-
انا مش فاهم حاجه
الحمد لله وبعد طول تفكير وعمل مقارنات استقريت علي اللانسر 1300 مانيوال ولما ابتديت اتعمق فيها لقيت ان في حاجه اسمها لانسر خليجي ولانسر مصري وبالرغم من كثره المواضيع في هذا المنتدي عن هذا الموضوع الا اني مش فاهم حاجه
1-الخليجي احسن ام المصري
2- الفرق في الاسعار كام
3-هل الخليجي دي بتتباع في المعارض
4-هل بتفرق في ورقها وترخيصها وكده يعني
وبصراحه انا اسمع من زمان ان في حاجه اسمها عربيات خليجي بس كانو دايما يقوللنا اوعي تشتري الخليجي لانو مش مناسب للظروف الجويه بتاعتنا يعني هناك بيبقي حر وكده
-
أهنيك على إختيارك اللى شايفه أحسن إختيار فى السعر دة
أما بخصوص الخليجى فعاوز أقولك ان أكتر من 70% من العربيات اللانسر اللى بتشوفها فى الشارع دى خليجى وبخصوص الأسئلة بتاعتك:
1-الخليجي احسن ام المصري
مفيش فرق بينهم غير فى موضوع البنزين واللى بينصح بإستخدام بنزين 95 فى الخليجى ودة مع ال 1600 بس ، وطالما انت ناوى على 1300 يبقى المشكلة دى مش هاتفرق معاك. وفى شوية فروق فى الكماليات ، يعنى ممكن تلاقى حاجات موجودة فى المصرى ومش موجودة فى الخليجى والعكس. أعتقد الخليجى ما فيهاش ABS
2- الفرق في الاسعار كام
المصرية أغلى من الخليجى حوالى 5000 جنيه
3-هل الخليجي دي بتتباع في المعارض
معظم اللى موجود فى المعارض خليجى
4-هل بتفرق في ورقها وترخيصها وكده يعني
لا مفيش أى فرق
-
الف شكر لردك واتمني التوضيح اكثر بالنسبه لاجابه السؤال الاول
وبالنسبه للضمان للخليجي ايه؟وازاي افرق بينهم ؟
-
يا باشا زي ماقولتلك قبل كده الخليجي أحسن من المصري وبتتعرف من :-
الخليجي اإريال على السقف من ورا ، المصري على القايم الشمال
الخليجي فوانيس الخلفيه شفافه كريستال المصري حمرا
الخليجي مكتوب على القيام اللي من ناحية السواق بعد ما تفتح الباب ( المملكة العربية السعودية أو الكويت او الإمارات )
الخليجي بتنزل بسي دي كينوود المصري لأ
وطبعا الخليجي أحسن لأن كماليتها أكثر ومع ذلك سعرها أرخص ومفيش فرق فيالترخيص ولا حاجه
بالنسبة للضمان المعرض اللي هتشتري منه هيعرض عليك ضمان الرواس اللي أصلا صاحب المصرية وبراحتك عايزه أو لأ ( سنة واحده = 850 ، سنتين = 1450 ، ثلاث سنوات 1350 ) يعني كل ما تعلي الضمان كل ما يرخص
ويباشا لو عايز تشوف الخليجي أنا معايا واحده 1300 مانيوال 2007 رمادي وأنا تحت أمرك في أي وقت
-
نسيت أقول لحضرتك إن الخليجي بتنزل بالطاره الشكل الجديد وفيها إيرباج أما المصري بتنزل بالطاره القديمة بتاعة 2006 ومن غير إيرباج .
-
الف شكر ياباشا واعذرني ان فهمي تقيل شويه بس نفسي اعرف كل حاجه عنها قبل اشتريها
-
انا معايا لانسر خليجى جايه من الامارات و هى افضل من الانسر المصرى فى عدد الاحصنه و اتقل فى الوزن من المصري و غير كده كمان ان لون العربيه فى الخليجى معمول عشان يقام درجات الحراره العاليه اوى و الصراحه مفيش احلى من الخليجى و اتوكل على الله
-
انا كنت فى الامارات
وعلى فكرة الخليجى احسن فى شوية حاجات لانهم بيعلواالمقاييس اللى تدخل بيها العربيات البلاد بتاعتهم
عشان ظروفهم الجوية
على فكرة جو الامارات مثلا يدمر اى عربية لو مكانتش متينة (درجة حرارة مستحيلة ورطوبة قدنا ييجى 3 مرات وشمس تدوب الدماغ ولولا انو فيه اختراع اسمه تكييف مكانش واحد مصرى راح هناك ولو حيدوه دهب)
المهم ربنا يكرمك ويلهمك الصواب
-
الف شكر لتوضيح الامور وان شاء الله هجيب خليجي
-
كمان صدر الخليجي ( وراء الردياتير ) صاج قوي أما المصري فضعيف و أنا شفت بنفسي
و أحصة الخليجي أفضل مثلا السبورت المصري 112 و الخليجي 117
Content Relevant URLs by
vBSEO 3.6.0 PL2