هوا نوعة ايه بالضبط؟ ستيب ترونيك؟؟ انا ناس بتخوفني من الاوتو في البيجو و خصوصا لو ستيب ترونك؟ ايه رايكم؟
عرض للطباعة
هوا نوعة ايه بالضبط؟ ستيب ترونيك؟؟ انا ناس بتخوفني من الاوتو في البيجو و خصوصا لو ستيب ترونك؟ ايه رايكم؟
لا يابرنس ما تقلقشي من جير البيجو
بصراحه كل يوم بكتشف معاه انه متبرمج للتفاعل مع دوستك علي دواسة البنزين
مشكلته فالزحمه كأي جير اتوماتيك بيكون عدد النقلات كتير
والطريقه دي فالسواقه تخليك تضايق من الدي نفسه وتدور علي حلول اخري وومكن يكون السنو بيجر العربية علي التاني ولكنه لما جربتها محمل كتير علي الكفرات فالجر وينحلها بسرعه
المانيوال لسه ماجربتوش والله أعلم هيكون بنعومة الدي لما تظبط ضغط الدواسه ام لا...
بس فالأخير الجير تمام وتسارعه جيد وكمان فن البرمجه لصالحه
فنصحتي ما تلتفتش للكلام عن الجير لانه ما شاء الله مستجيب بقوة والسياره كعفشه ومكينه متلائمه مع سرعاتها الاعتياديه , ودا المطلوب للسواقه يا برنس
صباح الخير عليك
صباح الفل يا معلم .. وشكرا لردك
علي فكرة ال Snow mode مش بيحمل علي الكفرات ولا ليه أي علاقة بيها,
ال Snow mode بيطلع علي التاني, وبيأخر نقل الغيارات عشان لو ماشي علي طريق مزحلق العربية تحافظ علي أعلي ثبات بأنها متنقلش بدري عشان الكاوتش ممكن يلف علي الفاضي
(يعمل أمريكاني أو يفحط زي ما بيقولو في السعودية)
فالوضع دا بيحافظ علي ثبات العربية علي الأرض في الطرق الزلقة والجليدية, وبيخلي تماسك الكاوتش بالأرض أعلي.
لكن مالوش أي علاقة ولا تأثير الكفرات,,
والميزة التانية في ال Snow mode أنو بيعلي من أداء فرامل العربية بشكل درامي,
لأنو بيسقط غيارات مع الفرامل بشكل أقوي من الطبيعي عشان لو ماشي علي طريق مزحلق أو تلجي يوقف العربية في أقل مسافة,
ولو كنت ماشي بوضع ال Snow mode علي طريق أسفلت عادي هتلاقي أداء الفرامل رهيب معاك.
وساعتها الحمل الوحيد بيكون علي الموتور مش الكفرات لأنه بيسقط علي RPM عالي.
وسواقة المانيوال سهلة جداً ولذيذة جداً, جربها في أي وقت هتعجبك.
اولا اشكر حضرتك علي التواصل البناء
اللي حسيته وكلامك صح عليه ولكن العفشه مع التصاق الكفرات علي وضع السنو بتكون تقيله اوي وكمان ردة فعل الفرامل المرتبطه بالوضع دا بتهد فالعربيه بتسقيط الغيارات فبكدا خطر الضغط علي العفشه والتربيط الامامي كبير والكفرات لزقه فالاسفلت
اما بالنسبه لوضع المانيوال ياريت توضحلي التاني امتي والرابع امتي؟ :)
الشكر لله,
وأحساس بالتصاق الكاوتش بالأرض هوا أحساس وهمي مش حقيقي,
الكاوتش مش بيلزق في الأسفلت زي ما بتحس,,
الكاوتش بيفضل لامس الأرض بنفس وضعه الطبيعي ونفس وزن العربية الطبيعي لأن مفيش حاجة من دول بتتغير,,
الأحساس اللي بتحسه مش حقيقي لأن لو كنت علي وضع ال D العادي ودوست جامد علي دواسة البنزين, فالعربية هتطلع بيك مرة واحدة والكاوتش هيفرك علي الأرض,(يفحط, يطلع أمريكاني)
أما لما بتختار ال Snow mode فالعربية بتطلع علي التاني وحتي لو وقفت برجلك علي دواسة البنزين وجبت واحد صاحبك يدوس معاك, العربية هتعلي RPM وهتطلع طلعة تقيلة عشان تحافظ علي الثبات بتاعها,, وعشان الكاوتش ميلفش علي الفاضي فهتحسها تقيلة وRPM بيرفع كتير من غير ما تاخد سحب وقتي.
ودا زي ما قلت لك التأخير دا بيحصل عشان العربية متفقدش تمساكها بالأرض,
لأنو لو الكاوتشات لفت علي الفاضي لو دوست جامد علي D, ممكن العربية تغرز بيك لو في مكان تلج أو طينة.
أحساسك بإن العربية بتتهد في تسقيط الغيارات علي ال Snow mode دا لأن الموتور بيعمل Engine break مع الفرامل عشان كدا هتحس بتخميدة قوية ودي بتبقي من الموتور وبعدين بيوصلها للفتيس عشان يجبر العجل علي أنه يقلل من سرعته مع دوسة الفرامل بتاعتك.
ودا مش خطر علي العفشة ولا الكاوتش, لأن ال Engine Break هوا تسقيط الغيار العادي,
أنت هتاكل حفر ونقر ومطبات وأنت ماشي هتبقي مؤذية علي العربية والعفشة أكتر من تسقيط الغيارات بتاعت العربية لما تكون عال Snow mode.
بالنسبة لوضع المانيوال مفهمتش سؤالك ب"التاني امتي والرابع امتي"
لو قصدك تنقل عليهم أمتي, فا دي بتعتكد علي أحساسك وعلي مؤشر ال RPM
يعني لو مش عايز تجري أنقل غيار كل ما ال RPM يوصل 3 أو 3.5
لو عايز تجري ممكن توصله ل 4.5 أو 5
الطبيعي أنك تنقل من الأول للتاني علي 20 كيلو
ومن التاني للتالت علي 60 كيلو
ومن التالت للرابع علي 70 أو 80 كيلو.
غير كدا فأنت تنقل براحتك.