوتنا بح ننصح الناس في الحاجات اللي ليها عشرات البدايل تبعد عن التوكيل أنا من غير ما أعرف نوع القطعة المطلوبة بالظبط ومن غير ما أعرف نوع عربيتك بس قضيتك أبسط من البساطة ولا تستوجب التوكيل ومش هو قال لك 1300 لو عملتها بره بأكثر من 400 جنيه أنا أدفعلك الفرق أمام الناس كلها ثم حضرتك الذي يخفى عنكم وأعلمه وأتابعه وأشاهده أنا أنه لا يرضى بالعمل في التوكيلات إلا كسر الصنايعية وأسطوات الدرجة الخامسة اللي بيتطردوا من كل الورش أو المهندسين الجدد اللي لسه رايح ياخد خبرة وربنا يصلحلك الحال ويهيئلك الخير وتنسى مكان التوكيل ده أصلا ولو كشفت على حاجتك بره حيقللك مفيهاش حاجة وحتمشيك سنتين كمان
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
-
اشتري الطنبورة الأصليه من التوكيل و غيرها بره
-
بس سعادتك طالما أنك أستعمالك نضيف للعربية 15000 كيلو و أنك بتعمل الصيانات في التوكيل فمعلش أنا حأختلف مع أي حد يقوللك ما تروحش التوكيل حضرتك عايز تحافظ على العربية وديها التوكيل التوكيل في ضمان على قطعة الغيار و على تركيب قطعة الغيار بس حضرتك أنا رأى مش أعغيره أن شاء الله التوكيل و لو كان فيه صنايعية درجة عاشرة مش خمسة مع أنى أختلف مع الأستاذ صدام في هذه النقطة ألا أنه أحسن ستين مرة من أي أحسن ورشة بره ممكن يكون طنبورة الدينامو دى في حتة مزنوقة حيضطر معاها أنه يفك حاجات كتير جدا علشان يفكها و بعدين يركبها تانى ياباشا دول شغالين في عربية واحدة فقط لا غير يعنى حافظينها و عارفين كل مسمار بيتفك ويتركب أزاى مهما كانت درجة كفاءة الصنايعية الكسر أة المهندسين اللى لسه متخرجين جداد أختلف مع الأستاذ صدام جدا في هذه النقطة ممكن يكون في حلول تمشى الموضوع ممكن تتلحم و هي تمشى و حتأخد عمرها لكن التوكيل مش فى حاجة أنه يقوللك عربيتك محتاجة تتغير لها طنبورة و هى مش محتاجة طالما قاللك و لكن هوه يقوللك الأضمن و الأحسن للعميل و الأكسب للتوكيل أنه يغير الطنبورة و الله أعلم
-
طيب خللى حد يبصلك عليها الأول
افتكر مافيش فيها شرخ ولا حاجة
وأظن انهم عايزين يغيروها عندك وقائياً لأن فيها حاجة (مشكلة صناعة) ممكن تعمل مشكلة مستقبلياً
أنا سمعت الكلام ده ورحت فى آخر شهر ليا فى الضمان طلبت تغييرها (على الكلام اللى سمعته) وفعلاً غيروها من سكات.
لو كانت الطنبورة عندك سليمة ، ممكن تنسى الموضوع ده وقتياً.
-
الف شكر على ردودكم يا رجالة
انا سألتهم تانى قالى تمنها فى التوكيل من غير المصنعية وكدا 1265 جنيه وبالمصنعية والذى منه هتوصل ل 1500 جنيه .. انا هسأل على تمنها بره بكام وهخلى حد يكشف عليها تانى الأول وعلى الأساس دا هقرر وربنا ييسر
Content Relevant URLs by
vBSEO 3.6.0 PL2