الزملاء الأعزاء

من فتره وأنا بفكر أعمل الموضوع ده ... خاصه بعد ملاحظه كثره الأسئله من زملاء فى المنتدى .. وبفضل الله جمعت صور ومعلومات وطبعا الموضوع مفتوح لكل إضافات الزملاء بالصور أو معلومات غير مذكوره

هحاول ما أطولش عليكو ... ونبدأ بصوره للعفشه الأماميه ... وكل رقم هانتكلم عن الجزء بتاعها



رقم ١ هى الركبه وتتكون من :-

( المساعد - السوسته - الكاوتشه - الكوز - البطاحه - الطبق )
ودى صوره الركبه كامله ومفكوكه



سعر الركبه كامله من ٣٥٠ إلى ٤٥٠ جنيه ... سعر جوز المساعدين جديد من ٧٥٠ إلى ٨٥٠ جنيه
البطاحه من ٧٥ الى ١٢٠ حسب الماركه ... الطبق سعره حوالى ٢٥ جنيه

أكتر عطل مشهور فى المنطقه دى هو تلف البطاحه وطبعا معظمنا غيرها وعارف الكلام ده ... وأعراض تلف البطاحه هو سماع خبطه مع المطبات والطرق الغير مستويه
تانى عطل بيحصل هو تلف الكاوتشه ... وده بيخلينا نسمع خبطه مع مطبات الهوا وإرتفاع المساعد لأقصى مكان

رقم ٢ الطنبوره



طبعا كلنا عارفين مكانها ووظيفتها ... أعراض التلف بتكون حاجتين
أولا المسح .. وهو إن الطنبوره مع الإستهلاك بالبلدى تتمسح وتتبرى وتفقد السماكه بتاعتها
ثانيا الريجه ... وهى إن الطنبوره تصبح غير مستويه وفيها عالى وواطى أو بوش ... وفى كلتا الحالتين العلاج هو التغيير لأن الطنبوره مافيهاش هزار
سعرها جديد ممكن الزملاء عارفينه أنا أعرف ان سعر الجوز إستيراد ٣٥٠ تقريبا

رقم ٣ تيش الميزان


أى عطل فى الميزان بيعمل بوش فى العجل وعدم إتزان فى العربيه .. سعر تيش الميزان ١٢٠ جنيه ماركه روفال .. ألمانى

رقم ٤ كاوتش الميزان



أعراض تلفه هو ملاحظه صوت تزييق مع الطرق الغير مستويه ( صوت إحتكاك كاوتش أقرب للتصفير )
سعر كاوتش الميزان ٥٥ جنيه ماركه فيبى ألمانى

رقم ٥ ذراعات الإسكاترا

هى دى اللى بتنقل حركه الدركسيون من الإسكاترا للعجل ... أعراض التلف وجود دردره فى الدركسيون وإهتزاز ... سعرها تركى جديد الواحد حوالى ٩٠ جنيه

رقم ٦ المقص



المقص زى ما هو واضح له ٣ أطراف ... طرفين فيهم جلب واحده صغيره وواحده أكبر شويه وبيركب الجزء ده فى كروسليه العربيه والطرف التالت فيه بيضه بيكون راكب فى خلف الطنبوره
تلف الجلب بيكون عباره عن بوش فى العجل ... وسعر طاقم الجلب حوالى ١٢٠ جنيه تقريبا للجلبتين سواء الكبير أو الأصغر
والأفضل مقص كامل إستيراد بجلب سليمه لأن الجديد مهما كان نضيف مش هايبقى زى الأصلى


التفاصيل دى على قد خبرتى المتواضعه طبعا بجانب الخبراء الكبار فى المنتدى ... وحاولت أختصر على قدر المستطاع وطبعا الموضوع مفتوح لجميع الزملاء لإضافه معلومات وصور لتعم الفائده

تحياتى