السلام عليكم ورحمة الله
أنا أولادي في مدرسة النزهة للغات اللي على طريق مصر الإسماعيلية قبل مدينة العبور بس بالرغم من إن المدرسة كمستوى أخلاقي وديني وتعليمي نقدر نقول كويسة إلى حد ما إلا أن أسوأ ما فيها إدارتها لأن عندهم عجرفة وغرور ومش بيهتموا بأي شكاوى لأولياء الأمور وبيتعاملوا دائما مع شكاويهم بشيء من الاستخفاف أو التجاهل ودايما تلاقي لهم تبرير لكل حاجة سواء تبرير بحق أو بباطل لدرجة إنهم طردوني من الجروب الخاص بهم على الفيس بوك العام الماضي والسنة دي طردوا زوجتي كمان ! تخيل لما ولي أمر ينطرد من جروب مدرسة لمجرد إنه بيعترض على أسلوب المدرسة أو إدارتها وبينقدهم نقد موضوعي بدون تجاوز
بالإضافة إلى استهبالهم في موضوع الفلوس يعني مفروض إني بدفع حوالي 10 آلاف لكل ولد شاملين الأنشطة اللي من ضمنها الرحلات والحفلات المدرسية وخلافه وفجأة تلاقيهم باعتينلك عايزين 150 جنيه علشان نشتري لبس للأولاد يحضروا بيه الحفلة !! وفي مرة طلبوا مني أشتري لبس "الفيل" للولد علشان يمثل مسرحية في المدرسة واللبس ده كان في حدود 150 جنيه برده واتلبس مرة واحدة واترمى بالإضافة للرحلات برده طالبين 100 جنيه علشان يدخلوا الأولاد قرية كيدزانيا اللي تذكرتها أساسا ب130 جنيه !
المهم علشان مطولش أنا بدور على حاجة تكون في نفس المستوى أو أحسن وتكون في نفس رينج المصاريف برده وتكون قريبة منها يعني في الشروق مثلا سمعت إن هناك مدارس كويسة فاتحة جديد وأسعارها معقولة جدا وجودتها كويسة وميزة الشروق إنها هادية ومش زحمة فهتلاقي عدد الأطفال في كل فصل قليل على عكس مدرسة النزهة اللي ممكن يوصل عدد الأطفال إلى 35 طفل في الفصل الواحد زائد إنهم السنة دي بنوا مباني جديدة علشان يقبلوا أعداد تانية وبالتالي النتيجة هتبقى زحمة في زحمة خاصة إن المدرسة مش كبيرة أساسا كمساحة لكن نقول إيه في الجشع
أهم حاجة عندي في المدرسة المطلوبة إنها تكون لغات ويكون المستوى الأخلاقي والديني كويس وبصراحة دي أكتر حاجة خليتني أدخل الأولاد النزهة لأن كstaff مدرسات ومشرفات ومديرات ما شاء الله عليهم فأنا عايز حاجة في نفس المستوى أو أفضل كمان
ومش لازم في الشروق ممكن في مناطق تانية تكون قريبة برده زي طريق الإسماعيلية مثلا في كذا مدرسة بس المشكلة إني سألت عنهم فلقيت يا إما غالية جدا يا إما مفيش مستوى أخلاقي وفي شيء من الانفلات وده تحسه حتى من لبس المدرسات ومظهرهم العام
ملحوظة: بلاش مدينة العبور لأني دورت كتير برده وملقيتش مدرسة واحدة تستاهل كلهم أسوأ من بعض للأسف وعن تجارب أولياء أمور كتير
أرجو حد يفيدني مع جزيل الشكر وآسف على الإطالة
المفضلات