سايس الجراج خبطلى العربية تانى

**dizel** · 02-01-2014 03:44 PM

يا جدعان قولولى اعمل ايه؟
داه تالت جراج و اخر جراج فى المنطقه و العربية زيرو 2014
عربيتى القديمه اول جراج خبطهالى و سيبته عشان قالى الخبطه دى مش منى
تانى جراج خبطلى العربية برضه و استفزنى و قالى مش منى دى يا بيه
طب عربيتى الزيرو دلوقتى بركنها فى جراج بعيد و بمشى 15 دقيقه كل يوم رايح جى جوه عماره فيها حارة واحده لكل العربيات و لاقيتها متخربشه قالى مش منى والاهى يا بيه. النهارده الشنطة مطبقة و بيحلف ميت يمين انها مش منوه قولولى اعمل معاه ايه؟
طب اعمل ايه فى العربية؟؟ ابيعها و اخلص؟!!
مهو مفيش مكان تحت البيت و عربيتى القديمه كسروا الازاز و نفضوها و هى مركونه تحت البيت.
حلها ايه....
افيدونى افادكم الله

**J A G U A R** · 02-01-2014 04:11 PM

يعنى هو بيروح الجراج مخصوص عشان يخربشلك العربيه ويرجع .. ؟
طب بيروح جراج مش بتاعه ازاى والناس اللى فيه بتسمحله يخربش فى العربيه ؟
طب الراجل ده انت مزعله فى حاجه ؟
طب مفيش جراج خاص بيك تحت بيتك لوحدك ؟

**Al-Sherbeeny** · 02-01-2014 04:29 PM

السلام عليكم ورحمة الله وبركاته..
1- انت بتدفع كام في الجراج دا...
2-لو بتدفع كتير ممكن تاجر محل صغير قريب منك ويبقى بتاعك لوحدك .
3-لو ما عرفتش تعمل اعلاه ، يبقى اتبع تعليمات العضو الفاضل amro011111
وشكرا

**Eng_hatemfathy** · 02-01-2014 04:50 PM

للاسف كود الجراجات فى قانون البناء كود فاشل والمساحات المتروكة لا تكفى اصلا عدد السيارات المصمم عليها الجراج وكذلك المساحة المتروكة للمناورة ونادرا ما تجد جراج له مدخلين واحد دخول واخ خروج واساسا اساسا السايس يحمل الجراج اكثر من تحمله بحيث يلغى مساحات المناورة وهذا ما يؤدى الى كسر الفوانيش وخدوش الاجناب بل وتطبيق المقدمة والمؤخرة احيانا اخرا بسبب رفع حجر من اسفل سيارة على المور واندفاعها لتصدم من امامها
فالامر لا يقف على ترك المفاتيح من عدمه انما فكرة الجراج فى حد ذاته وهذه مأساه فى مصر المحروسة كلها الا الكمبوند احيانا مدن الجيش والتى بها مواقف مفتوحة نادرا ما يحدث تصادم بها وبيكون بسبب غشومية او حد داخل يتعلم جوا زى ما حصل فى اللادا بتاعتى واحدة خبطتها كرت الاكصدام الخلفى وفتلت الشنطة وكسرت الفوانيس الخلفية وخبطت العربية فى عربية قصادها طبقت البابين وشرخت الفانوس الامامى وكسرت الفانوسين
اصل الاخت كانت داخله تتعلم فى الباركينج-هههههههه

**saddam** · 02-01-2014 07:21 PM

صديقي المواطن
هناك حلول وطنية أخرى بس سؤال هل عندك مكان ثابت تحت العمارة فلو عندك حتروحلي لمحل فيبر حيفصل ليك مجسم عربية بحوالي 3 آلاف جنيه تقريبا وبه مغصلة ووزنه كله 10 كيلو وتركنه تحت البيت كأنه عرببة راكنة بالظبط وتغلفة بقماش أو جلد عشان يبان للناس وعامة الشعب كأنها عربية متغطية وبس حضرتك تركن ترفعه وتحط عربيتك تخرج ترفعه وتحط عربيتك وكفى الله المؤمنين القتال فكرة عبقرية وجنونية ومبتكرة بس خلاصة الخلاصة ولا أحط جنازير ولا سلاسل ولا أحط طوب وزلط
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**kokowasfy** · 02-01-2014 08:09 PM

المشاركة الأصلية كتبت بواسطة saddam

صديقي المواطن
هناك حلول وطنية أخرى بس سؤال هل عندك مكان ثابت تحت العمارة فلو عندك حتروحلي لمحل فيبر حيفصل ليك مجسم عربية بحوالي 3 آلاف جنيه تقريبا وبه مغصلة ووزنه كله 10 كيلو وتركنه تحت البيت كأنه عرببة راكنة بالظبط وتغلفة بقماش أو جلد عشان يبان للناس وعامة الشعب كأنها عربية متغطية وبس حضرتك تركن ترفعه وتحط عربيتك تخرج ترفعه وتحط عربيتك وكفى الله المؤمنين القتال فكرة عبقرية وجنونية ومبتكرة بس خلاصة الخلاصة ولا أحط جنازير ولا سلاسل ولا أحط طوب وزلط
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

ههههههههههههههههههههههههه ههههههههههههههههههههههههه ههههه بعد ما تعمل كدا دا اول ما تحط
المجسم دا فى الشارع تانى يوم هيتسرق

**aliyehia** · 03-01-2014 07:23 PM

اعمل فيها بلطجى و اديها عمودين حديد و سلسله و احجز لنفسك احلى مكان فى الشارع

**Elawany13** · 03-01-2014 08:07 PM

لا اللى بيركن فى جراج مرتاح ولا اللى بيركن فى الشارع مرتاح
ولا اللى عندو عربية مرتاح
ولا اللى معندهوش عربية مرتاح
حاجه تقرف بجد
العربية اتبهدلت خرابيش وقرف
والكاوتش انضرب مرتين بالمطواة خلال اقل من سنة