صيانه 40 الف هام لكل الاسكندرانيه مودرن موتورز الحضره
السلام عليكم
حبيت انقل لكم خيبتي قصدي خبرتي اللي مريت بيها اثناء الصيانه لعربيتي نيسان صني 2011
حجزت في مودرن موتورز فرع الحضره وروحت قبل ميعادي بشويه المهم قابلني الشاب الممشوق القوام اللي هو مهندس الاستقبال وبابتسامته الساحره قالي قول المشالكل اللي عندك قولتله
1- صوت تزييق في العفشه
2- تكه في الجنب الشمال
3- صوت الماتور عالي
4- صوت تزييق من الخلف عند رفع القدم من علي دواسه الدبرياج ودا بصوره مش دايمه
قالي هنعمل صيانه الاربعين وهيتم تغيير كل من
1- البوجيهات وفلتر الهوا والزيت وزيت الباور والفتيس وزيت المحرك وماء التبريد قولته اوك قالي هتستلم علي الساعه 2 قولت مفيش مشكله
بعد ساعه ونص اتصل بيا وقالي هناجل الميعاد ل3ونص عشان نشيك علي الحاجات اللي بتشتكي منها
المهم روحت رايح التوكيل تاني وقعدت اتفرج الصيانه ببتعمل ازاي
اولا مجرد تربيط للعفشه بعد تنضيف الطنابير والكشف علي الفرامل قالي التيل عايز يتغير قولتله اوك بكام ( وهنا كانت المشكله وبدايه الشك في كل حاجه ) قالي ب485من غير الترركيب قولتله بره ب360 بالضريبه المهم اتصلت بتوكيل الهندسيه اللي علي الصحراوي وفعلا كان ب361 طبعا المهندس الامور اتلخبط وقالي ازاي قومت مكلم التوكيل تاني وسمعته السعر بنفسه فرق تقريبا 200 جنيه في تيل الفرامل ليه يعني اللهم لا اعتراض قولتله ركبه انا مفيش عندي حيل اروح هناك وركب الطقم وعمل الصيانه وخلص الشغل علي الساعه 5 تخيلو ملطوع من 9 الصبح لا وكمان طلعتلي مشكله تانيه وهيا صباع مكنه المارشيدير مكسور ودي بقا مش موجود في التوكيل مش عارف الناس دي مفكره ان كل اللي بيصين في التوكيل دا حرامي ولاايه وعندهم مخزن قطع غيار عايوين يخلصوه ولا ايه الحكايه انا مش عارف وفي الاخر اجمال التكاليف في لصيانه 2000 جنيه واسف لالاطاله
