الموضوع: ازاي انقل الملكية من القاهرة للغربية مثلا

السلام عليكم ورحمه الله وبركاته

لي استفسار من الاخوة هنا
لما تشتري عربية من القاهرة مثلا وانت في محافظة تانية ايه اجراءات نقل ملكياتها وكم التكلفة
طيب وهل لو العربية فيها رخصة مثلا لغاية شهر 6 2014 والفحص مثلا 2016
لما تيجي تنقل ملكية تفحص بردوا ولا لا
وهل لازم العربية لما تفحص ميكنش فيها غلطة لا في ماكينة ولا سمكرة وبوية ولا اي حاجة
وشكرا لكم

المشاركة الأصلية كتبت بواسطة محمد طايع

مش لازم الرخصه تنتهى ابدأ فى اجراءات النقل فى آخر اسبوعين من الرخصه القديمه ده هيوفر عليك شهادة البيانات

على قد ما انا فاكر لما نقلت الأجراءات كالتالى

- هتروح المرور بتاعك هتجيب اورنيك فحص للعربيه واورنيك طفايه

- هتطلع على الفحص فى بلدك برضه هياخد بصمة العربيه ( رقم الشاسيه والموتور )
وهيكتبلك على ظهر اورنيك الفحص انك تروح تعمل مطابقة للبيانات من مرور العربيه الأصلى

وممكن تعمل الطفايه بالمره بس لازم تكون بتاعة العربيه (مدموغ عليها آخر ثلاثة ارقام من الشاسيه او جديده ) ويكون تاريخ صلاحيتها سارى - لو مش سارى بتعملها عند اى محل طفايات

- هتسافر لمرور العربيه الأصلى وتعمل المطابقه دى بتبقى من غير فحص هناك ما دام ملف العربيه موجود بيطلعه ويطابق البيانات الى عنده من ارقام والوان وخلافه بالى مكتوب عندك فى الأورنيك وييكتبلك ما يفيد ان العربيه مطابقه

- تطلع شهادة مخالفات ولو الرخصه كانت خلصت هتطلع شهادة بيانات كمان

- ترجع تانى على بلدك وعلى نفس مكان الفحص بتاعك توريله المطابقه هيبص على العربيه من ناحية الصاج والدهان ويكتبلك انها لائقه ( عندى بص نظره من بعيد كده وخلاص )
وتمضى وتختم الأورنيك من الظابط الى بيكون موجود فى مكان الفحص برضه

- تدفع الضريبه بتاعة العربيه والتأمين سواء سنه واحده او ثلاث سنوات زى ما تحب

- تشترى دوسيه ملاكى من الأكشاك الى جنب المرور ( ورقه صفراء متطبقه غالبا ) وتحط فيها كل ورق العربيه عقد الملكيه - شهادة المخالفات (او شهادة البيانات لو الرخصه خلصانه ) واورنيك الفحص بتاع العربيه وبتاع الطفايه وورق التامين وفيه نموذج ( مش فاكر رقمه كام ) وشوية طوابع كده هتشتريهم من خزنة المرور نفسه

- مهم جدا انك تصور كل حاجه نسختين او تلاته ( الورق السابق ذكره وبطاقتك الشخصيه ورخصة العربيه ) وخليهم معاك فى دوسيه منفصل احتياطى
لأنه هيطلب منك صور لما تيجى تسلم الدوسيه وممكن تطلع من الطابور الى بقالك ساعتين واقف فيه علشان تصورهم وترجع تقف من الأول :)

- بعد ما الملف بتاعك يتقبل هيطلعولك تصريح مؤقت 3 شهور لغاية ما ملف العربيه الأصلى ييجى من المرور وبعد شهرين ونص كده ولا حاجه روح اسأل لو كان الملف جه هيطلعلك الرخصه وفيها رقمك الجديد ( النمره )

هتسلم النمر القديمه بتاعة العربيه وتستلم النمر الجديده ومبروك عليك

طبعا فيه رفايع انا ناسيها بس يعنى ده عضم الموضوع

تقبل تحياتى

تسلم يا باشا الف شكر ليك علي شرحك الوافي