الموضوع: عاوز اعلن على موقع مبوبة مصراوى ((( ازاااااى )))

نصيحة سيبك من مبوبة مصراوي لأنها فاشلة اعملك كام اعلان حلوين على دوبيزل وبيزات ومنتدى ديفيدي فور عرب وما شابه أحسن منها بكتير
ولو عايز إعلان مدفوع ينتشر في كل مكان والحاجة اللي بتعلن عنها مجزية يعني تصرف عليها تجيب حق الإعلان وزيادة فأنصحك بجوجل أدوردز اللي هي إعلانات جوجل اللي بتشوفها في كل المواقع الكبيرة زي المواقع الإخبارية كلها تقريبا وغيرها
بخصوص البطاقة اللي معاك جرب تدخلها في المكان اللي عايز تدفع فيه لو مقبلهاش يبقى متنفعش بكل بساطة لكن أنا معايا ماستر كارد البنك الأهلي برده وبيشتغل مع كل المواقع وفي جميع الدول

المشاركة الأصلية كتبت بواسطة tarek12

شكرا لك
انا هجرب حظى فيها و انتظر النتيجة

لى سؤالين لك

1- هل سبق لك ان عملت اعلان مدفع الثمن فى مصراوى ؟؟؟؟

2- هل البطاقه ماستر كارت البنك الاهلى = هى البطاقه مسبقا الدفع اللى بتشحنها باى مبلغ داخل الفرع ؟؟ ام دى بطاقه ثانية

منتظر الاجابه لتعم الفائده

آسف على التأخر في الرد
1- عملت إعلانات مدفوعة كتير في مصراوي بالآلاف بس الكلام ده كان من فترة قبل ما يغيروا شكل المبوبة ونظامها وكانت مش مجزية برده زي جوجل أدوردز زائد إن دوبيزل والمواقع الإعلانية التانية ضربته في مقتل ومبقاش حد بيدخل عليه كتير زي زمان قبل ما المنافسين يدمروه
2- بطاقة الـMaster Card غير الـDebit Card وأنا طلعت الماستر لأن وقتها مكنش فيه Debit لأني مطلعها من أكتر من 3 سنين لكن طبعا الDebit حاليا أفضل لأنك بتشحن المبلغ اللي عايز تصرفه وبعدين تصرفه براحتك لكن الماستر مفروض إنهم بيسلفوك مبلغ ولازم تسدده خلال 55 يوم وبعد كده بياخدوا عليك فوائد ولو اتأخرت أكتر بيقفلوها وبيحطوك في البلاك ليست عند البنك المركزي وحوارات
أي استفسار آخر أنا في الخدمة

المشاركة الأصلية كتبت بواسطة tarek12

شكرا لحضرتك
انا اللى سمعته ان البطاقه المدفوعه مقدما ,, تسبب مشاكل مع بعض العملاء لانها تعمل اوقات و اوقات تانيه لا تعمل

لى سؤالين لك و عذرا لازعاج
1- هل مبوبة مصراوى عندها مكاتب من الممكن ان الواحد يدفع فيها المبلغ و يريح دماغه ؟؟
2- بكم تبلغ تكلفه اليوم الواحد لو انا عارض اعلان شقه لايجار مثبت بالاعلى باللون الاصفر ؟؟
زى الرابط دا ( و لاحظ على الاعلان كلمه سعر خاص )

ياريت الافاده اخى
جزاك الله خيرا

آمين وإياك
أولا الدفع ليه عدة طرق أشهرها وقت ما كنت بتعامل معاهم الشحن عن طريق الموبايل كنت ببعت رسالة فاضية على رقم معين تكلفتها 5 جنيه بتشحنلي رصيد 4.5 جنيه للمبوبة فانت بتشتري كروت شحن وبتبعت رسايل لحد ما توصل للمبلغ المطلوب وفي طرق تانية برده زي حاجة اسمها كارت اسمه "ون كارد" تقريبا ده بتشتريه من عدة أماكن زي راديو شاك وخدماتي وغيرهم وبتشحنه برده عادي
انت بس سجل وهتلاقي طرق الدفع موضحة بالموقع
ثانيا تمن الإعلانات المدفوعة برده هتلاقيه أوبشن تحت الإعلان اللي بتضيفه بيديك عدة اختيارات بتختار من بينهم حسب التكلفة والمميزات بتاعة كل واحد
جرب كده تسجل وتضيف إعلان وتشوف الخيارات بتاعة الإعلانات المميزة وشوف طرق الدفع برده ولو في حاجة مش فاهمها قولي وأنا هحاول أدخل أسجل وأساعدك فيها واعذرني لأن بقالي يمكن سنتين مأعلنتش عندهم لأني مستريح في جوجل أدوردز والفيس بوك والمواقع التانية

المشاركة الأصلية كتبت بواسطة tarek12

لى سؤال لك ال 4.5 جنية , هل هذه القيمة لليوم الواحد ام لاسبوع ام للشهر ؟؟؟

ياريت الافاده
شكرا مسبقا

أي مبلغ انت بتشحنه مش بيتحسب بالأيام
انت بتشحن أي ملغ في حسابك وبيتخصم منه بناء على استخدامك
بمعنى انك لو اخترت اعلان مدفوع أعتقد انهم بيقدموا طريقتين لحساب الاستخدام
أول طريقة عدد النقرات على الإعلان : يعني كل واحد يضغط على إعلانك بيتخصم منك جزء من المبلغ اللي بترصده ، مثلا انت اخترت اعلان ب50 جنيه فلو سعر الضغطة 10 قروض مثلا يبقى ال50 جنيه هيخلصوا بعد 500 ضغطة على الإعلان
الطريقة التانية عدد مرات ظهور الإعلان : ده بيحسبلك كام مرة الإعلان بتاعك ظهر فيها لزوار الموقع حتى ولو لم يضغط على الإعلان أحد هو بيعتمد على عدد مرات الظهور فقط ، فلو انت اخترت باقة ب50 جنيه برده مثلا والباقة دي بتدي لإعلانك 100 ألف مرة ظهور مثلا فبعد ما ال100 ألف مرة ظهور يخلصوا إعلانك بيتوقف عن الظهور المدفوع وبيفضل موجود عادي كإعلان مجاني زي باقي الإعلانات
كل دي أمور تقريبية هتعرفها بالتفصيل وبدقة أكتر لو سجلت وشفت النظام اللي عاملينه إيه لأني كما أوضحت إن آخر مرة اتعاملت معاهم كانت من حوالي سنتين واحتمال كبير جدا يكونوا غيروا الأسعار أو النظام بس غالبا هو ده السيستم العام ليهم