رينو ميجـان ii --ولا-- أوبل فيكترا سي (رجاء)
السلام عليكم ورحمه الله تعالى وبركاته ...
كل سنة وحضرتكم طيبين بمناسبة قرب السنة الجديدة ، يارب تكون سنة سعيدة على الجميع .. وربنا يسترها إن شاء الله على بلدنا الحبيبة.
من فترة كدة كنت عملت موضوع في قسم رينو عن الأسطورة رينو ميجان ، وكنت بسئل فيه على مدى أعتماديتها .. مع العلم إنى متابع تقريباً كل المواضيع عن العربية بقالى سنتين تقريباً او يزيد .. وأنا بحبها جداً جداً .. و إن شاء الله ناوي عليها و كل يوم اخش اتفرج على كونتكت كارز و أنزل سوق مدينة نصر ... بس كل ما اشوف عربية نضيفة .. و خلاص أقول هى دى ... أراجع نفسى تانى .. من كتر اللى كنت بشوفه في مواضيع الاعضاء .. افضل افتكر الرسايل اللى بتطلع فجأة على شاشة الكمبيوتر ... وطبعاً لازم على طول أروح اكشف عليها .. وافتكر قطع الغيار -- مع إنى ملاحظ انها رخصت بنسبة كويسة عن زمان -- بس برضو أقول هى رخيصة اه بس مش لدرجة إنى كل أسبوع مثلا هروح أعمل صيانة في العربية !! ماهو أنا مقلق منها ( مع إن البعض هيقولى مأنت لو محافظ عليها ، مش هيحصلها حاجه !! بس برضو خايف !! بالمناسبة انا من المعادى - وصقر قريش جمبى يعنى - يعنى كل اللى شغالين فيها هناك وقريبين منى ، بس برضو الخوف من العربية ومن كثرة - إلى حد ما - الكلام اللى بشوفه هنا من الاعضاء ،، حاسس إنها مش إعتمادية للدرجة اللى الواحد يقدر يفتح باب العربية ويحط المفتاح و يدور ويمشى بيها وبعدين يشيل المفتاح ويقفل الباب ويمشى !! يعنى إللى عاوز أقوله إنى لو جبتها هفضل طول مانا ماشى بيها خايف !!
ومن فترة برضو ، شوفت الأوبل فيكترا سى ، و أعجبت جداً بالموديل المانيول منها .. وتقريباً هى والميجان في نفس رينج الأسعار - على إعتبار إنى هجيب ميجان نضيفة في رينج أخر السبعينات أول التمانينات - وبرضو بصيت على قطع غيار الأوبل في قسم الأوبل ومتابعة العضو المميز في قسم أوبل - أحمد فهمي - ربنا يباركله يارب ،،، قدرت اجمع فكرة عن قطع غيارها .. وبرضو كويسة جداً على إعتبار الكلام اللى بيتقال إنها غالية علشان ألمانى ! ... وبرضو لقيت اللى بيشتغل فيها في صقر قريش ،، يعنى برضو زى الميجان ، حاجه زى الفل يعنى .. بس الفرق هنا إنى ملقتش كمية المشاكل والكلام اللى في بيتقال في الميجان .. رغم إن العربيتين تقريباً في نفس الفئة ونفس التكنولوجيا و نفس الأوبشنز - إلى حد ما - فدة اللى هيجنن الواحد .
يعنى بإختصار هموت ع الميجان ونفسى فيها جداً :_Alshmokh11: ،، بس مقلق منها زى ما شرحت فوق ، وهل هصرف عليها كتير و إلخ إلخ ... في حين إنى لقيت عربية تانية - أوبل يعنى - في نفس الفئة و الأوبشنز وقطع غيارها متقاربة إلى حد ما من الميجان ... بس شايفها مافيهاش كل المشاكل اللى في الميجان ... (الشبح اللى اتولد في رأسى من الميجان ، هو شبح الرسايل اللى بتطلع على الشاشة ،، وكل ما حد بيطلعله حاجه ، ياخدها جرى على التوكيل و اى ميكانيكى بره ويحهطها على الكمبيوتر ، و في الاخر لازم يوصل أنه يغير قطعة غيار معينة !! ودة اللى مخلينى حاسس إن الرسايل اللى بتطلع دى ،، هتفضل تطلع للواحد كل شوية !!)
معلش أنا طولت عليكم جداً ،، وأنا بتأسف جداً ،، بس هى الحيرة وعدم الثقة مخليانى عايش في خوف ،، و دلوقتى أنا محتاج عربية و ضروري جداً ، فامش عارف أعمل إيه ،،
أرجو النصيحة ، ولا تبخلوا عليا بيها ... وجزاكم الله خير .. وأسف للإطالة مرة أخرى :openflower3:
أخوكم سامر مرسي - مهندس إتصالات وإلكترونيات - 23 سنة - زهراء المعادي (مدينة بيتشو أمريكان) - عاطل حالياً :36_1_1[1]::ma: