الموضوع: استفسار عن قوه الزوم فى عدسات الكاميرات اﻻحترافيه

المشاركة الأصلية كتبت بواسطة kliken

السﻻم عليكم و رحمه الله و بركاته
انا كنت محتاج اعرف قوه الزوم للعدسات اﻻحترافيه و مقابلها فى الكاميرات الشبه احترافيه اللى مش بيتغيرلها عدسات
بمعنى انا ل عندى كاميرا شبه احترافييه و الزوم فيها 25اكس اللى يدينى نفس التقريب فى العدسات هى عدسه رقمها كام
و العدسه ال 18 55 اللى بتيجى استاندرد مع معظم الكاميرات اﻻحترافيه قوه الزوم فيها كام ،x
و شكرا

وعليكم السلام ورحمة الله وبركاته
قبل ما نتكلم عم الزووم لازم الأول تعرف معنى البعد البؤرى للعدسة
Focal Length
لما تكون عدسة 18-55 معناها إنها بتديك رينج من البعد البؤرى يبدأ من 18 مم إلى 55 مم ، يعنى إيه الكلام ده ؟
خلينا نتخيل العين البشرية ، لو إنت باصص على هدف قدام عينيك من غير ما تحرك عينيك أو رقبتك ، هتكون عينيك كاشفة مجال رؤية من اليمين للشمال بزاوية معينة ، لو حاجة يمين أكتر منها مش هتشوفها أو لو شمال أكتر منها مش هتشوفها برضه طالما موجه عينيك للأمام ، تمام ؟
مجال الرؤية بتاع عينك ده يساوى فى العدسات بعد بؤرى 50 مم
طيب يعنى إيه 18 مم ؟ يعنى بعد بؤرى أقل ، يعنى زاوية رؤية عريضة
Wide Angle
يعنى تشوف من أقصى اليمين أقصى الشمال من غير ما تحرك عينيك أو رقبتك ، مفهومة ؟
عمرك جيت تصور مجموعة كبيرة 10 أشخاص مثلاً وبعدين لاقيتهم مش داخلين كلهم فى الكادر ؟ عملت إيه ؟ قولتلهم ضموا على بعض شوية مش كدة ؟ أو رجعت إنت خطوة لورا ؟ صح ؟
ممكن تعمل لقطت زى دى وأوسع كمان بإستخدام عدسة ذات بعد بؤرى صغير زى ال 18 مم مثلاً
طيب لو العكس ، عايز أصور حاجة بعيدة ى الطيور أستعمل بعد بؤرى 18 ؟؟ لأ طبعاً ، تستعمل 200 أو 300 أو 400 مم
كدة وصل مفهوم البعد البؤرى ؟

نيجى للزووم بقا ، الزووم هو ببساطة نسبة التكبير بين أقل بعد بؤرى وأعلى بعد بؤرى ، يعنى لو عندنا عدسة 18-55 مم تبقا كام زووم ؟ يبقا الزووم = 55/18 = 3 إكس
3 إكس بس !!!!
آه 3 إكس بس والله
طيب لو معانا عدسة تانية 100-300 مم الزووم بتاعها كام ؟ الزووم = 300/100 = 3 إكس
3 إكس برضه !!!!! يعنى ال 100-300 زى ال 18-55 ؟ لأ مش زيها طبعاً فى مجال الرؤية ، إنما الفرق بين أقل بعد بؤرى وأكبر بعد بؤرى هو نفسه ، العدستين زووم 3 إكس ، إنما العدستين مختلفتين تماماً فى مجال الرؤية ، 18-55 حلوة فى الأماكن الضيقة وتجيب صور وايد أنجل ، فى حين ال 100-300 حلوة ك (تيليفوتو) وده المصطلح اللى انت بتدور عليه يعنى تجيب حاجات بعيدة عنك زى طيور فى السما مثلاً

عشان كدة فى الكاميرات الإحترافية مافيش حاجة إسمها كام إكس أو الزووم كام ، لأن مالهاش معنى إنك تعرف ، المهم هو العدسة كام ميلليمتر ؟؟ بتبدأ عند كم وتنتهى عند كام ؟

مثلاً عدسة 200-400 مم الزووم بتاعها 2 إكس صح ؟ إنما بتقرب ضعف التقريب بتاع ال 18-200 مم اللى هى 11 إكس ، صح ؟؟ يبقا فى البرو مافيش حاجة إسمها كام إكس إنما هنتكلم عن فوكال لينس بس

تمام كدة وصلت المفاهيم دى ؟

نيجى بقا لسؤالك

الكاميرا السيمى برو زووم 25 إكس ، يبقا السؤال اللى المفروض تدور عليه على طول ال 25 إكس دول تبدأ من كام مم ؟ يعنى هل هى مثلاً تكافئ 10-250 ؟ ولا 20-500 ؟ ولا من كام لكام ؟ لما تجيب المعلومة دى هتقدر ببساطة تقول دى مشابهة لأنهى عدسة على الكاميرت البرو ، تمام ؟

عموماً عشان تبقا عارف ، الكاميرات السيمى برو بيكون الرينج بتاعها كبير لأنها عدسة ثابتة مابتتبدلش والسينسور صغير ، فلا تفاجئ لو لقيت مثلاً إن كاميرا سيمى برو بتجيب رينج محتاج منك عدستين أو تلاته عشان تغطيه فى البرو وبأضعاف الثمن ، لأن الفرق بين البرو والسيمى برو مش الرينج بتاع العدسات خالص .

لو بتدور على أكبر تقريب وخلاص خليك مع السيمى وشوف الكام إكس بتوعها من كام لكام ، لأن ممكن 25 إكس تكون بتقرب أكتر من 32 إكس زى ما إتفقنا .
أما البرو فموضوع تانى هتحتاج كاميرا ومعاها كام عدسة عشان تغطى نفسى الرينج .

بالظبط كدة
عموماً الكاميرات اللى بتتكلم عليها هى بداية كويسة ومعقولة ، هم بييجوا بعدسة 18-55
هتحتاج معاها عدسة كمان 55-250 او 70-300 او ماتاخودش العدسة وتخصم سعرها وتجيب 18-200 من الاول