ملاحظاتى على الsx4 بعد 11,000كم + اخر اسعار قطع الغيار الشهر ده
السلام عليكم ،
انا لسه عامل صيانة ال10000 بالSX4sedan من يومين كدة ، وحبيت اعمل تقييم سريع تانى للعربية بعد حوالى 12000 فى شهريين ونصف :
اولا انا اسلوب قيادتى يميل للطابع الرياضى ، واوقات بفترى على العربية.
1) فى تحسن واضح فى استهلاك البنزيين ، قبل ال 5000 ، كان ال 45 لتر بعملوا معايا 420 كم فى المتوسط ، انما بعد ال 5000 كم المعدل دلوقتى 520كم ، وديماً التكيف شغال طبعا ، والمشى 65% على الدائرى و 35% فى وسط البلد.
2) ظهر تدريجيا صوت صفير فى العجل مع الملفات والفرامل و بدأ يظهر من 5000 تقريبا ، وظل فى زيادة حتى صيانة ال10000 ، و قولتلهم عليه ، وصلحوه من غير ظبط زوايه ولا حاجة.
3)الجزء اللى علية قشرة معدنية من عصاية الفتيس ، حصل فيه تقشيرة صغيرة ، لا تلاحظ بسهوله ، وحاولت اصورهلكم ، بس مكانتشى واضحة.
4)سحب العربية وتجميعها اتحسن اوى بعد 3000 تقريبا ، هو اصلا كان ممتاز ، بس اتحسن اكتر بعد ما قرصت عليها وانا مسافر على الطريق.
5)مافيش اى ملاحظات على العفشة ، الحمد لله زى الفل ، وانا شايفها مناسبة جدا لارتفاع العربية عن الارض (16.5سم) ، وطرقنا المكسرة فى مصر.
6)صوت المتور واطى جدا مع المشى الهادىء ، و عالى جدا مع الشد ، بس الrpm مابيعلاش عن الطبيعى.
ده كانت باختصار ملاحظاتى السلبية والايجابية عن العربية بعد اكتر من 11,000كم ، والخلاصة انى الحمد لله مبسوط من العربية جدا ومن ادأها ، ولسه شايف انها من افضل السيارات اجمالا فى الفئة السعرية دى.
اخيرا انا ماحبتش امشى من التوكيل و ايدى فاضية المرة دى ، فجبت اخر اسعار قطع الغيار ، من غير الضريبة طبعا :)
فلتر زيت :45 جم
زجاج امامى :1500جم
زجاج خلفى: 475جم
فانوس امامى :700جم
اكصدام امامى: 1650جم
تيل فرامل امامى:450جم
تيل فرامل خلفى:375جم
فاتر هواء: 125جم
فانوس شبورة : 375جم .
انا للأسف معرفتش اجيب غير شوية اسعار قليلة علشان الراجل كان بيطلع قطعة قطعة من على السيستم ، ومفيش عندهم قائمة مجمعة لكل حاجة.