الموضوع: تنبيه هام بخصوص مروجى اشاعات البنوك

اولا شكرا لصاحب الموضوع على التنبيه
*الكلام اللى جاى للتوضيح وليس موجه لاحد *
ثانيا وضعنا الاقتصادى سئ ده واقع مش حنهرب منه والحكومه بتستلف ده بيحصل ولكن ده بيحصل فى كل الحكومات المصريه يمكن من 40-50 سنه ومش عندنا بس فى اغلب دول العالم وفى الصداره منها امريكا "القوه العظمى " والدين الداخلى والخارجى بتاعها رقم عبيط كده اضعافنا فاللى بيحصل مش اختراع
واحوال البلد الاقتصاديه السيئه متدهوره من 2011 وده مش سر والتضخم كل سنه بيزيد من قبل 2011 بالرغم ان معدله زاد شويه الا ان ده بسبب حاجات كتير مش وقت سردها والتضخم بيحصل وحيفضل يحصل فى العالم كله لانه مرتبط بوجود الناس وتطلعاتهم

ثالثا فلوسك حتى لو سحبتها من البنك فانت لو مشتريتش حاجه زاد قيمه فى زاتها تبقى بتضيع نفسك "وجهه نظرى" لانك بالتالى لو شلتهم تحت البلاطه يبقى انت بتخاطر بفلوسك فى وضع امنى غير جيد وغير كده اذا بلدك مصر اعلنت افلاسها فاعتبر فلوسك ورق جرايد لا قيمه له الا لو شايلهم بعملات اجنبيه واللى صعب تجيبها حاليا .

رابعا لو حابب تساعد نفسك وبلدك وعايز تامن فلوسك اشترى حاجه تساعد فى تقدم البلد وتأمن فلوسك سواء عقار "مرخص" او ذهب او اعمل مشروع استثمارى ولو مش حابب خللى فلوسك فى البنك ومتقلقش البنك المركزى بيشترط نسبه من فلوس المودعين تبقى محفوظه عنده "مش ورقيا انما ماديا" وكده كده سنويا قيمه الودائع بتزيد سنويا فالناس مش بتبطل تحوش .

خامسا الموضوع مش مستاهل تشاؤم ومحدش يفتكر انها لما تتعك حتلبسها الحكومه او اللى ماسك البلد اول محتتعك حتيجى على دماغ الناس "انا وانت" فمش من مصلحتنا اننا نبشر ببوظان الدنيا

واخيرا الحكومه لو بتطبع فلوس مش حتستلف من البنوك ولو استلفت من ودائع البنوك "سندات " مش حتحتاج تطبع فلوس وده علشان الموضوع عامل لبس عند بعض الناس لان الحكومه بتستلف علشان تسد عجز الموازنه شامل اقساط ديونها القديمه وباقى فلوس الدعم على المنتجات وده طبعا لان مفيش فى البلد حد بيدفع ضرايب "غير الموظفين " ومفيش حد مبيتهربش من الجمارك "الا من رحم ربي" وهم دول ايرادات اى دوله فى العالم وبالتالى المشكله والحل فينا احنا "يا ندفع الضرايب ومنكتبش فى اقراراتنا اننا خسرانين وندفع جماركنا بدون مخلص يا نتحمل رفع الدعم يا نستحمل شحاته الحكومه من البنوك علشاننا "

وفى النهايه انا عايز اقول الحلول مبتبقاش بالتهوين ولا بالتهويل فيا ريت نعرف احنا ايه وظروف بلدنا ايه ومين صاحب المشكله ومين باديه الحل ودايما نفتكر ان الثوره الاصعب هى ثوره نفسنا على طباعنا وسلوكياتنا .
تحياتى .