مين افضل مدينتي ام الرحاب ام القاهره الجديده؟؟ و مدينتي بعد الرحاب بكام كيلو؟؟
عرض للطباعة
مين افضل مدينتي ام الرحاب ام القاهره الجديده؟؟ و مدينتي بعد الرحاب بكام كيلو؟؟
بص يا باشا بفضل الله روحت الثلاث مناطق بحكم عملي في التشطيبات وخصوصا الاسقف المعلقة
مدينتي .. الرحاب .. القاهرة الجديده ذكرت مدينتي الاول لانها رقم واحد من حيث الاسعار والخصوصية والمستوى دي حقيقة.. بض الرحاب والقاهرة الجديدة بالتناسب لان في اماكن في القاهرة الجديدة تتفوق على الرحاب والرحاب تتفوق على مناطق في القاهرة الجديدة ... انت قدرتك الشرائية هي اللي تحدد وممكن ربنا يكرمني واقدر افيدك...
مدينتي بعد الرحاب ب 15 كيلو
الرحاب احسنهم
كقرب القاهره الجديده والرحاب
مدينتى انضفهم
طيب لو ضفنا معاهم الشيخ زايد نقول مين
متابع
كل مكان وحسب قوتك الشراءيه فيه مفيش مكان انضفهم مطلقا
صديقي المواطن
الشيخ زايد طبعا لو داخل كمباوند وقريب من مول العرب فقولا واحدا أفضلهم كمنطقة ﻷنه قرب الرحاب ومدينتي والقاهرة الجديدة من الدائري هو اللي مكره الناس فيها ﻷن الدائري يا إما زحمة يا إما نقل يا إما كاميرات يا إما كماين لكن الشيخ زايد وأوائل أكتوبر عظمة جنبك دريم لاند ونوادي وادي دجلة وغيرها ومول العرب وحيفتح مول الفطيم ومدبنة اﻹنتاج ومطاعم كتير وفيه دنيا وناس وتحسهم لوحدهم
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
بس انا معلوماتي ان مدينتي اكبر من الرحاب و حتبقي انضف منها مع الوقت بس مشكلتها انها بعيده شويه
طيب النرجس في القاهره الجديده افضل ولا مدينتي؟؟
أنا ساكن جديد في الرحاب، من حوالي سنة ونص تقريباً.. وقبل ما أسكن هنا كنت دوّرت علي كل المدن الجديدة والمناطق إللي إتقالت هنا وكان إختيارنا للرحاب بعد ما لفينا ودوّرنا كويس والحمدلله راضيين ومبسوطين بالإختيار ده جداً، وأقدر أقلك وأنا مرتاح إن الرحاب أرقي وأفضل مدينة سكنية بها حياة متكاملة في القاهرة كلها.
ولو ليك أي سؤال عن الرحاب خصوصاً أو القاهرة الجديدة عموماً أنا متابع.
الموضوع كله يرجع لتفكيرك انت .. يعنى مثلا بتسافر زى حالاتى عاوز مكان امان تسيب اهلك فيه ويلاقوا احتياجاتهم وجيران يبقى الرحاب وانت مغمض بس تعمل فى حسابك انها كمستوى كلى من ناحية تشطيب المداخل والواجهات والكلام دة مش أد كدة بالإضافة للمتسكعين من برة الرحاب اللى بييجوا يطلعوا روحنا ويزحمولنا الدنيا
لو بتدور بردو على مكان مقفول واهدى نسبيا وأرقى فى الواجهات والمداخل ولاند سكيب أوسع نسبيا لكن فى هدر رهيب فالمساحة يبقى مدينتى واهى لسة بتعمر وسعرها هيعلى مع الوقت
لو موضوع العمار والكلام دة مش فارق معاك او جايبها لقدام مش لدلوقتى يبقى كومباوند فالتجمع .. عندك ريتاج و فاميلى سيتى اعرفهم كويسين
لو بقا عاوز حاجة سعرها أقل "نسبيا" يبقى البنفسج والنرجس والكلام دة بس الخدمات والكلام دة منك للحكومة
الشيخ زايد بالنسبة لى انا ك "رامى " لو بألف جنيه المتر مش هاخد فيها عشان مشوارها الرهيب وانا كل عيلتى ناجية مصر الجديدة والقبة والمناطق دى دة غير ما اشيع عن انتشار سرقات العربيات وعصابات التكاتك فهى بالنسبة لى مش اماكن اسيب فيها عائلتى فترة واسافر وممكن الأعضاء من الشيخ زايد يفيدوك اكتر منى عنها لأنى معرفهاش
لو احتجت استشارة فالتجمع او الرحاب انا متابع وتحت امرك
هو مبدأياً دي شرق ودي غرب، لازم تشوف الأول إيه أقرب لشغلك ولعائلتك لإن ده من أهم المعايير ليك في الإختيار.
بيفرلي هيلز أنا ماروحتهاش لكن روحت كمبوندنات زيها كتير في أكتوبر زي مثلاً دريم لاند والأشجار والروضة والربوة وجاردينيا بارك، وبناءً عليه هكلمك عن سبب تفضيلنا للرحاب وأهم مميزاتها عن أي مكان روحناه في مصر.
الرحاب شقق وفيلات بتجمع بين هدوء ونضافة وأمن الـ24 ساعة بتاع الكمبوند وبين الحياة الحقيقية والألفة مع الناس ورُقي الخدمات المتكاملة إللي قريبة منك بتاعة المدينة العادية في وسط القاهرة ودي المعادلة الأهم والأجمل في الرحاب.
يعني مثلاً هتلاقي فود كورت كبير فيه أشهر المطاعم العالمية وأرقي الكافيهات، وسوق تجاري كبير فيه كل حاجة ممكن تيجي علي بالك، و 2 مول وسينمات، ومعظم الماركات العالمية لأشهر الشركات والمنتجات ليها فروع هنا، و 2 مركز طبي، ومدارس محلية ودولية زي المدرسة البريطانية والمدرسة الألمانية والفرنسية، و نادي رياضي وإجتماعي كبير وحقيقي، وأكاديمية ليفربول العالمية لكرة القدم، وأكاديمية محمود الخطيب لكرة القدم، وقاعات إجتماعية داخل وخارج النادي زي "ليلاك 1 و 2"، ومنطقة بنوك، ونقطة مطافي ونقطة شرطة الرحاب وبنزينة، ولغاية دلوقتي حوالي 8 جوامع كـُبار، ومعهد ديني للدراسات الإسلامية والعربية، وكنيسة. يعني من الآخر مش هتخرج برة الرحاب لأي سبب غير علشان تروح شغلك بس.. وفيه ناس شغالين في البنوك وأطباء شغالين في المركز الطبي أو مدرسين مثلاً في المدارس وشغلهم بيكون جنبهم فمش بيحتاجوا يخرجوا برة الرحاب كمان.
الرحاب في قلب القاهرة الجديدة والتجمع الخامس تحديداً، قريبة جداً من جامعات كتير وأهمها طبعاً الـAUC والـGUC وجامعة مصر الدولية والمستقبل، وبينها وبين مصر الجديدة ومدينة نصر 10 دقايق وفيه باصات خارجية داخل محطة المدينة بتتحرك كل 20 دقيقة بتوصلك للمكانين دول بمنتهي السهولة، ودي من أهم أهم أهم مميزات الرحاب لإن في الكمبوندنات الفرد الواحد إللي في الأسرة لو مش معاه عربية مش هيعرف يتحرك داخل أو خارج الكمبوند ده، أما في الرحاب ففي باصات خارجية وداخلية تقدر تخليه يروح المكان إللي هو عاوزه من غير ما يكون معاه عربية.
فيه ميزة مهمة كمان في رأيي بتميّز القاهرة الجديدة عن أكتوبر، إنها بعيدة عن الجيزة والهرم وفيصل وترسا وكرداسة وطريق الفيوم الصحراوي إللي بقت أماكن إستراتيجية للإرهابيين والبلطجية وكلها قريبة لأكتوبر.
بالنسبة للخدمات كمان كل ده ولسه فيه مرحلة كاملة لسه هيبدأ العمل فيها، هيكون فيها سوق شرقي جديد و 2 مول وجامع وسمعت فود كورت جديد ومحطة باصات جديدة عشان الدنيا تبقي مرتاحة ومايكونش فيه تكدس في مكان واحد خصوصاً لإن معدل الزيادة في عدد السكان مش قليل هنا ده غير الناس اللي بتيجي من برة للفود كورت تحديداً، ومن المُنتظر إن يتم الإنتهاء تماماً من العمل في المرحلة دي في خلال سنتين أو تلاتة بالكتير إن شاء الله.
علي فكرة كمان بالقرب من المدينة تم إفتتاح 2 كارفور مؤخراً من شهر ونص، غير كارفور العبور وهايبر وان العاشر، واحد في كايرو فيستيفال سيتي والتاني في الشروق، والإتنين بينهم وبين الرحاب حوالي 15 دقيقة بالكتير. ده غير حديقة الأسرة إللي هيتم إفتتاحها في إبريل الجاي إن شاء الله ودي 5 دقايق مشي تقريباً من أحد بوابات الرحاب.
وده فيديو من الواقع للرحاب يقدر يعرّفك بيها أكتر:-
الرحاب مدينة عالمية علي أرض مصرية
وده السايت الرسمي للرحاب:-
Al-Rehab City
وأنا متأكد إنك لما تزورها بنفسك مش هتسيبها :) بالتوفيق إن شاء الله :)
أيوة فيه ممكن تدفع علي الأقل 10% للشركة والباقي أقساط لغاية 8 سنين علي حد علمي وجايز فيه أكتر، بس الإستلام هيكون بعد سنتين أو مع إنتهاء المرحلة.. طبعاً ممكن تتأكد من المعلومات دي أكتر من جهاز المدينة.
أما لو إنت مستعجل ممكن تشتري من حد شاري من جهاز المدينة وتدفع له الأقساط إللي دفعها + أوفر بالإتفاق معاه، وبعد كده تكمل الباقي مع الشركة.
طب يا جماعه مفيش أخبار عن mountain view أو mividea كموقع حجز تسليم فيه مشاكل وشكرا
انا ساكن فالرحاب والله انت خليتنى احبها اكتر ههههههههه التقسيط مع الجهاز سعر المتر كاش 7000 وكسور واستلام كمان سنتين لو تقسيط هيعدى المبلغ دة .. بس فعلا الرحاب رغم مساوئ النازحين اليها عشان يتفسحوا تظل دايما "فيها حاجة حلوة" اما تصحى الصبح تقعد فالبلكونة تتفرج عالجناين والهدوء .. بس لو الجهاز والسكان يتقوا الله فيها شوية هتبقى احلى من كدة كمان وكمان
[QUOTE=HISHAM80;3875384311]طب يا جماعه مفيش أخبار عن mountain view أو mividea كموقع حجز تسليم فيه مشاكل وشكرا[/QUOTE
الاتنين تحديدا افضل من الرحاب
[QUOTE=egyptawy2010;3875384568][QUOTE=Falcon.Crest;3875384418]
عند حضرتك فكرة عن الاسعار[/QUOTE
ميفيدا المتر 10000
ماونتن فيو 8000
عارف انت اكيد قصدك على صفحة اخبار سكان الرحاب .. مبدئيا دى بردو ناس أوفر وبصراحة السكان سبب فى حاجات كتير يعنى النهاردة ناشرين صورة عربية راكنة عالرصيف وعمالين يولولوا طب ما دى عربية ساكن هو اللى عمل كدة وواحدة عمالة تشتم فالأمن عشان قطتها اتسرقت وحوارات هبلة كتير ... الرحاب عشان عدد سكانها كبير جدا فبيبقى لانحدار الاخلاق العام فالبلد ليه انعكاس هناك بس زى ما قلت قبل كدة هى حسب انت متطلباتك ايه كل العشوائية دى 90% منها فالسوق التجارى انت كساكن مش بتحس بيها نهائى وانا شخصيا مش بروح السوق دة الا نادرا .. لكن مستمتع بالعمار ومطمن على ولادى هناك وشقتى يوم ما هبيعها تتباع فى فيمتوثانية مش هدلل عليها ول أجرتها هاخد فيها عالأقل 4000 جنيه وانا حاطط رجل على رجل بس المشكلة فعلا فالرحاب انها من الأول مكنتش معمولة للسكن الراقى يعنى واجهات عادية ومداخل عادية
+111111
عندك حق في كل كلمة قولتها
مدينة زي الرحاب او مدينتي ايه الميزة فيها اني اروح الف و اتسكع و امشي اخر النهار !!!!!!!!!!!!!!
عشان مطاعم و فود كورت !!!!!!!! ايه اللي في الرحاب او مدينتي او غيرهم مش موجود برة عشان اجي من اخر الدنيا اتلطع فيهم
في التجمع الخامس اكتر من مكان فود كورت و كافيهات
و في في مصر الجديدة تيفولي
و في سيتي ستارز
و في مول العرب
و في صن سيتي الكلام ده ينطبق علي الرحاب و مدينتي و اي مكان زيهم
انا ايه ذنبي اني ساكن في مدينة زي دول و اجي مروح الاقي طابور طوييييييييييييييل علي البوابة و 3/4 داخلين من بوابة الزائرين وقافلين علي ناحية بوابة الملاك !!!!!!!!!!!
وتلاقي تاكس جوة !!!!
العيب مش عليهم العيب علي اللي سمح لهم بالدخول
ولولا بعد المسافة والله كانت اتملت تكاتك
عالم تحرق الدم والله
تصدق بأيه ... والله العظيم وانا سايق ببقى عارف مين اللى من المدينة ومين اللى جاى يتفسح من طريقة السواقة اما بدخل على صينية مثلا تلاقى اللى من برة عمال يزنق عشان يعدى ولو ساكن تلاقيه بيتحايل عليك تعدى اﻷول ... والله يا ريت يقفلوا البوابات ويريحونا
يعنى لو واحد عايز يشترى حاجه بس الاستلام على مهله مش مستعجل
الافضل ماونتن فيو ولا ميفيدا من حيث كل حاجه الخدمات والهدوء والمستوى الراقى
وان شاء الله انا بدور على شراء فيلا فى اى من الاماكن ديه وانا دائم السفر وبنزل مصر شهر او شهرين فى السنه
فعايز حاجه تكون استجمام وهدوء لما انزل وفى نفس الوقت قريبه من وسط البلد لان اهلى كلهم فى العباسيه