عاجل- المحامين ومن لديهم خبرة في شراء شقق (تسجيل عقاري)

**cutie_honey** · 05-01-2014 11:31 PM

السلام عليكم
بصوا يا جماعة انا طالبة مشورة قانونية لأن فعلا موضوع شراء الشقق بقى كله نصب
المهم اني انشاءالله استقرينا على شقة ناخدها وماما راحت الشهر العقاري عشان تعمل طلب الحصول على صورة طبق الاصل من العقد٫ هناك قابلت محامي كان قاعد بيخلص ورق لناس وسألته على كام حاجة والراجل كان متعاون معاها جدا ولفت نظرنا لكارثة كانت حتعدي علينا وهي "ضريبة التصرفات العقارية اللي بتقع على عاتق المتصرف ٢.٥٪ من ثمن الشقة الاجمالي) واللي هو لو الراجل اخد فلوسه ونفد احنا اللي حنتدبس فيها يا كده يا امه مفيش "عقد اخضر".
مامتي يومها اخدت الكارت من المحامي ورحناله وكده (الهدف من القصة دي ان المحامي مش بتاعنا اصلا ده احنا عرفناه صدفة) وكنت قبليها طلبت من ناس قرايبنا يجيبولنا محامي جابولنا واحد بطيخة جدا ولا فاهم حاجة في حياته وعمره ما سجل شقة ف انا رفضت ان اول تجربة ليه تكون معانا. ناهيك عن انه ولا هو يعرف ايه "ضريبة التصرفات العقارية" اساسا.
ارجع للموضوع٫ رحنا للمحامي واخد صورة بطاقة المشتري وطلب نعمله توكيل عام قضايا ٫ انا سمعت كلمة"عام" دي من هنا قلتله ليه؟؟ قاللي بعد ما نخلص المصلحة ححفظه عندي عشان لو احتاجتوني بعد كده. انا قلتله مينفعش "خاص" ؟ قاللي لا ينفع.

طلب مني وصمم انه ييجي معايا الشهر العقاري في الدقي (قاللي انه ليه سكك جوة)
رحنا الشهر الغقاري وراح وصى واحد شغال هناك يعملنا (توكيل عام قضايا) قمت انا قلتله "حضرتك احنا قلنا خاص"
قام طلع ورقة وكتب "توكيل عام مخصص"

المهم انا عملت التوكيل (بس كنت لسة ولا دفعت ولا مضيت ولا حاجة خالص) وكنت واقفة مستنية دوري عالخزنة ادفع ال$$
فجأة المحامي جاله تليفون وقاللي ١/٤ ساعة وراجعلك تاني
رحت دخلت سألت حد هناك شغال حكيتله القصة وقلتلته ينفع اعمله "خاص" ؟؟ قاللي اه !!!
انا مش عارفة ليه ٫ لقيت نفسي واخدة بعضي وماشية وكلمته قلتله كانت الخزنة زحمة جدا وقعدوا يزقوني ف اتحنقت وروحت
المهم انا ساعتها طلعت على الشهر العقاري التابع لنقابة المحامين ورحت هناك وطلبت اعمله خاص وعملته واخدته بس لسة مادتهولوش

المهم اني كنت متفقة مع صاحب الشقة اني اسلمه الفلوس في الشهر العقاري وفي نفس ذات اللحظة يمضوا عالعقد الابتدائي ويعملوا توكيلات البيع الغير قابلة للالغاء
بس صاحب الشقة طالب انه لااااء الفلوس يتعملها ايداع في البنك لأن الشقة بإسم امه وخالته.
فهل يتنفع احطله الفلوس في البنك كدة من غبر اي اثبات
طب افرضوا بعد ما حطينا الفلوس يطلع بعربيته ويروح بيتهم وطز فينا
احيانا بفكر "لو سلمني المفتاح : ايش ضمني ان ده مفتاح الشقة" مهو ممكن يكون مفتاح اي كلام"
المهم الراجل رافض ياخد كاااش خايف من الفلوس المزورة اللي في السوق
انا مقدرة موقفه بس انا ايه يضمن لي حقي
المحامي بيقوللي "ماتخافيش انا معاكي"
بس انا مش واثقة فيه بردو
وليا سؤال : نفترض انه كنت عملتله توكيل عام :
"هل ممكن يستخدم التوكيل العام بأي شكل من الاشكال انه يرهن الشقة مثلا؟ يأجرها قانون قديم؟ يبيعها؟ اي تصرف"
ايه العمل بقى افيدوني افادكم الله
ومعلش ع الرغي الكتير ٬:)

**saddam** · 06-01-2014 12:59 AM

صديقتنا المواطنة
قولا واحدا هناك في موضوعك أشياء أنتي تبالغين فيها وأشياء أنتي محقة فيها وإن شاء الله اﻷخوة الأعضاء الزملاء مش حيقصروا معاكي في اﻹستفاضة بالشرح والنصيحة
وسأحصر تعليقي في موضوع توكيل عام قضايا وده توكيل عادي في المحاكم والنيابات يقدر بمثلك ولكنه لا يملك حق التصالح بدلا منك إن شطبتي هذه العبارة من التوكيل وقولا واحدا لا يبيح له لا أن يشتري لكم شقة ولا يبيعها ولا يؤجرها فلا تقلقي من هذه المواضيع وخوفك من المحامين للأسف مبرر ولكن أحيانا الصدفة تلعب دور يعني مثلا كان عندي قضية في أحد المحاكم وصديقي المحامي الخاص بي من مكتب كبير نصحني باﻹستسلام من أول جلسة أو مغادرة البلد حتى يسقط الحكم بالتقادم فطلبت محامي وكلمني من النت واحد وهو شاب وصار صديقي وإستلم القضية وقد دوخ الخصوم حتى هذه اللحظة 3 سنين بالمحاكم مجرد ما تأكد إني مظلوم وشكله حيقعدهم سنتين كمان وكمان بقوا معينين 3 محامين قصاده ولكن لو طلب منك فلوس عشان يدفع رسوم فروحي معاه أأمن يا أختي وموضوع الرجل بتاع الشقة وقضية تزوير الفلوس فتاخديه وتروحي البنك بتاعك وتسحبي فلوس الشقة قدامه وتطلعي عالشهر العقاري نعاه ومعاكي 3 رجالة من قرايبك لغاية ميمضي وتديه فلوسه
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**hossam_elwani** · 06-01-2014 03:54 AM

زى ما اخويا صدام قال اصرفى فلوسك من البنك قدامه ويعدها كمان فى البنك وتطلعو سوا على الشهر العقارى وسلم واستلم

ولو فلوسك فى حتة تانيه بره البنك اودعيهم برضه فى يوم واسحبيهم تانى قدامه

**A.Saad** · 06-01-2014 09:49 AM

المحامى ده شكله مش مضمون
التوكيلات انواعها

توكيل عام : ده لاى تصرف فى حياتك

توكيل عام قضايا : ده بيتيح له الوكالة عنك فى اى قضية سواء رفعها او التصالح فيها او التنازل عنها

توكيل خاص قضايا : بيكون عن قضية محددة

موضوع الفلوس :
ممكن تعملى له شيك مقبول الدفع بيهم من البنك
ياخد الشيك فى اى مكان
كدة فلوسه البنك مجنبها من رصيدك لحين صرف الشيك

سؤال تانى : انتى شفتى ورق الشقة واتاكدتى من صحته ولا لسه ؟؟؟ المفروض تعملى كدة قبل اتمام العقد والتوقيه وتسالى عليها مخالفات فى الحى ولا لا وتشوفى المرافق فيها موقفها ايه ولو البائع له توكيلات من امه واخته تشوفيها فى الشهر العقارى سارية ولا لا
لو عايزة محامى عندى

**esam_refaat** · 28-06-2014 08:21 PM

وبالنسبة لضريبة التصرفات العقارية ايه موقفها ؟

**omar101970** · 28-06-2014 08:30 PM

أنا رأيى انك لازم تكونى عارفه المحامى كويس وواثقه فيه.
طبعا بالأضافه الى نصايح الزملاء هنا وربنا يوققك.

**esam_refaat** · 04-07-2014 12:07 PM

cutie_honey
عملتى ايه فى ضريبة التصرفات العقارية ؟

**Mr.Lawyer** · 04-07-2014 02:41 PM

أعتقد ان الموضوع قديــم ولكن لى تعليق على نقطه معينه فيه

للأسف هناك لبث وغلط كبير فى التفرقه ما بين التوكيل العام الرسمى والتوكيل العام قضايا ، وكثير من الموكلين يخافون من كلمــه ( عــام ) ، فالتوكيل العام يبيح للوكيل ابرام التصرفات كالبيع والشراء ،، الخ نيابه عن الموكل وفى هذه الحاله فان اى تصرف يبرمه الوكيل ينصرف مباشرة الي ذمة الموكل الاصيل ويعد ملزما له ولا يجوز التنصل منه ، اما التوكيل العام قضايا فهو يتيح للمحامى ( الوكيل ) ابرام التصرفات القانونيه نيابه عن الموكل وتمثيل الموكل امام المحاكم والنيابات والمصالح الحكوميه وللحضور امام المحاكم والشهر العقاري فيما يتعلق بتقديم الطلبات ،،، الخ

وفى حاله التوكيل العام قضايا لا يحق للمحامى ( الوكيل ) بيع او تأجير او شراء او التعامل مع البنوك والتوقيع على العقود نيابه عن الموكل ، بل يقتصر دور الوكيل تمثيل الموكل امام المحاكم والنيابات والمصالح الحكوميه فقط ولا اعتقد ان هناك ضرراً من هذا التوكيل ويحق للموكل الغاء التوكيل فى اى وقت ولا يشترط حضور الطرفين لالغاءه مع اعلان الوكيل بالالغاء

فمع احترامى ، طالما اى موكل لا يثق فى محاميه لدرجه الخوف من توكيل قضايا عادى ، فمن باب اولى انه لا يعطيه قضيته ولا يأمن له على المستندات والاوراق التى تثبت حقه فى القضيه لانها اهم مليون مره من مجرد توكيل يلغى ف اى وقت بدون اى شروط

مع العلم انه يمكن عمل توكيل خاص لقضيه بعينها مع التحديد ويكون فيه تقييد لعمل المحامى فى التعامل مع المصالح الحكوميه بالاخص على عكس التوكيل العام قضايا الذى يفضله معظم المحامين لتسهيل عمله فى هذه القضيه واى قضايا اخرى فى المستقبل لنفس الموكل للتوفير على الموكل مصاريف عمل اكثر من توكيل خاص

مع تحياتى ,,