الموضوع: هقولكم سؤالي وحد يفيدني

اهلا بيك يا باشا..
أولا الف مبروك علي العربية..
ثانيا.. كان افضل من ده كله انك تجيبها موتورها الاصلي 1200 علي طول..
بدل ما تجيب و تغير و الكلام ده.. وجع دماغ..
بس حصل خير و كل شيء نصيب..
لو هتغير الموتور يبقي متعملش سيرفيس ولا حاجة..
هتعمل ده كله و ترميه ف الارض.. يبقي فلوس علي الفاضي..
الموتور ال1000 سي سي.. مش محبوب قوي في مصر عشان فيه حساسات كتير.. و صياناتها و اسعارها غالية.. و ممكن متلاقيهاش..
السعر اللي جيبتها بيه معقول.. لو العربية نضيفة اساسيات و من جوة..و مش متهانة..
اما نيجي بقي لموضوع تغيير الموتور.. لو هتغير يبقي في قدامك موتورين..
هي مفيش فيها مواتير 1300 خالص..
هما 1200 و 1400..
ال1200 موتور عادي جدا و بسيط جدا جدا.. و ده قطع غياره في كل حتة بتتباع جديد و استيراد..
و اخر مرة سمعت عن سعره عرفت انه في حدود 5 او 6 الاف جنيه.. بالفتيس..
هو غالي شوية بس عشان اشد بكتير و اسهل من ال1000 و ده اكتر مواتير الناس بتسقطعا ف الكورسا دي..
الموتور التاني 1400.. اقوي طبعا من ال1200.. و اخونا محمد زعتر هنا مركبه..و زي الفل.. بس فيه مشكلة صغيرة.. انه قطع غياره مش متوفرة قوي جديد.. هتضطر انك تعتمد علي الاستيراد..عشان ده موتور نزل في الكورسا و التيجرا.. و الموديلين دول مش متوفرين في مصر كتير.. و بالتالي محدش بيشتغل في قطع غيارهم خالص تقريبا..
و الموتور ده ارخص من ال1200 مع انه اقوي بس عشان النقطة اللي قولتهالك..

ارجو اني اكون افدتك.. و لو نويت خلاص علي التسقيط.. هاجيب لسعاتك لينك عن تعديل زي اللي انت عملته بالظبط عندك.. عمله زميل لينا هنا.. و تشوف بقي كل اللي انت عايزه..

معلش يا اختنا العزيزة
بس انا ليا اختلاف بسيط معاكي في الموضوع ده
انتي كده هتفتحي على نفسك موال كبير
اولا : موتور استيراد ده بيبقى مستعمل وجاي من بره (استعمال الخارج) وطبعا قديم مش جديد
ثانيا : تعرفي ازاي انه مش بايظ وسليم ديه ما تعرفيهاش الا لما يتسقط في العربية ويدور وتجربيه
ثالثا : ممكن تشتريه من الحرفيين او الوكالة او من بورسعيد
انت كده محتاجة واحد معاكي يكون دليل ليكي عشان ما ينضحكش عليكي (يفضل يكون ميكانيكي معرفة وثقة)
اقولك انا نصيحة من الاخر
اركبي العربية على حالتها لفترة معينة وبعدين بيعيها وهاتي واحدة تانية مايكونش فيها مشاكل ووجع دماغ
وتحت امرك في اي استفسار

رامي (ابو احمد و يوسف)

شوفي يا ستي..
اولا موضوع التسقيط و الموال ده وجع دماغ جامد جدا.. وخاصة لو بنت اللي هتعمله..
ولو انتي عايزة تعملي الموضوع ده يعني يبقي تسعدي لشوية تعب و مشاوير و سفر و الكلام الكبير ده..
وبعدين في حاجة كمان..انتي عشان تشتري الموتور و تركيبه و كده.. و خاصة الموتور ال1200 ده اللي هو الانسب ليها في مصر.. عشان قطع الغيار.. هيقف عليكي غالي شوية.. يعني بتاع 6 الاف جنيه.. ده تمنه لوحده اخر سعر كنت سمعته.. الله اعلم بقي دلوتي اغلي ولا ارخص ولا نفس السعر..
يعني ممكن تدخلي في 7 الاف مستريح.. و كده لو حبيتي تبيعي العربية مش هتجيبلك كل المصاريف اللي صرفتيها فيها.. ده غير التعب و الوقت و اللف و الدوران وا لوش ده كله.. برضه ليه تمن..
النصيحة فعلا انك تحاولي تبيعيها ولو حتي بسعر اقل الف ولا حاجة.. و تشوفي واحدة جاهزة 1200 و تركبي التكييف انتي و كده هتبقي فل.. و برضه العربية هتبقي مش ملعوب فيها و كل حاجتها اصلية راكبة فيها من المصنع..
اما موضوع التسقيط.. فهاقولك التفاصيل من واحد صديق شغال في موضوع الاستيراد ده.. بس غالبا مالوش في الاوبل و المواتير الصغيره.. بس برضه هاسألهولك احتياطي..
الموتور الاستيراد ده موتور كان راكب في عربيه شغاله بره مصر ... و بيتحدد حسب البلد اللي كان راكب فيها في العربيه .. فمثلاُ سويسرا بيبقي فيها صيانه دوريه اجباريه و فحص عادم و مابيوافقوش علي ترخيص العربيه الا اذا كان كل مسمار فيها الاوريجينال و بحاله الجديد .. و علشان كده شغل سويسرا بيبقي حلو ... المانيا نفس النظام بس مش بنفس المستوي .. فبالتالي الموتور بتاعها بيبقي حلو برضه .. ايطاليا و فرنسا اقرب الي مصر .. و بالتالي حالات المواتير بتبقي مش قد كده .. واي موتور بيتباع لازم يتاخد علي النجربه اقل حاجه 10 ايام و لازم يتم التاكيد علي النقطه دي مع اللي بتشتري منه.. و عشان كده لو نويتي يبقي يفضل انه يكون هنا ف القاهرة.. بدل ما تسافري بالعربية وهلي ممكن متكونش مظبوطة ولو طلع فيها حاجة ترجعي بيها تاني..و الموتور بتشتريه بالفتيس بتاعه بسيرفو الفرامل بتاعه كمان.. و الكونترول يونيت وكل حاجة.. عشان يركب كله مع بعضه.. و خلي بالك من حاجة.. الباور بتاع العربية هيتلغي.. مش هتبقي باور.. عشان الموتور الجديد علبة الدركسيون بتاعته عادية.. بس مش تقيل يعني كويس..
و التكييف برضه مش هيكون فيها.. و بالتالي ممكن تركبي التكييف اللي كان راكب عندك تاني.. و كده برضه وجع دماغ شوية في تركيبه تاني و تظبيطه و كده.. وقت و تعب و مصاريف برضه..
و الموتور القديم بتاخديه مش بتسيبيه للي بتشتري منه.. هتجيبيه و تبيعيه انتي.. يا اما لو هو هياخده يبقي بمبلغ كويس.. يعني بتاع الف ولا حاجة.. مش اقل من كده..
لو حبيتي تركبي الموتور في بورسعيد عندي شوية تفاصيل ناس هناك امينة و ممن يفيدوكي ان شاء الله.. لكن لو هتركبيه هنا.. انا ممكن افيدك في حد يركبه.. لكن حد يساعدك انك تشتريه نضيف فدي بقي مش متأكد منها بس ممكن اسألك لو حبيتي..
التوكيل بقي.. منصور مش هينفع تركبيه هناك عشان هما مش بيركبوا حاجة انتي جايباها من برة.. لكن مقار ممكن.. بس اعملي حسابك انهم المصنعيه بتاعتهم غالية جدا.. يعني ممكن الموضوع يدخل الافات.. مش الف واحدة.. و هتبقي مشكلة كبيرة.. هتلاقي نفسك صارفة علي العربية 10 الاف جنيه ولا اكتر كمان..
وموضوع قطع الغيار بقي دي مش مشكلة خالص.. في اكتر من واحد الجديد و المستعمل موجود و رخيص و الناس كويسة اللي باتعامل معاهم..

اللي انا اعرفه و شوفته في كل اللي بيسقط مواتير 1200 بيلغي الباور..
لأن الموتور ده اصلا بينزل من غير باور.. هنا و برة..
موضوع انه يتركب في الموتور ال1200 ده مش متأكد منه.. و اللي سمعته انه مش بيطلع مظبوط..
بس ممكن اسأل و ابقي ارد عليكي..

ف القاهرة الوحيد اللي انا اعرفه و هو انضف واحد اوبل ف الحرفيين اسمه العايدي.. بس انا مش عارف بصراحة بيجيب شغله منين.. بس هاحاول اسأل و اقولك..
اما نيجي بقي لموضوع الميكانيكي..
الزاجل ده متخصص اوبل..؟؟ انا اشك في كده.. ازاي موتور 3 سلندر يكون وشه من فوق ينفع يركب علي موتور 4 سلندر..؟؟ حاسس بحاجة غلط.. سيبك من موضوع الميكانيكي ده.. انا مش مرتاح لكلامه. و بعدين انتي لازم تاخدي الموتور علي بعضه لسبب.. عشان لو طلع فيه حاجة هترجعي ترجعيه و تاخدي غيره.. علي بعضه.. او تاخدي فلوسك.. لكن لو قطع و الكلام ده.. هيبقي اخر عك.. ولو طلع حاجة فيها عطل او مش مظبوطة.. هتبقي مشكلة و هترميها ومش هتنفع ترجع..

لو نويتي خلاص علي تسقيط يبقي موتور علي بعضه.. و مؤقتا تنسي الباور.. و هي من غير باور مريحة و ممتعه قوي علي فكرة..
ولو نويتي علي بورسعيد.. الراجل اللي قولتلك عليه كويس جدا بس مش متأكد هو بيشتغل في اوبل ولا لأ.. بس رأيي الشخصب خليكي ف القاهرة عشان المشاوير.. لو طلعت حاجة مش مظبوطه..

طيب كوييس يا باشا انك عارف حوار الباور ده عشان انا ماعرفش فيه خالص.. :) :)
مانا 1200 بقي و مش عندي باور اساسا..
وارد طبعا ان الموتور ال1000 يكون اداؤه احسن من ال1200.. عشان انجيكشن كامل مالتي بوينت مش سينجل زي عندي.. ف ال1200.. بس مشكلته ف ال3 سلندر.. و حاجة تانية..
اللي هي الحساسات بتاعته.. اللي من ناس ملاك العربية لو حاجة فيهم باظت.. بتبقي مقرفة جدا عشان في حاجات منها بتكون غالية جدا و ممكن متلاقيهاش استيراد.. او ممكن تجيبها و تكون بايظة و مضروبة و كده.. يعني لما تصرف علي الموتور حساسات بتاع 3 او 4 الاف جنيه مثلا.. في حساسين او 3.. يبقي كتير قوي.. اكمل عليهم و اغير موتور بموتور سهل و مفيهوش وجع دماغ كتير.. عما 3 او 4 سنسورز و السلام ختام,..