أنا معايا دايو لانوس 2001 .. وكنت جايبها مستعملة إستعمال قاسى شوية .. دلوقتى عندى مشكلتين..
الأولى:
من شهرين كده رحت غسلت العربية كلها والموتور .. من بعديها حاسس العربية فيها حاجة مش مظبوطة.. الدخنة كانت سودا والعربية ما بتسحبش كويس ولو ماشى بيها على الطريق بحس الموتور مش واخد راحته فى السحب.. وبتسحب بنزين كتير.. والأكسلاتير وطى قوى , لدرجة إنها كانت بتبطل منى وأنا ماشى فعليته مع نفسى على الآخر عشان تتظبط وما تبطلش منى وأنا ماشى.. المهم وديتها للميكانيكى إلى بروحله دايماً بس ما بيشتغلش فى الدايو.. بصلى على البوجيهات لقاها سليمة وبعدين راح فتح حاجة إسمه حساس الـ IDlR إسمه كده تقريباً المهم راح نضفه ورجعه تانى .. لاقيت العربية إتظبطت شوية ورجعنا مستوى الأكسلاتير تانى .. بس لسه لحد دلوقتى العربية مش مظبوطة وديتهاله تانى قالى كده عايز يتغير وقالى إنه ممكن يجيبلى واحد إستيراد على 280 جنيه ... المهم أنا حسيت إنى مش مرتاح من كلامة عشان مش أول مرة يقولى على حاجات أجيبها وتتطلع فى الآخر غلط ومش سبب المشكلة... فمحتاج من الأخوة يدلونى أعمل إيه وأروح فين, وياريت لو فيه حد أروحله قريب من القاهرة الجديدة أو مدينة نصر.. ولو حد يعرف سبب المشكلة إيه ياريت يدلنى..

التانية
علبة الفيوزات محتاجة تتغير ده رأى إتنين كهربائية وديتلهم العربية , فى حاجات كتيرة فى الكهربا مش متظبطة زى الأنوار .. ساعات اخد مطب خفيف ألاقى نور يطفى أخد المطب الى بعديه ألاقى النور يشتغل وساعات ما بيتغلش خالصة .. المهم سؤالى للأخوة هى العلبة دى بتتجاب إستيراد ولا أشتريها جديدة عادى .. ولو جبتها , ياريت حد يدلنى على واحد بيشتغل فى الموضوع ده.. وتتكلف كام..
متشكر جداً للإستماع .. وآسف للإطالة..