هل غساله الأطباق عمليه ومهمه واسعة افضل الأنواع والمقاييس المناسب لاسره 5 افراد
عرض للطباعة
هل غساله الأطباق عمليه ومهمه واسعة افضل الأنواع والمقاييس المناسب لاسره 5 افراد
طبعا مهمة جدا اليومين دول خاصة مع الستات اللي مشاغلهم كترت ربنا يعينهم وفي نفس الوقت مفيش صحة !
في السوق أنواع كتير ومنها إيطالي لكن مشكلتها قطع الغيار والصيانة
المضمون من ناحية الجودة وتوافر قطع الغيار والصيانة هي زانوسي الحجم الكبير زي اللي عندي
ZDF4010 | Zanussi | Products | Dishwashing
ودي سعرها مش عارف كام بالضبط لكن يفضل تتصل بالتوكيل وتجيبها منه مباشرة أرخص من برة وأنا نفسي عملت كده وجابوهالي لحد البيت وركبوهالي
الرقم الموحد 19999
صفحتهم على الفيس بوك
https://www.facebook.com/pages/Zanus...13326638709517
السلام عليكم
اسمحلى اشارك معاكو
الغسالات بتاعه الاطباق 4 انواع
1/ فوق الرخامة و دى مقاسها صغير 50 سم فى 50 سم او 60 سم فى 60 سم و بتبقى من 6 الى 8 اطقم و يشترط ان التقفيل منه يكون كويس و فى النوع ده انصح ال جى اللى الوش بيفتح على مرتين لان فيها مراوح تنظيف فوق و تحت او وايت وستنجهاوس و لا انصح بتاتا ب يونيفرسال فى اى منتج
2/ المقاس التانى 45 سم عرض فى ارتفاع 90 سم تحت الرخامة و دى انصح انها تركب انها يركب تحتها درج بارتفاع 40 سم علشان ست البيت متوطيش و تتعب لما تملاها و تعتبرها مطبقيه
وانصح فى هذا الحجم بالانواع :- المستورده ذات التقفيل الجيد مثل وايت وستنجاوس / اريستون / سانيو / زانوسى / ال جى / و غيرها كتير .و الاهم عند الاختيار انك تجيب النوع اللى فيه رشاش علوى علشان بينظف احسن .و دى منها 6 / 8/ فرد او طقم
3/ النوع الثالث عرض 60 سم و ارتفاع 90 سم ودى تحت الرخامة برضه و نفس الملاحظات اللى فاتت و الاحسن النوع اللى فيه رشاش و مروحه من فوق .ومنها 8 /10/12 طقم و منها زانوسى و الاريستون و الانديست وال جى و غيرها
4/ النوع البلت ان للمقاس الاول و الاخير و لايختلف كثير الا انه ممكن يركب على الوش ضلفه خشب بنفس نوع لون خشب المطبخ .
ملاحظات عامة
1// يستحسن عند توصيل الكهرباء اننا نركب فولت جارد علشان الحماية من تذبذب التيار و المحافظة على البورده الكهرباء.
2/ الاحسن توصيل الغساله على مصدر من من السخن بتاع السخان الغاز توفيرا للكهرباء.
3/ استخدام صابون الغسالات - بيو كلينا - الجردل 3 كيلو ب 39 جم تقريبا - وده اوفر من المستورد و تقريبا نفس النتيجه
4/ اختار الغساله اللى فيها برنامج غسل للخضار والفاكهة و دى هتوفر معاك و نتيجتها هايله .
5/ لو امكن تركب ارضى عند التوصيل هيكون احسن
تحياتى ...
وعليكم السلام ورحمة الله وبركاته
بخصوص الاريستون ووايت وستنجهاوس ووايت ويل كمان لا أنصح بهم بسبب عدم توافر قطع الغيار والصيانة علشان كده نصحت بزانوسي وهي كخامة وتقفيل ممتازة
بخصوص volt guard اللي حضرتك نوهت عنه
إيه أفضل الأنواع اللي تنصح بيها ويكون سعرها في المعقول ؟ لأنك لفت نظري للموضوع ده وبفكر أجيب لكل أجهزة المنزل كالتليفزيون والكمبيوتر والسخانات والغسالات والثلاجة والفريزر
لكن ازاي أقدر أعرف النوع المناسب لكل جهاز ؟
وشكرا على الإفادة
كعادتك يا باشمهندس دائم التفصيل و تقديم المعلومات المفيده
ياريت توضح إيه الفولت جارد بصورة أو لينك ياريت الأنواع و منين و رينج السعر - أنا فاهم هو بيعمل إيه بس مش عارف أجيبه منين و بيركب إذاى هل هو ذى stabilizer ولا ده حاجة أصغر و فعاله فعلا ؟
بالنسبة للغسالة و النوع أنا عارف إن زانوسى حلوة فعلا بس ده لما كانت مع العبد دلوقت مع أوليمبك مش عارف بسمع كلام إنها مش ذى الأول
أنا بفكر أجيب الوايت بوينت - العبد - فيه موديلات تركى و موديلات إيطالى - لو هاجيبها هايكون عشان سمعة العبد
ياترى حد جربها ؟
السلام عليكم جميعا
الغسالات المصرى و الصينى كلها من جوه واحد - الاسم اللى بره هو اللى بيتغير - حسب الوكيل
مره رحت اشترى مع واحد صاحبى بيجهز - لقينا المصنع واحد لاربع ماركات متقفلين فى الصين - الفرق فى الاستيكر بتاع النوع
علشان كده متقلقش اللى جوه من طلمبات و خلافه واحد و رخيص
المشكله بتبقى فى البورده و الزراير بتاعه التشغيل و الاضمن كما نوهت استخدام الفولت جارد و توصل على السخن بتاع البوتجاز
و ممكن ننزل مع بعض و نختار..
الفولت جارد عباره عن واقى من تذبذب التيار صعودا ونزولا و فى نفس الوقت بيساعد على تحسين استهلاك التيار
اوصى بنوع انجليزى - حاليا بيستورد من الصين - بس ممتاز وعليه ضمان اسمه سولاتيك سعره ب 150 جنيه تقريبا
و ده ممكن تجيبه لمشترك التلفزيون - الثلاجة - الغساله ......الخ
http://www.nilemotors.net/Nile/230715-a-2.html
و معلش ارجو الاطلاع على المشاركة السابقه ليا \
السلام عليكم
اوضح للزملاء بالمنتدى بعض المعلومات عن غسالات الاطباق المنزليه
الوظيفه :- طبعا معروفه
الكيفيه :- بالماء المندفع بقوه كبيره داخل فتحات محسوبه لخروج المياه.
القوه :- من مراوح توزيع المياه المضغوطه و كل ما تزيد المراوح النتيجه افضل و بالنسبه لمقاس 50 سم الال جى افضل لان بها 2 مروه ضخ غير الرشاشات الللى فى الاجناب.
الكفاءه:- ممتازه و لها اعتماديه كبيره للانواع العالميه.
العمر الاختراعى :- معروفه فى اوروبا و امريكا من الستينيات للقرن المنصرم.
فكره التشغيل واحده ( ضغط المياه ) عن طريق مراوح ضخ و لكن التكنولوجيا الجديده فى اقتصاديات التشغيل من مياه و صابون و كهرباء.
اقتصاديات التشغيل :-
استخدام المياه :- افضل بكثير جدا جدا من الغسيل اليدوى من ناحيه الاستهلاك الغسله كامله من شطف و تنظيف و جلى و تبخير ( تعقيم ) 10 الى 13 لتر فى المتوسط لللحموله كامله.
استهلاك الكهرباء :- اكيلو وات متوسط للغسله كامله .
السخان الداخلى يتراوح من 1000 الى 1400 وات حسب الحجم و النوع .
المقاسات و الاحجام المنزليه المتاحه حاليا
1/ 50*50*50 و توضع فوق رخامه المطبخ . او تحت الحوض .
2/ 45*85*50 سم و توضع تحت الرخامه او بلت ان داخل دولاب خشب بالمطبخ.
3/ 60*85*56 سم و توضع تحت الرخامه فقط نظرا للوزن .
التغذيه :- حنفيه غساله 3/4 بوصه بفلتر داخلى.
مدخل الكهرباء :- للانواع كلها مخرج بريزه قوى موش بريزه بيتشينو و مقلش قطر التوصيل و لا يزيد عن 2 ملم من سلك معتمد .
شده الصوت:- من 25 الى 30 ديسيبل و لو بلت ان للنوع الثانى موش هتسمع صوتها.
الصابون :-
بودر مصرى بيوكلينا الجردل 3 كيلو ب متوسط 28 جم الى 30 جم يكفى شهور باستخدام مرتين يوميا .و فيه انواع زى كولجيت او تركى ........الخ اغلى لكن عن تجربه البيو كلينا اقتصادى و عملى وايضا يوجد اقراص جاهزه - غاليه حبيتين - لكن انصح بالببو كلينا اوفر و عن تجربه.
الزيت :-
بنقول كده خطا لان الصح ان اسمه ملمع الكريستال او الفضيات وده وظيفته انه يلمع او يجلى الزجاجيات من كبايات و اطباق و فضيات بعد الغسيل علشان متبقعش و تقدر تزود الكميه اللى بتنزل حسب رغبتك عن طريق ضبط الكميه من 1 الى 6 و الافضل درجه 2و لتر الملمع بيوكلينا ب متوسط من 14 الى 16 جم .يعيش معاك 9 شهور.
مزيل عسر المياه :- عباره عن بلورات شفافه زى حبه الارز الكبيره فى الحجم و ده بيشيل عسر المياه علشان الصابون يقوم بدوره - و المياه بالقاهره موش بطاله - لكن ممكن نستخدمه فى المناطق الساحليه اكثر -
الجرعه :-
الصابون :- 1 ملعقه متوسطه من 20 الى 25 جرام للمره الواحده.
الملمع :- يوضع بالخزان الخاص به و يستهلك 5 جرام للمره الواحده .
مزيل عسر المياه :- ليس له حاجه اذ كانت الميه معقوله و بدون املاح
البرامج :-
1/ نقع :- لو اطباق الغدا قليله بدل ما تشغلها على حاجات قليله انتظارا لوجبه العشاء مثلا - نستخدم البرنامج ده بيشطف الصحون بدون صابون تلافيا للرائحه لحد ما تملى الغساله بعد كده و تغسل الغسله الرئيسيه.
2/ زجاج / كريستال :و البرنامج ده لغسيل الفاكهه و الكريستال بس و الكبايات على درجه 35 م .
3/ اقتصادى :- وده الافضل للغسيل عموما و درجه الحراره 45 م
4/ اساسى : للغسيل عموما و درجه الحراره 55 م دهون و اشد اتساخا.
5/ قوى لغسيل الحلل و اوانى الشديده الاتساخ على درجه 65 م.
و قد تزيد البرامج عن كده لبعض الانواع بس دول اللى شائعين و بنستخدم منهم رقم 3 و 4
الصيانه :- قلما تحتاج الى صيانه بشروط :-
1/ صابون جيد
2/ مصدر مياه مناسب بدون ضغط عالى .
3/ كهرباء ثابته و توصيلات سليمه
4/ صرف المياه لا يقل عن 1.5 انش الشريف و لا يزيد .
5/ تنظيف الفلتر من المخلفات كل 5 ايام على الاقل و الغريبه ان اكثر الناس متعرفش ان النوع الثانى و الثالث مزود بمطحنه لطحن بقايا الطعام بفرض وجودها على الاطباق .و تصريفها ...
6/ ان وضع الاطباق و رصها بطريقه سليمه يعطى نتائج مبهره جدا و علشان كده انا صورت من الكتالوج الرصه بتاعه الحلل و الاطباق و حطيتها جنب الغساله لحد ما حفظت الشكل الانسب ده.
7 / مسافه مناسبه من كل جانب للتهويه 7 سم مثلا.
8/ لو فوق الرخامه الانواع الفيبر او الاستانلس افضل للحمايه من الصدا.
الانواع و الجوده
1/ المصرى :- للاحجام الثلاث تجميع معظمها مكونات صينى و تركى .ماعدا الماركات الاوربيه اللى بتتجمع فى مصر - بيبقى فيها بعد المكونات الاوروبيه مع التركى و الاسبانى و الصينى
المستورد :-ماركات عالميه معظمها بيتقفل فى الصين او تايلاند و مكوناتها صينى تحت اشراف الماركه الام او منتجات اوروبيه خالصه و معظمها ايطالى اريستون - انديست - ....الخ
الغساله المناسبه ليا اعرفها ازاى ؟؟
1/ حدد المكان اللى هتركب فيه و من هنا هتعرف الحجم المناسب اللى ممكن تشتريه
2/ زور هايبر 6 اكتوبر و معاه كارفور و سبينس و محلات عبد العزيز اللى خلف النادى الاهلى بشارع الطاقه ( النقل مجانا ) و قارن الاسعار و الصيانه.
3/ حدد الميزانيه المتاحه.
4/ اعتمد و توكل و اشترى بعد عمل التجهيزات من مياه و صرف و تغذيه.
قطع الغيار و الصيانه
1/ كل قطع الغيار متوافره بنوعيات جوده مختلفه بشارع محمد نجيب وسط البلد .
2/لو الماركه ليها وكيل صيانه كويس يبقى خير مكانش - متخافش فيه فنيين صيانه ممتازين و قطع غيار اشتريها لهم و يركبوها فى البيت و بلاش تسحب الغساله للمركز.
ملحوظه مهمه جدا
للنوع الثانى لو هتركب بلت ان - داخل دولاب - اعمل تحتها درج بارتفاع 50 سم علشان تحط فيه كل مستلزمات المطبخ من صابون و منظفات للغساله و الليف ........الخ و انت كده وفرت مكان و رفعت الغساله بشكل مهذب 50 سم علشان لما المدام ترص الغساله تكون فى مستوى ميتعبهاش- عاملها عندى و النتيجه ممتازه
المحصله النهائيه من وجهه نظرى
الغساله عمليه و مطلوبه جدا للتوفير بشرط اختيار النوع المناسب و الجيد ...
اسف للاطاله ودمتم بود
الف شكر ليكم لردودكم المفيده
تحت امرككم
بصراحة أ/ جلال وفى الموضوع حقه وشرحه شرح مفصل
بس لي استفسار اكتر عن الفولت جارد
هو بيتجاب منين ؟
وممكن اوصل جهاز واحد من الفولت جارد علي اكتر من جهاز في الشقه
يعني ( غساله تلاجه ... الخ ) ولا لكل جهاز الفولت جارد الخاص بيه
ممكن صوره لالفولت جارد
واخر حاجة وبتقل علي حضرتك التوصيل بيكون ازاي :D
معلش بتقل علي حضرتك بس بجد الموضوع دا مهم
حاجه كمان
انا بفضل ماركه lg لان عندي منها الغساله والتلاجه وهي فوق الممتازه
فهل هي كمان كويسه في غسالات الاطباق
وشكرا وسف علي كثرة الاسئله
تحت امركم ال جى ممتازه بس - منك للوكيل فى قطع الغيار ان احتاجت - انما الباقى حاجته متشابهه جدا
تحياتى
شكل الفولت جارد للاجهزه الصغيره
AVS7a Volt Guard - China Avs,7a Avs
او
China Volt Guard - large image for Avs
او
Sollatek | Online Store | Guard Range | Volt Guard
للشقه
Aliexpress.com : Buy AVS3P 3 Phases AVS from Reliable av cable suppliers on Wenzhou Natural Automation Equipment Co., Ltd.