دي عيوب ال a7 إللي اتفق عليها جميع ملاكها + مميزاتها من خلال شبه تجربتي ليها!
سلام عليكم
كنت قابلت مقابلة شخصية كذا واحد من ملاك ال a7 وزي ماقلت اتفقوا على عيبين رئيسيسن في العربية وهما :
1- الثبات السيئ
2- العزل السيئ
وكان من ضمن إللي قابلتهم واحد معاه a7 هاي لاين وكنت ساعتها في توكيل القطامية مستني عربيتي تطلع من الصيانة لقيته جاي بالعربية بيشد في شعره ومستاء جدا من الثبات والعزل وفاكره عيب صناعة في عربيته وطبعا طلعلوا كذا مهندس من التوكيل وأقنعوه إن العربية كده ومش عيب صناعة ولاحاجة وللعلم كان معاه غير العربية دي باسات وbmw 320i فعارف كويس قوي يعني إيه ثبات
يعني لو كان معاك قبل ال a7 عربية ياباني أو كوري مش حتتضايق أوي من موضوع الثبات لكن لو كان معاك ألماني حتتعب شوية
خصوصا إن سمعة الأوكتافيا a5/fantazia في الثبات إللي فوق الوصف مشهورة قبل ماتيجي ال a7 وتكسر السمعة دي للاسف بسبب زي ماذكرنا سابقا إن عفشته تورشن بيم مش ملتي لينك وده الرابط لمشاركة سابقة ليا من فولكس نفسها توضح الفرق بينهم (المشاركة رقم 80) http://www.nilemotors.net/Nile/37007...post3875114297
لكن برضه مننساش إن ال a7 نازلة ستاندرد بتراكشن كنترول فده ممكن يعوض شوية
نيجي بقى للميزاتها من خلال مقارنتها بال a5 بالتحديد وذلك من خلال شبه تجربتي ليها بمعنى إني ركبت العربية في المعرض وفليتها بالإضافة إني جربت أكتر من مرة سواقة أختها golf 7 فكونت فكرة كاملة عن العربية :
1- توفير رهيب في البنزين بعكس سابقتها غول بنزين ويارتها حتى بتجري
2- الدركسيون بقى أخف
3-دواسة الفرامل بقت أخف
4- الكراسي بقت أريح كتير خصوصا الكنبة الخلفية فرق شاسع صراحة , ضهر الكنبة الخلفية مبقاش جاي بزاوية قائمة زي ال a5
5- العربية بقت أوسع طبعا
6- الساوند سستم لسه محتفظ بجبروته بعكس ال golf 7 & new leon إللي جودة الصوت فيهم قلت جامد عن سابقيها وتقريبا ده يرجع للكاسيت الرديء إللي نازلة بيه العربيتين لإن عدد السماعات فيهم 8 برضو
7- المتور ال tsi 140hp ساااااااافل بكل ماتحمله الكلمة من معنى ومش حيفهم قصدي غير إللي داق طعمه هو والفتيس الوهمي ال dsg
المتور عصبي جدا جدا وده مش بس بيرجع لل 140 حصان لأ عشان كمان العزم المتفجر إللي في المتور إللي هو ضعف أي عربية 1.6 وهو 250nm وبيفتح على rpm 1.500 وهي دي قمة المتعة في ال tsi بتلاقي العربية بتجري جامد وبتشد من غير حرق عالغيار يعني عشان توصل ال rpm فوق ال 3 يبقى إنت كده بتعمل جريمة والفتيس ال DSG من سرعة نفلته مبتحس بيها فعلا إختراع
بجد أنت طول الوقت بتحاول تحسس على دواسة البنزين عشان تمشي بسرعة الشارع وبرضه غصب عنك بتلاقي نفسك بتسبق باقي العربيات , بتحس إنك في عالم منفصل عن أي عربية 1.6 لدرجة إنك صعب أوي تعرف إذا كانت العربية ال 1.6 إللي قصادك بتشد معاك ولا لأ
أنا مرة كنت طالع بعد مطب فريحت شوية عالبنزين من غير ماأقصد راحت العربية لازقه ضهري في الكرسي وجارية إتنرفزت ساعتها عالعربية وزعقت زي المجنون وقلتلها أهدي بقى هو في إيه :argue2: أنا حركز في السواقة ولا في التحسيس على دواسة البنزين
طبعا قوة المتور كوم وال DSG كوم وصوت ونة التربو عند الحرق حاجة تانية خالص
وبالمناسبة العربية بتاخد بنزين 92 من غير أي كركرة نهائي بعكس الباسات ال FSI وصاحبي عمل أكتر من 5 آلاف كم بالفتيس ال DSG ولسه ماظهرش عنده أي مشاكل
وتجربة المتور ده كانت من التجارب إللي مش حنساها في حياتي
والصراحة مع إن معايا سكودا لكن لوحبيت أغير عربيتي ممكن اتجه للأوبل إنسجنيا بدلا من A7 البيزلاين لإنها فقيرة جدا بالأوبشنز بعكس الأبل
لكن لو معايا فلوس A7 الهاي لاين أكيد طبعا ومن غير تفكير حتجه لإسطورة مرسيدس الجديدة CLA
