الموضوع: الحمدلله على النعمة و البلاء

المشاركة الأصلية كتبت بواسطة m.adel kamel

الحمدلله على النعمة و البلاء

ربنا كرمنى و بعت عربيتى اللى مالحقتش استمتع بيها للأسف الا لمدة سنة و شهرين تقريبا و كانت هيونداى النترا 2007 راشة جانبين فى التوكيل بسبب ان صاحبتها كانت سيدة مسنة و انتوا عارفين سواقة الستات بصفة عامة و عاملة لما سلمتها للمشترى 47740 كم و الحمدلله ربنا اكرمنى انى قولت للى بيبع له على كل اللى فى العربية بالكامل و اى مشكلة ولو بسيطة فى العربية و سبب انى بيبعها و برضه والله اللى كان بيسألنى كنت بقوله على سبب البيع بالأمانة و هو ان العربية كانت بتتسرق ...ايوه كانت بتتسرق و ستر ربنا وحده بإختلاف الاسباب هو اللى نجاها ...الحمدلله
كرهت العربية جدا بعد ماكنت مبسوط بيها و قولت هاخليها على الاقل 5 سنين ....كرهت غبور و عربياته و كل الكورى اللى بيتسرق بنفس الطريقة .... انا معنديش اى شك فى حكمة ربنا سبحانه و تعالى فى ابتلاءه و فى ان اى عربية مهما ان كانت غالية ممكن تتسرق ....بس مش بالسهولة دى .....
نزلت صباح يوم السبت 9-11 بعد عدم ركوب السيارة 3 ايام مع العلم انى ليلتها باصص على العربية و فتحتها و قعدت فيها دقائق ...نولت فتحت العربية بالريموت و دخلت ادور بدون ماابص على الكونتاكت زى اى حد حافظ عربيته و اتفاجئ بأن المفتاح مش راضى يدخل فى الكونتاكت ...بصيت الاقى نص مفتاح مكسور جوه الكونتاكت ...ذهلت فجأءة اسوأ كوابيسى تحقق من ساعة ما جار ليا عربيته اتسرقت جالى و حذرنى ان العربية دى سهلة السرقة اللى حد مخيف و حتى بعد حادثة سرقة عربية ahmed_gamalالانترا ....نزلت من العربية الف حواليها و الاقى الكالون اليمين متاخد من العربية اصلا و بشد الاكرة لقيتها فى ايدى ...زادت الصاعقة اللى هبطت عليا
ثورت و زعقت مع بتوع الامن و طبعا ولا اكنهم هنا ....طلعت بيتى بعد كام كلمة للبواب ...اللى بصراحة مش بلومه على حاجة .....طلعت عملت اعلان للعربية على كذا موقع منهم هنا و منتدى منافس و كونتاكت و دوبيزل ... تانى يوم كنت فى التوكيل انا و ahmed_gamal الله يكرمه بنسأل على طقم الكونتاكت ...المهم بعدها بكام يوم اشتريت الطقم و ركبته و هاتك بقى مكالمات لطيفة من اللى يسعر العربية من غير حتى مايشوفها و صورت العربية بعد مطالبات الناس بالصور و فجأءة سكون عجيب الا من رساله على الخاص احد الاشخاص الجمال هنا بيقولى انه عاوز العربية على 70000 جنيه و انه مش هايزود عن كده لأن الناس نصحته بكده ...بصراحة كنت هارد رد مش محترم بس استعيبت و رديت رد كويس يفيد بأنه يدور على غيرها و بعدها اتصل بيا واحد تانى كانت طريقته تاجر بس سخيف و هو بيقولى ان عربيتى اللى هو حتى ماشافهاش خالص ولا شاف الصور تسوى بالكتير 73000 و انى مافكرش فى سعر اعلى من كده خالص شكرته و قفلت و على العموم انا هاحط صور العربية تانى جايز انا حرامى و تاجر جشع رغم انى شغلتى حاجة تانية خالص

المهم انا قررت انى مااركبش العربيات دى تانى بفكر فى كذا حل كلهم بعيدين عن قطع الغيار الرخيصة و الصيانة السهلة و العامل الاول بالنسبة لى هو امان السرقة ثم الصيانة ثم التكييف

1 - opel vectra c 2008 topline

2 -307 sw 2007-2008peugoat

3 – honda civic 2010 vti

4- mazda 3 2010

ارجو منكم النصبحة اللى بيها ما اقعش فى حاجة تتعبنى و تبهدلنى و اسف جدا على الاطالة

هو حضرتك المفروض العربيه يبقي رينج بيعها في حدود كام وشكرا

المشاركة الأصلية كتبت بواسطة foxhonda2008

ايه ده انت جاري

شرف ليا يا باشا ...شوف اى وقت لو حابب نتقابل

المشاركة الأصلية كتبت بواسطة svneleven

شوف يا باشا ال فيكترا برستيج طبعا أعلي من الباقيين لكن مش جراية زي الهوندا مثلا و قطع غيارها في التوكيل نار و بره موجودة بردو و الناس بتوع الأوبل يفيدوك.
الهوندا أكثرهم عملية و كتيرة و كل الناس شغالة فيها و قطع الغيار أظن أرخص واحدة فيهم بحكم أنها كتير و شبابية.
المازدا أنا شايفها مالهاش ميزة عن الهوندا الا أن سعرها أرخص طبعا لكن طبعا الوكيل مموتها.
البيجو بردو زي الأوبل لكن انتشارها أقل و مشاكلها أكتر شوية بسيطة. لكن بردو بريستيج جامد.
أنا رأيي بقي أنت عندك البيجو و الأوبل دول في كفة البريستيج أما المازدا و الهوندا شبابية و جراية و كده. لكن الأوبل في رأيي أحسن من البيجو و كذلك الهوندا أحسن من المازدا.
فحضرتك لو عاوز بريستيج يبقي الأوبل و لو عاوز حاجة شبابية و جراية يبقي الهوندا.

الف شكر لحضرتك لردك المفصل الجميل ....كلامك صحيح فعلا بس حاسس انى اميل للبيجو بس خايف منها

المشاركة الأصلية كتبت بواسطة john55

هو حضرتك المفروض العربيه يبقي رينج بيعها في حدود كام وشكرا

بص حضرتك انتا بتبص على الحالات المشابهة لحالة عربيتك و تقييم عربيتك على اساس حالتها و تشوف بس ماتزودش اوى و لا تيجى على نفسك برضه خليك فى الوسط يعنى انا كنت بثمن عربيتى من 80000:77000 ده رأيى الشخصى طبعا

المشاركة الأصلية كتبت بواسطة windofchange

طيب خير بس لو العربية كويسة رأيي لو ينفع تنزل الحرفيين وتشوف كونتاكت مشفر بتاعها يكون نازل في قطعية بمفتاحه وايموبليزر وتركبه ده لو هي بتنزل بره كده....واكيد استخير ربنا قبل اي شيء

شكرا لرد حضرتك الجميل و المعين بس للأسف انا بعت العربية