لو من أسكندرية وعربيتك مسروقة
السلام عليكم ياجدعان ، انا عربيتى اتسرقت اخر شهر 7 ، وبعد مدة قولت عليه العوض ومنه العوض وخلاص
واحد قريبى من شهر ونص قالى انه شاف وحدة شبه عربيتى مش متأكد اذا كانت هى ولا لآ عند مرور طوسون
روحت وملقتش حاجه طبعا و بعدين انا كنت عامل محضر السرقة فى قسم منتزة تانى وكدة كدة كنت معدى من ادامه دخلت سألت
قالى شايفها فى العربيات اللى ادامك
قولتله لا
قالى خلاص نعملك ايه
قولتله طب ياباشا هى لو اتمسكت فى قسم تانى مبيجلكش اخبارية بكدة
قالى لا
قولتله يعنى معلش حضرتك انا هدور عليها ف كل قسم
قالى مش عاوزها اعد فى بيتكم
قولتله حضرتك انا مقصدش بس قولى يمكن يكون فى مكان معين
قالى مرغم
قولتله شكرا ومشيت
طبعا من طريقة الكلام محطتش فى دماغى ، لحد اول امبارح قولت طب ما بص بصه فى قسم عامرية واحد واتنين وقسم برج العرب وبالفعل فى التلات اقسام كان " اكتر" اللى موجود "فيرنا ، الينترا ، اوبترا" - كان كمان فى سيراتو على سكودا على تيوتات بس دول تلاقى واحدة او تنين فى كل قسم - كل ما اسأل ليه امين شرطة ليه صحابها مأخدوهاش يقولولى لا مبنتصلش بحد
اخر قسم كنت روحته قسم البرج ، الراجل ظبطته فخلانى ابص و بعدين قالى بص عليك وعلى
( ( حضانة مرور مرغم )) اللى هى على الطريق الصحراوى وانت رايح العامرية قبل دخلة ال21
لان كل العربيات اللى بتتمسك بتعد مدة مثلا شهر او شهر ونص وبتروح على الحضانه دى
روحت فعلا انهاردة الصبح ، كمية عربيات ملهاش اول من اخر ، طبعا لازم تكون معاك اوراق تثبت انك ليك عربية مسروقة وداخل تبص موجوده ولا لا ولازم تظبط اللى هيدخل معاك بالكلام واللى انت عاوزة واللى تشوفة ، والله كنت عاوز اصور فيديو يمكن حد يلاقى عربيه مسروقة منه بس مرداش وقالى اللى له حاجه يجى يدور عليها
فلو ليك عربية او تعرف حد عربيته مسروقة ، روح بص هناك مش هتخسر حاجه