اكتب يا قلمي وبوح ...... سطر آلام وجروح

عن وطن حزين مجروح ..... قل لي الحقيقة فين؟
...
آمال كتير بتروح ...... والفرح مش مسموح

والحلم فيه مذبوح ....... والدمع مالي العين

الحق فيه ضايع ...... والقتل فيه شايع

والشاري صار بايع ...... وبقينا مش فاهمين!

عن فوضى في الشارع ....... وعسكر بيصارع

خلّوا البلد والع ...... وروّعوا الآمنين

اكتب عن الهلفطة ....... والسرقة والمرمطة

ومؤامرة متخططة ....... ضد الوطن والدين

عن ناس كتير محبَطة ....... أوضاعها متلخبطة

أشكالها متحنطة ....... عايشين ومش عايشين!

اكتب عن السفسطة ...... عن نخبة مستعبطة

بالدنيا متشعبطة ...... قلبت شمالنا يمين!

فضايحها مترطرطة ....... في خيانة متورطة

ع الشعب متعفرتة ....... قابضة الثمن ملايين

اكتب وقول يا قلم ...... عن شعبنا اللى اتظلم

من السعادة اتحرم ...... تعبان بقاله سنين

مهموم وحاله عدم ...... مجروح بينزف ألم

عايش عشان يتصدم ....... يا مين يداوي مين؟

فيه كارثة ومصيبة ....... وطن بقى نهيبة

شبابنا زاد شيبة ...... والهم صار همين

دفع الثمن غالي ...... وَطَّ اللى كان عالي

ظلمه انقلاب حالي ....... ثاروا ومش طايلين!

اكتب عن الفَتّة ....... والكعكة والتورتة

لا حد ساب حِتة ...... للفقرا والمساكين

قلوب بقت شتى ...... أخلاق بقت فالتة

أزمات كتير ثابتة ...... والمسؤولين نايمين!

اكتب ولا تخبيش ..... كلام يدوم ويعيش

صادق وما بيؤذيش...... يواسي المظلومين

الوضع ده ما يرضيش ...... ضغوط ما بتنتهيش!

تعبنا إمتى نعيش ...... ونكون م المرتاحين

زهقنا واحترنا ...... يا رب صبّرنا

ع الظَلَمة قَدَّرنا ....... خلَّصنا م الفاسدين

أعداء بتقهرنا ..... قاصدة تأخرنا

قادر تحررنا ..... آمين يا رب آمين.
منقول