الموضوع: اللوجان لو كانت داتشيا مش رينو كنت حتشتريها

العربيه واحده مع اختلاف المسميات حول العالم فهى تحمل ايضا اسم نيسان و لادا و سايبا و ماهيندرا...المشكله ان اسم داشيا عامل حاجز نفسى للناس من ايام التسعينات لما نزلها توكيل ضعيف و تخلى عنها بعد فتره و جيزه لكن اعتقد ان الوضع الان مختلف بعد شراء شركه رينو لاغلب اسهم داتشيا الرومانيه و امدادها بكافه التكنولوجيات الحديثه.

احب اقول رايي وبكل صراحة انا لا كنت هشتريها داتسيا ولاحتي لو كانت مرسيدس مش رينو لانها مع احترامي لاصحاب العربية دي خساره فيها تمنها (مش عايز اقول زباله عشان ماازعلش حد مني ) دي بلاستيك ف بلاستيك اول مره اشوف عربية تقدر ترفع كبوتها بايد واحده ليه ورقه كرتون !! بلاش دي ايه العبره انك تعمل دراع واحد فيه الكلاكس والنور والاشارات ف دراع واحد ماتخليه ييجي يسوق بالمره يعني اللي معاه يعني انا واحد لو معاه ال85 الف اشتري زلموكة احسن وانضف واشيك مليون مره دي وجهه نظري الشخصية ياريت ماحدش يزعل مني من اصحاب العربية دي

المشاركة الأصلية كتبت بواسطة adel_edrees

لأ طبعا قول و أتكلم و لايمكن حد يقادر يصادر رأيك أو أنه يقلل منه و ماحدش يقدر يزعل من الكلام ده بس تعالى نتكلم بصراحة ما هو كل العربيات اللى في الفئة السعرية دى حتلاقى فيها عيوب و لكن تختلف العيوب من سيارة ألى أخرى و لكن هي في النهاية سيارات أقتصادية أنا بأتكلم على الزيرو لكن أنت قلت الزلموكة مو 85 - 90 يعنى عربية بقالها أكتر من عشرين سنة شغالة في الطريق شوف بقى كم الحاجات اللى أنت عايز تغيرها في عربية بقالها أكتر من عشرين سنة شغالة و كل يوم يطلعلك حاجة و شوف قطعة الغيار دى بكام أنا لى واحد قريبى كان عنده عربية مرسيس 190 زلموكة صغيرة عامللها عمرة من أكتر من 17سنة أتكلفت 11ألف جنيه و غير كده عربية 2000 أو 2300 سي سي
يعنى أستهلاك بنزين بالهبل ده دلوقتى مرسيدس منزل عربية 1600 سي سي سي 180
أحنا لما بنيجى نقارن عربية لوجان تتقارن بنفس الفئة السعرية بتاعة العربية و غير كده لما بنيجى نقارن بنقارن عرربات زيرو مع بعضها و لو أنت قارنت الرينو بالعربيات التانية اللى في نفس الفئة حالاقى أنها مش زبالة أوى يعنى زى ما أنت بتقول
و بعدين قوة الصاج مش بتقله فيه حاجات تانية ببتضاف على الحديد زى الماغنسيوم بيزود
صلابة الحديد ممكن يكون الحديد تقيل و طرى
وبعدين احنا أتأكدنا من النقط دى لما سألنا الأستاذ كريم منير صحب ورشة نايل موتورز و قال أن
صاج العربية غلس في تعديله و ناشف
لأن النقطة دى خوفتنا من العربية بعد ما أشتكى عدد من الزملاء من هذه النقطة و لو في عند حضرتك أي سؤال الناس اللى في المنتدى ناس زى الفل مابيزعلوش من النقد و مابيصادروش رأى حد نتحاور بالعقل بدون استخفاف بكلام أي حد من الناس طالما الكلام موضوعى و السلام ختام نسيت أسألك كنت حتشترى العربية دى لو كانت داتشيا هههههههههههههههههبأهزر معاك و السلام عليكم والله أعلم

‏ انا معاك ف كذا نقطه اولهم ان الزيرو ف الرينج ده معظمه مع احترامي زباله خاصة اللانوس لانوس ايه ياعم الحج اللي بحاجة وسبعين ولا اللادا 2107 تكنولوجيا السبعينات بحاجة وستين الف ولا الماروتي اللي مع احترامي عار علي سوق السيارات من اصله يخلي عربية زي دي ب 47 الف ليه الله اعلم مع العلم ان هي هي اللي كانت زيرو ب 36 من سنة وشوية تقريبا فبطعا تبقي كويسة شوية بس خاماتها وحشة اوي مش حاجة معمره خالص تحس انه بيصنع علبه عصير مش عربية اقل واجب هتقعد مع الشعب ده مش اقل من عشرين سنة قدام يعني مثال من قلب كلام حضرتك المرسيدس 190 عمره المكنة ف المرسيدس علي مليون كيلو متر واصلا ال 190 ماانتشرتش فعشان كده قطع غيارها غالية انما لو ‏e200‏ فدي منتشره وقطع غيارها تقريبا ف رينج الكوري الجديد او اقل ف حاجات كتير وطبعا مش محتاج اوصف لحضرتك مدي ابداع ونضافه شغل العامل الالماني وطبعا مافيش وجه مقارنة اصلا بين الاتنين كمان موضوع ال11 الف ده كان ممكن يسقط مكنة العيون الانجكشن ب15 الف بكنترولها ورشاشاتها وطبعا اريح ف لمشاكلها لقلتها واوفر ف ستهلاك البنزين لانه اقل ف الانجكشن عن الكربراتير نرجع لموضوعنا تاني حوار دراع النور ده شفته كتير ف الفرنساوي عموما بس بيبقي بخامات اعلي من كده فبيستحمل انما كتير من اللي معاهم العربية اشتكوا من انه بيعلق مع الاستخدام يعني ف الترعيش والكلاكس بس فده وجه اعتراضي عايز تقلد حاجة اعملها ف نفس مستوي خامتها وطبعا مش محتاج اتكلم عن الفرنساوي كفاية ان البيجو سواء 504 او 505 استيشن او العادية لسة شغالين خدمة شاقه علي طرق غير صالحه للاستخدام من اصله بعدين اللوجان كلنا عارفين ان الرفارف دي ارخم مشكله فيها يادوب من اقل حاجة بتتطبق وتحس من شكل الصاج بعد مايترد كذا مره بسبب اللي يزنق بابه ف رفرف عربيتك ويفتح بالجامد فيسيبلك توقيعه او ترييحه صغيره انه عجز اوي ده مش منظر عربية موديل سنة ولا سنتين فاتوا ف وبرده انت محصور ف فئة سعرية مافيهاش زيرو حلو ف ياترضي بيها ياتدور علي مستعمل قريب زي الاوبترا والالنترا وغيرها ياتجيب عربية صح الماني وعلي فكره مصروف الانجكشن منها مش عالي زي مامعظم الناس فاكره يعني مكنة العيون 96‎-‎‏ ‏2002‎تعمل 100 ل 105 كيلو ف الصفيحه بتهيالي كده زي الفل علي عربية بالحجم ده وف النهاية اسف علي طول المشاركه ولو شايف ف كلامي غلط صححهولي وانا متقبله بصدر رحب ملحوظه الاسعار تقريبيه لاني مش متابع من مده الاسعار

المشاركة الأصلية كتبت بواسطة wassim_nasser

أفتكر لو كانت داشيا كنت هاشتريها برضه .. لأنك في العربية بتدور علي حاجتين : الإعتمادية و الوكيل .. بالنسبة للإعتمادية فالعربية جميلة فعلا .. واسعة صالون و شنطة .. عالية عن الارض .. بتسلك في طرق و مدقات القري .. بتمشي في اماكن و طرق لا تجرؤ المرسيدس و البي إم تدخلها .. لدرجة انى ركبت بيها عبارات نيلية .. تاخد مشوار القاهرة سوهاج صد رد ماتقولش لأ .. تانى حاجة الوكيل .. الوكيل إلي حد ما كويس .. قطع غيار اتوفرت في فترة قليلة .. أي نعم غالية شوية بس بصوا للأسترا اللي مراياتها ب 3000 احنا برضه احسن من غيرنا .. موضع الخلاف بس ان اللي بيركبوا اللوجان كأول عربية لهم أو كان عندهم شاهين و فيات حاسين ان العربية جميلة جدا ( و ده حقيقي ) .. أما اللي كانوا راكبين مرسيدس قديم و حبوا يجيبوا زيرو جديد حاسينها زبالة ( معذورين برضه ) .. بس لا خلاف اطلاقا علي ان العربية جميلة فعلا وافضل بكتير من اللانوس و الفيرنا و الأفيو و معظم موديلات هيونداي اللي اصبحت ب 120 و 140 الف جنيه و هى بعد ال 100 ريشة ف هوا طايرة بغير جناحين .. طب اصبروا واتفرجوا علي الميراج هاتشباك نازلة بموتور 1200 سي سي 78 حصان ب 115 الف و قولوا الحمدلله

وزود على كده كمان ان الميراج دى 3 سلندر !!!!
ده استهبال و الله